តើកត្តាចម្បងអ្វីខ្លះរារាំងមហាយក្សចិន មិនឱ្យវ៉ាឈ្នះអាម៉េរិក ក្លាយជាមហាអំណាចសេដ្ឋកិច្ចទី១ របស់ពិភពលោករហូតដល់ឆ្នាំ២០៨០?

លោក ណាថាន ស្ស៊ីត (Nathan Sheets)ប្រធានអ្នកជំនាញសេដ្ឋកិច្ចសកលនៅធនាគារវិនិយោគអន្តរជាតិ Citi និងជាអតីតមន្ត្រីរតនាគារអាម៉េរិក ក្នុងរដ្ឋបាលរបស់ប្រធានាធិបតី បារ៉ាក់ អូបាម៉ា បានលើកឡើងថា ច្បាស់ណាស់ថា មហាយក្សចិន នឹងមិនអាចវ៉ាឈ្នះសហរដ្ឋអាម៉េរិកក្លាយជាមហាអំណាចសេដ្ឋកិច្ចទី១ របស់ពិភពលោករហូតដល់ឆ្នាំ២០៨០ បន្ទាប់ពីសេដ្ឋកិច្ចចិនបានដាំក្បាលចុះខ្លាំងក្នុងរយៈពេល២ឆ្នាំចុងក្រោយនេះ។

អ្នកជំនាញរូបនេះបានគូសបញ្ជាក់ថា សេដ្ឋកិច្ចចិនបានដាំក្បាលចុះខ្លាំង បើធៀបនឹងសេដ្ឋកិច្ចអាម៉េរិក ហើយសេដ្ឋកិច្ចរបស់ប្រទេសចិន ពេលនេះគឺមានទំហំត្រឹមតែ៦៥%ប៉ុណ្ណោះនៃផលិតផលក្នុងស្រុកសរុប (GDP) របស់សហរដ្ឋអាម៉េរិក ដោយធ្លាក់ចុះពី៧៥%ក្នុងឆ្នាំ២០២១។

ចិន ដែលជាប្រទេសមានសេដ្ឋកិច្ចធំបំផុតទី២ របស់ពិភពលោក បានរីកចម្រើនយ៉ាងឆាប់រហ័សគួរឱ្យភ្ញាក់ផ្អើលក្នុងរយៈពេល២ទសវត្សរ៍ចុងក្រោយនេះ ដែលអាចនឹងក្លាយជាមហាអំណាចសេដ្ឋកិច្ចទី១ របស់ពិភពលោកលឿនជាងការរំពឹងទុក ប៉ុន្តែពេលនេះសេដ្ឋកិច្ចចិនបានបាត់សន្ទុះខ្លាំងដោយសារកត្តាចម្បងៗជាច្រើន។

ជាឧទាហរណ៍ អត្ថប្រយោជន៍នៃនគរូបនីយកម្មដែលពលកររាប់លាននាក់បានផ្លាស់ទីពីជនបទទៅកាន់ទីក្រុង ត្រូវបានប្រើប្រាស់ភាគច្រើនរួចមកហើយមកទល់ពេលនេះ។ ហើយយោងតាមអង្គការសុខភាពពិភពលោក (WHO) ឱ្យដឹងថា ប្រទេសចិន ក៏មានប្រជាជនកាន់តែចាស់ផងដែរ ដោយជិត១ភាគ៣នៃពលរដ្ឋចិន ត្រូវបានរំពឹងថា នឹងមានវ័យលើស៦០ឆ្នាំនៅឆ្នាំ២០៤០។

មិនតែប៉ុណ្ណោះការរីកចម្រើនយ៉ាងឆាប់រហ័សក្នុងវិស័យសំណង់ជំរុញដោយបំណុល ដែលបានជួយជំរុញសេដ្ឋកិច្ចក្នុងស្រុកយ៉ាងសម្បើម ក៏បានជាប់គាំងដែរនៅពេលនេះ។ ជាក់ស្ដែង កាលពីដើមសប្ដាហ៍នេះ តុលាការហុងកុង បានចេញសាលដីកាបង្គាប់ឱ្យរម្លាយក្រុមហ៊ុនអភិវឌ្ឍន៍អចលនទ្រព្យយក្សចិន China Evergrande និងលក់ឡាយឡុងទ្រព្យសកម្មរបស់ក្រុមហ៊ុនអភិវឌ្ឍន៍អចលនទ្រព្យដែលជំពាក់បំណុលច្រើនបំផុតរបស់ពិភពលោកមួយនេះ ដើម្បីទូទាត់បំណុលជាង៣០០ពាន់លានដុល្លាររបស់ខ្លួន ហើយនេះជានិមិត្តរូបបង្ហាញពីបញ្ហាសេដ្ឋកិច្ចជាប្រព័ន្ធរបស់មហាយក្សចិន៕