តើប្រទេសណាខ្លះជាគោលដៅកំពូលសម្រាប់ពលរដ្ឋអាម៉េរិករស់នៅសោយសុខជីវិតចុងក្រោយ បន្ទាប់ពីចូលនិវត្តន៍?

សារព័ត៌មានដ៏ល្បីល្បាញ Business Insider បានចុះផ្សាយកាលពីពេលថ្មីៗនេះថា ពលរដ្ឋអាម៉េរិក ដែលចូលនិវត្តន៍កាន់តែច្រើនឡើងសុខចិត្តចាកចោលប្រទេសកំណើតរបស់ខ្លួនដែលគេទទួលស្គាល់ថា ជាមហាអំណាចធំបំផុតទី១ របស់ពិភពលោកទាំងផ្នែកយោធា និងសេដ្ឋកិច្ច ដើម្បីសោយសុខជីវិតចុងក្រោយរបស់ខ្លួន។ ហេតុផលចម្បងចំនួន២ដែលជំរុញឱ្យពលរដ្ឋអាម៉េរិក ចូលនិវត្តន៍សុខចិត្តចាកចេញទឹកដីកំណើតរបស់ខ្លួន គឺដើម្បីស្វែងរកប្រទេសទី២ ដែលមានថ្លៃចំណាយជីវភាពរស់នៅប្រចាំថ្ងៃទាប និងការថែទាំសុខាភិបាលដែលមានតម្លៃទាប និងស្រួលប្រើប្រាស់។

ទិន្នន័យផ្លូវការបង្ហាញថា ចំនួនពលរដ្ឋអាម៉េរិក ចូលនិវត្តន៍ដែលទទួលបានអត្ថប្រយោជន៍ពីរបបសន្តិសុខសង្គមនៅក្រៅប្រទេសបានកើនឡើងពីប្រមាណ៣០ម៉ឺន៧ពាន់នាក់ ក្នុងឆ្នាំ២០០៨ រហូតដល់ជាង៤៥ម៉ឺននាក់គិតត្រឹមឆ្នាំ២០២២។

ទំនោរនេះហាក់កំពុងទាក់ទាញពលរដ្ឋអាម៉េរិកចូលនិវត្តន៍កាន់តែច្រើនឡើងៗ ជាពិសេសស្របពេលដែលមានភាពមិនប្រាកដប្រជាផ្នែកនយោបាយនៅសហរដ្ឋអាម៉េរិក។

ប្រទេសដែលបានក្លាយជាគោលដៅកំពូលសម្រាប់ពលរដ្ឋអាម៉េរិករស់នៅសោយសុខជីវិតចុងក្រោយ បន្ទាប់ពីចូលនិវត្តន៍ រួមមាន កាណាដា, ជប៉ុន, ម៉ិកស៊ិក, អង់គ្លេស, អាល្លឺម៉ង់, ហ្វីលីពីន, ប៉ូឡូញ, អ៊ីតាលី, អូសេអានី និងក្រិកជាដើម៕

ដោយ: តែម សុខុម