អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា និង ជាប្រធានក្រុមប្រឹក្សាភិបាលក្រុមហ៊ុន លី ហួរ គ្រុប បានលើកឡើងដែរថា ផលប៉ះពាល់នៃកូវីដ-១៩ មិនត្រឹមតែធ្វើឲ្យប៉ះពាល់ដល់ចំណូលពលរដ្ឋប៉ុណ្ណោះទេ ប្រាក់ចំណូលរបស់ក្រុមហ៊ុនក៏មានការធ្លាក់ចុះដូចគ្នាដែរ។
អ្នកឧកញ៉ា លី ហួរ មានប្រសាសន៍ថា «ក្រុមហ៊ុនសុទ្ធតែខ្ចីធនាគារបន្ដៗគ្នាអញ្ចឹងដែរ! ប្រជាជនបង់រំលស់ឲ្យយើង យើងបង់រំលស់ឲ្យធនាគារហ្នឹង! បង់ពន្ធ បង់ទៅលើប្រាក់ខែបុគ្គលិក ចំណាយផ្សេងៗ បានយើងបន្ដនិរន្តរភាពទៅបាន!»។
ទោះយ៉ាងណា អ្នកឧកញ៉ា លី ហួរ គូសបញ្ជាក់ថា កន្លងមក ក្រុមហ៊ុនអភិវឌ្ឍន៍អចលនវត្ថុ នៅតែបន្ដអនុវត្តនូវវិធានការទន់ភ្លន់សម្រាប់ជួយដោះស្រាយបញ្ហារបស់អតិថិជនដែលមានផលលំបាកជាក់ស្ដែងនៅក្នុងអំឡុងពេលកូវីដនេះ។
អត្ថបទទាក់ទង!
អ្នកឧកញ៉ា លី ហួរ មានប្រសាសន៍យ៉ាងដូច្នេះ «កន្លងមកក្រុមហ៊ុន សមាគម អ្នកអភិវឌ្ឍន៍ទាំងអស់បានអនុវត្តភាពទន់ភ្លន់ដោះស្រាយកន្លងមកវាបានរលូនមកដល់ថ្ងៃនេះ។ ឥឡូវកូវីដវាកាន់តែធ្ងន់ថែមទៀត អញ្ចឹងបើក្រុមហ៊ុនមានបញ្ហា រដ្ឋាភិបាលរឹតតែមានបញ្ហាទៀត ដោយសារអី? អ្នកធ្វើការនៅក្រុមហ៊ុនហ្នឹងរាប់ពាន់នាក់ ក្រុមហ៊ុនខ្លះចូលម៉ឺននាក់ ប្រាក់ខែមួយខែៗ បើសិនជាក្រុមហ៊ុនរលំ ពួកគាត់ក៏អត់ការងារធ្វើដែរ ហើយតែអត់បើកប្រាក់ខែតែ១ខែ ២ខែ បាតុកម្មពេញហ្នឹងឥឡូវ! អញ្ចឹងវាក្ស័យធន! អញ្ចឹងការអនុវត្តតាមរដ្ឋាភិបាលដោយភាពទន់ភ្លន់ យើងធ្វើកម្រិតសម្រាប់តែជាក់ស្ដែង សម្រាប់អ្នកដែលផ្ទាល់ (រងគ្រោះ) ពិតប្រាកដ បើអ្នកដេកផ្សំផ្ដួល រមួលផ្សំគ្រេចហ្នឹង ក៏យើងមើលតាមហ្នឹងដែរ!»។
យ៉ាងណាក៏ដោយចុះ ឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយក ក្រុមហ៊ុន CPL បានបង្ហាញការគាំទ្រចំពោះយន្តការរបស់រាជរដ្ឋាភិបាល ដែលស្នើឲ្យម្ចាស់គម្រោងបុរី និងអគារសហកម្មសិទ្ធិនានាមានការលើកលែង និងបន្ធូរបន្ថយការបង់ប្រាក់ដល់អតិថិជន ក្នុងអំឡុងពេលនេះ។ លោកឧកញ៉ា ចេង ខេង រំពឹងថា ការអំពាវនាវរបស់រដ្ឋាភិបាលនេះ ក៏អាចនឹងជំរុញឲ្យចរន្ដទិញលក់អចលនវត្ថុអាចនឹងស្ទុះងើបប្រសើរឡើងផងដែរ។
ដោយឡែក លោកស្រី អាន សុធីតា អគ្គនាយិកា CBRE Cambodia ក៏បានមើលឃើញដែរថា ការស្នើឲ្យមានការបន្ធូរបន្ថយលើបង់ប្រាក់ដល់អតិថិជនរបស់រាជរដ្ឋាភិបាលនេះ គឺជាការរួមចំណែកមួយក្នុងការជួយសម្រាលទុក្ខលំបាករបស់អតិថិជន ដែលកំពុងជួបការលំបាក។ ប៉ុន្តែវាក៏ជះឥទ្ធិពលមិនល្អមួយចំនួនផងដែរ ដល់ម្ចាស់គម្រោងអភិវឌ្ឍន៍ ពិសេសម្ចាស់គម្រោងដែលវិនិយោគដោយប្រើកម្ចីពីធនាគារ។ ប៉ុន្ដែ សម្រាប់អ្នកអភិវឌ្ឍន៍ដែលមានដើមទុនគ្រប់គ្រាន់ដោយខ្លួន មិនមានប្រើកម្ចីធនាគារនឹងមិនជួបបញ្ហានោះទេ។
ជាមួយគ្នានេះដែឬ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុឯណោះវិញ បានបង្ហាញទស្សនៈផ្ទាល់ខ្លួនថា រដ្ឋាភិបាលគួរតែបង្កើន និងជំរុញការផ្តល់ឥណទានបន្ថែមក្នុងលក្ខខណ្ឌពិសេសណាមួយដល់ម្ចាស់គម្រោងអភិវឌ្ឍន៍បុរីលំនៅឋាន និងអគារសហកម្មសិទ្ធនានា ដ្បិតអ្នកវិនិយោគភាគច្រើនខ្ចីលុយធនាគារមកអភិវឌ្ឍន៍ នោះទើបជាយុទ្ធសាស្ត្រឈ្នះៗទាំងអស់គ្នា។
សូមបញ្ជាក់ថា ដើម្បីជួយដោះស្រាយបញ្ហាសម្ពាធហិរញ្ញវត្ថុរបស់ប្រជាពលរដ្ឋជាអ្នកទិញ អចលនវត្ថុនៅតាមបុរីនិអគារសហកម្មសិទ្ធិនានា ធនាគារជាតិ និងក្រសួងសេដ្ឋកិច្ច និងហិរញ្ញវត្ថុ បានអំពាវនាវ និងលើកទឹកចិត្ត ដល់ក្រុមហ៊ុនអភិវឌ្ឍអចលនវត្ថុទាំងអស់ អនុវត្តនូវចំណុចចំនួន៥ រួមមាន៖
១, ពិនិត្យពីលទ្ធភាពបន្ធូរបន្ថយលក្ខខណ្ឌបង់រំលស់ទៅតាមស្ថានភាពជាក់ស្ដែងរបស់អតិថិជន
២, លើកលែងការផាកពិន័យចំពោះអ្នកទិញអចលនវត្ថុក្នុងបុរី និងអគារសហកម្មសិទ្ធិនានា ក្នុងករណីដែលអ្នកទិញយឺតយ៉ាវមិនបានបង់ប្រាក់តាមកាលកំណត់
៣, មិនត្រូវមានបន្ទុការប្រាក់ ឬជាប់ការពិន័យបន្ថែមចំពោះការយឺតយ៉ាវក្នុងការបង់រំលស់ប្រាក់រំលស់
៤,ដាក់ចេញនូវគោលនយោបាយគាំពារនានាដល់អតិថិជនរបស់ខ្លួនលើការបង់រំលស់អចលនវត្ថុក្នុងបុរី និងអគារសហកម្មសិទ្ធិនានា៥, អនុវត្តវិធានការទាំងនេះឲ្យមានប្រសិទ្ធភាព រហូតដល់ដំណាច់ខែមីនា ឆ្នាំ២០២២៕
None
