ក្រុមហ៊ុន VinFast ដែលជាក្រុមហ៊ុនក្មេងខ្ចីមួយបានចាប់ផ្តើមប្រតិបត្តិការក្នុងឆ្នាំ២០១៩ កំពុងតែមានមហិច្ឆតាត្រៀមពង្រីកខ្លួននៅក្នុងទីផ្សារសហរដ្ឋអាមេរិក ជាកន្លែងដែលក្រុមហ៊ុនវៀតណាមនេះសង្ឃឹមថា អាចនឹងប្រកួតប្រជែងជាមួយក្រុមហ៊ុនផលិតរថយន្តអគ្គិសនីផ្សេងទៀតនៅក្នុងប្រទេសសេរីមួយនេះ ជាមួយនឹងរថយន្តអគ្គិសនីប្រចាំត្រកូលរបស់ខ្លួនគឺ VF8 និង VF9 ដែលមានតម្លៃសមស្របផងនោះ។
នាយកប្រតិបត្តិក្រុមហ៊ុនយក្ស VinFast លោកស្រី ឡេធីធូធី (Le Thi Thu Thuy) បានប្រាប់ទីភ្នាក់ងាររ៉យទ័រក្នុងពិធីពិពណ៍ក្នុងខេត្តហៃផុង (Haiphong) ថា «កញ្ចប់ទីមួយនៃរថយន្តអគ្គិសនីស៊េរី VF8 ចំនួន៥ពាន់គ្រឿង នឹងត្រូវចេញលក់ទៅទីផ្សារសហរដ្ឋអាមេរិក និងអាមេរិកខាងជើង ដោយផលិតកម្មដ៏ធំនេះនឹងចាប់ផ្តើមនៅសប្តាហ៍ក្រោយតែម្តង»។
លោកស្រី ឡេធីធូធី បាននិយាយថា ក្រុមហ៊ុន VinFast ដែលជាផ្នែកមួយនៃសម្ព័ន្ធក្រុមហ៊ុន Vingroup នោះ នឹងចាប់ផ្តើមដឹកជញ្ជូនរថយន្តសម្រាប់លក់នៅក្រៅប្រទេសក្នុងខែវិច្ឆិកា ហើយអតិថិជននឹងអាចធ្វើការបញ្ជាទិញនៅខែធ្នូផងដែរ។
អត្ថបទគួរអាន
នាយកប្រតិបត្តិក្រុមហ៊ុនVinFast បានគូសបញ្ជាក់ថា ការចុះបញ្ជីកក់ទុករថយន្ដមានជិត ៦ម៉ឺន៥ពាន់គ្រឿងនៅទូទាំងពិភពលោក ហើយក្រុមហ៊ុនរំពឹងថា ការលក់រថយន្តអគ្គិសនីនឹងអាចហក់ឡើងដល់៧៥ម៉ឺនគ្រឿង ក្នុងមួយឆ្នាំៗ គិតត្រឹមឆ្នាំ២០២៦ ជាមួយស៊េរីប្រចាំត្រកូល VF8 និង VF9 របស់ខ្លួន។
កាលក្នុងខែមីនា ក្រុមហ៊ុន VinFast បាននិយាយថា ខ្លួនក៏នឹងគ្រោងសាងសង់រោងចក្រផលិតរថយន្តអគ្គិសនីនៅរដ្ឋ North Carolina ជាមួយនឹងសមត្ថភាពផលិតបាន១៥ម៉ឺនគ្រឿងក្នុងមួយឆ្នាំផងដែរ ដែលគម្រោងនេះបានទាក់ទាញធនាគារក្នុងស្រុកវៀតណាមនៅក្នុងខែកក្កដាកន្លងទៅ ក្នុងការប្រមូលមូលនិធិយ៉ាងហោចណាស់៤ពាន់លានដុល្លារ សម្រាប់ការសាងសង់។
គួរជម្រាបថា រថយន្តអគ្គិសនីស៊េរី VF8 និង VF9 នឹងមានតម្លៃពី ៤២ ២០០ដុល្លារ ទៅ ៥៧ ៥០០ ដុល្លារ សម្រាប់អតិថិជនសហរដ្ឋអាមេរិក ដោយមិនរាប់បញ្ចូលថ្លៃដើមសម្រាប់ជួលអាគុយអគ្គិសនីឡើយ តែចាប់ពីខែកញ្ញានេះទៅ ក្រុមហ៊ុនក៏នឹងផ្តល់ជូនអតិថិជននូវជម្រើសដែលរួមបញ្ចូលទាំងតម្លៃអាគុយផងដែរ៕
