ក្រុមហ៊ុនផលិតរថយន្តអគ្គិសនីក្នុងស្រុកវៀតណាមឈ្មោះថា VinFast បានប្រកាសកាលពីថ្ងៃច័ន្ទដើមសប្តាហ៍នេះថា ខ្លួននឹងផលិតរថយន្តថែមពីរម៉ូឌែលថ្មីទៀត ហើយក៏ត្រៀមនឹងដាក់បង្ហាញជាសាធារណៈក្នុងពេលឆាប់ៗនេះផងដែរ ដើម្បីត្រៀមចូលខ្លួនប្រកួតប្រជែងក្នុងទីផ្សាររថយន្តអគ្គិសនីនៅអាមេរិក និងអឺរ៉ុបផងដែរ។ នេះបើតាមទីភ្នាក់ងារសារព័ត៌មានបារាំង AFP។
ប្រភពពីខាងក្រុមហ៊ុន VinFast ក៏បានបង្ហើបប្រាប់សារព័ត៌មានក្នុងស្រុកវៀតណាមថា ខ្លួនបាននិងកំពុងរៀបចំប្រតិបត្តិការអាជីវម្ម ដូចជាជ្រើសរើសបុគ្គលិក និងបង្កើតការិយាល័យលក់ក្នុងប្រទេសមួយចំនួនក្នុងតំបន់អឺរ៉ុប និងអាមេរិករួចហើយ ក្នុងនោះរួមមាន នៅប្រទេសកាណាដា សហរដ្ឋអាមេរិក បារាំង អាល្លឺម៉ង់ និងហូរឡង់ ដែលសុទ្ធសឹងជាទីផ្សារគោលដៅសំខាន់ៗ។
យ៉ាងណាមិញ ក្រុមហ៊ុន VinFast បានបញ្ជាក់ប្រាប់ហើយថា ខ្លួននឹងមិនមានដំណើរការរោងចក្រផលិតរថយន្តនៅក្រៅប្រទេស ឬនៅប្រទេសណាមួយ ដែលបានរៀបរាប់ខាងលើនោះទេ ពោលគឺរថយន្តអគ្គិសនីទាំងអស់របស់ VinFast នឹងត្រូវផលិតតែក្នុងទឹកដីវៀតណាមប៉ុណ្ណោះ។
អត្ថបទទាក់ទង!
គួរកត់សម្គាល់ថា រថយន្តរបស់វៀតណាម និងក្លាយជាម៉ូឌែលរថយន្តដំបូងគេរបស់ប្រទេសតំបន់អាស៊ាន ដែលនឹងឈានជើងទៅក្រកួតប្រជែងជាមួយនឹងរថយន្តអគ្គិសនីម៉ាកល្បីៗលំដាប់ពិភពលោក ដូចជា រថយន្តតេស្លារបស់មហាសេដ្ឋីលោក Elon Musk និងម៉ាករថយន្តវ័យចំណាស់ Volkswagen ជាដើម។
បើតាមការឲ្យដឹងពីក្រុមហ៊ុនVinFast ដើម្បីមានលទ្ធភាពអាចប្រកួតប្រជែងនឹងរថយន្តម៉ាកល្បីៗទាំងនេះបាន ក្រុមហ៊ុនវៀតណាមមួយនេះបានជ្រើសរើសអ្នកជំនាញមកពីក្រុមហ៊ុនជាច្រើនរួមមានក្រុមហ៊ុន Tesla, BMW និង Toyota ដើម្បីឲ្យមកបម្រើការសម្រាប់ពួកគេ។
សូមបញ្ជាក់ថា VinFast ជាក្រុមហ៊ុនផលិតរថយន្តអគ្គិសនីដែលជាបុត្រសម្ព័ន្ធរបស់ក្រុមហ៊ុនពហុអាជីវកម្ម Vingroup ដែលជារបស់មហាសេដ្ឋីលេខមួយរបស់វៀតណាមគឺលោក Pham Nhat Vuong។ ក្រុមហ៊ុនរថយន្ដវៀតណាមមួយនេះ ត្រូវបានគេមើលឃើញថា ហាក់ទទួលបានភាពជោគជ័យគួរឲ្យកត់សម្គាល់ក្នុងការលក់រថយន្តអគ្គិសនីនៅវៀតណាមកាលពីឆ្នាំ២០២០ ដែលលក់បានដល់ទៅជាង ៣ម៉ឹនគ្រឿង ខណៈដែលនៅខែមករាឆ្នាំ២០២១ គ្រាដែល VinFast បញ្ចេញរថយន្តម៉ូលថ្មី ភ្លាមៗក៏មានការបញ្ជាទិញយ៉ាងគំហុកដល់ទៅជាង ២ម៉ឺន៥ពាន់គ្រឿងផងដែរ៕
None
