ដោយសារវិបត្តិកូវីដ១៩ វៀតណាមចរចាផ្អាកការផ្សាយពាណិជ្ជកម្មជាមួយទូរទស្សន៍ CNN

អាជ្ញាធរក្រុងហាណូយ បានបញ្ជាឲ្យផ្អាកបណ្ដោះអាសន្ននូវការផ្សាយពាណិជ្ជកម្មបង្អួតវិស័យទេសចរណ៍របស់វៀតណាម នៅលើទូរទស្សន៍ពិភពលោក CNN ខណៈដែលប្រទេសកំពុងប្រយុទ្ធប្រឆាំងនឹងការឆ្លងរាលដាលវីរុសកូវីដ១៩។

ដោយសារវិបត្តិកូវីដ១៩ វៀតណាមចរចាផ្អាកការផ្សាយពាណិជ្ជកម្មជាមួយទូរទស្សន៍ CNN។ រូបភាពឯកសារ Pixabay

ប្រធានក្រុងហាណូយ លោក ង្វៀន ឌុច ជុង នៅសប្ដាហ៍នេះ បានស្នើឲ្យនាយកដ្ឋានទេសចរណ៍ ចរចាជាមួយទូរទស្សន៍ CNN អំពីការផ្អាកបណ្ដោះអាសន្ន នូវរាល់ការផ្សាយពាណិជ្ជកម្មទេសចរណ៍ទាំងអស់ នៅលើកញ្ចក់ទូរទស្សន៍ពិភពលោកមួយនេះ ចាប់ពីពេលនេះតទៅ រហូតដល់ខែកញ្ញា ឆ្នាំ២០២០។

វិធានការនេះ ត្រូវបានអាជ្ញាធរបញ្ជាក់ថា គឺដើម្បីកាត់បន្ថយការចំណាយរបស់រដ្ឋ និងប្រមែប្រមូលធនធានទាំងអស់ផ្ដោតទៅលើការប្រយុទ្ធប្រឆាំងនឹងវីរុសកូវីដ១៩ ខណៈដែលរដ្ឋធានីហាណូយមានអត្រាឆ្លងរាលដាលវីរុសកូវីដ១៩ខ្ពស់ជាងគេនៅក្នុងប្រទេស។ គិតត្រឹមថ្ងៃចន្ទ (ទី៦ ខែមេសា) ក្រុងហាណូយមានករណីឆ្លង ១១១នាក់ និងជាសះស្បើយ ៣៨នាក់។

កាលពីឆ្នាំទៅមិញ ក្រុងហាណូយបានចុះហត្ថលេខាលើកិច្ចសន្យាផ្សាយពាណិជ្ជកម្មទេសចរណ៍ជាមួយទូរទស្សន៍ CNN សម្រាប់រយៈពេលពីឆ្នាំ២០១៩ ដល់ឆ្នាំ២០២៤ ក្នុងតម្លៃទឹកប្រាក់ ៤លានដុល្លារអាមេរិក៕