សារព័ត៌មានធំៗបានរាយការណ៍ថា ក្នុងនាមជាប្រមុខដឹកនាំក្រសួងសន្តិសុខសាធារណៈ លោក តូ ឡឹម ដែលមានវ័យ៦៦ឆ្នាំ គឺជាតួអង្គដ៏សំខាន់នៅក្នុងយុទ្ធនាការប្រឆាំងអំពើពុករលួយ ប៉ុន្តែត្រូវបានអ្នករិះគន់មើលឃើញថា ជាយន្តការមួយនៃការចាត់ការ និងដោះស្រាយជម្លោះនយោបាយផ្ទៃក្នុងនៃបក្សកុម្មុយនីស្តវៀតណាម។
បន្ទាប់ពីទទួលបានការតែងតាំងដោយសភា លោក ឡឹម បានប្រាប់សមាជិកសភាថា លោកនឹងបន្តការតស៊ូប្រឆាំងអំពើពុករលួយយ៉ាងម៉ឺងម៉ាត់ និងខ្ជាប់ខ្ជួនថែមទៀត ប៉ុន្តែទោះជាយ៉ាងណា លោកត្រូវបានគេកត់ត្រានូវរឿងរ៉ាងចម្រូងសម្រាសមួយចំនួន។ នៅក្នុងឆ្នាំ២០២១ កន្លងទៅ មេចុងភៅដ៏ល្បីឈ្មោះមួយរូប គឺលោក នូស្រេត ហ្គុក ( Nusret Gokce ) ដែលត្រូវបានគេស្គាល់ជាសាធារណៈថា សល់ បេ (Salt Bae) បានបង្ហោះវីដេអូមួយ ដែលបង្ហាញពីការចម្អិនអាហាររបស់លោកជូនលោក ឡឹម គឺសាច់អាំងស្រោបមាស នៅភោជនីយដ្ឋាននាទីក្រុងឡុងដ៏ ខណៈដែលប្រទេសវៀតណាមស្ថិតក្រោមចំណាត់ការបិទប្រទេសប្រឆាំងនឹងមេរោគកូវីដ-១៩។
អត្ថបទគួរអាន
ក្រោយពេលវីដេអូនេះត្រូវគេចែកចាយព្រោងព្រាត លោក សល់ បេ ក៏បានលុបវីដេអូនោះចោល ប៉ុន្តែអ្នកលក់គុយទាវជនជាតិវៀតណាមម្នាក់ដែលបានបង្ហោះវីដេអូរបស់លោក Salt Bae ត្រូវបានកាត់ទោសឱ្យជាប់ពន្ធនាគាររយៈពេលប្រាំឆ្នាំពីបទ ការឃោសនាប្រឆាំងនឹងរដ្ឋ។
ជាមួយគ្នានេះ លោក ឡឹម ត្រូវបានគេដឹងថា គឺជាអ្នកដឹកនាំករណីដ៏ល្បីមួយកើតឡើងនៅក្នុងឆ្នាំ ២០១៧ នៅពេលដែលកងកម្លាំងសេវាសន្តិសុខរបស់វៀតណាម ត្រូវបានចោទប្រកាន់ថា បានអនុវត្តវិធានការមិនធម្មតាលើការនាំខ្លួននាយកប្រតិបត្តិធុរកិច្ចវៀតណាមម្នាក់ពីប្រទេសអាល្លឺម៉ង់ តាមរយៈស្លូវ៉ាគី រហូតធ្វើឲ្យមានភាពល្អក់កករខាងការទូតមួយរយៈជាមួយនឹងអាល្លឺម៉ង់។
នេះគឺជាសាវតាត្រួសៗដែលពាក់ព័ន្ធនឹងមេដឹកនាំវៀតណាមថ្មី ខណៈដែលគេដឹងថា មកទល់ពេលនេះនៅក្នុងប្រទេសវៀតណាម ប្រធានាធិបតី គឺជាជនកំពូលមួយរូបនៅក្នុងចំណោមឥស្សរជនកំពូលៗ ដែលកំពុងកាន់តំណែងសំខាន់នៅក្នុងការទ្រទ្រង់សសរស្តម្ភដឹកនាំវៀតណាមទាំង៤រូប គឺអគ្គលេខាធិការបក្សកុម្មុយនីស្ត ប្រធានាធិបតី ប្រធានសភា និងនាយករដ្ឋមន្រ្តី។
លោក ខាល ថេយ័រ (Carl Thayer) សាស្ត្រាចារ្យកិត្តិយសមួយរូបនៅអូស្រ្តាលី បាននិយាយថា ជម្លោះនយោបាយត្រូវបានគេរំពឹងថា នឹងធូរស្រាលជាបណ្ដោះអាសន្នក្រោយការបោះឆ្នោតតែងតាំងលោក ឡឹម៕
ដោយៈ សរ សុជាតិ
None
