បណ្តាប្រទេសនៅអឺរ៉ុបជាច្រើនកំពុងរាយការណ៍ពីចំនួនខ្ពស់នៃការឆ្លងជំងឺកូវីដ១៩ កាន់តែច្រើនឡើងៗនាពេលបច្ចុប្បន្ននេះ។ ជាក់ស្ដែង ប្រទេសបារាំងបានព្រមានកាលពីសប្តាហ៍មុនថា ករណីឆ្លងថ្មីប្រចាំថ្ងៃអាចលើសពី ១០ម៉ឺននាក់ក្នុងពេលឆាប់ៗនេះ។ ទន្ទឹមនេះ បណ្តាប្រទេសអ៊ឺរ៉ុបបានចាប់ផ្តើមដាក់ចេញនូវវិធានការតឹងរ៉ឹងឡើងវិញ ដើម្បីទប់ទល់នឹងបំរែបំរួលថ្មីនេះ។
ជុំវិញបញ្ហានេះ លោក Suparat អនុប្រធានសហព័ន្ធឧស្សាហកម្មថៃ ក៏បានឱ្យដឹងដែរថា មេរោគអូមីក្រុងកំពុងរីករាលដាលយ៉ាងឆាប់រហ័សនៅក្នុងទ្វីបអឺរ៉ុប ប៉ុន្តែសហព័ន្ធឧស្សាហកម្មថៃមិនមានការព្រួយបារម្ភអំពីផលប៉ះពាល់ធ្ងន់ធ្ងរនោះទេ ដោយសារប្រទេសថៃមានការនាំចេញរថយន្ដត្រឹមតែ ១០% ប៉ុណ្ណោះទៅកាន់ទីផ្សារអឺរ៉ុប ខណៈដែលរថយន្តភាគច្រើនជាធម្មតាត្រូវបាននាំចេញទៅកាន់មជ្ឈិមបូព៌ា អូសេអានី និងបណ្តាប្រទេសអាស៊ីផ្សេងទៀតដែលមានចំណែកទីផ្សារដល់ទៅ ៥០% នៃការនាំចេញសរុប។
ត្បិតថាបែបនេះក្ដី ប៉ុន្ដែសហព័ន្ធឧស្សាហកម្មថៃ ក៏កំពុងតាមដានស្ថានភាពនាំចេញរថយន្ដទៅក្រៅប្រទេស ដើម្បីរៀបចំសម្រាប់ភាពមិនច្បាស់លាស់ណាមួយ ដែលបណ្តាលមកពីជំងឺរាតត្បាតនៅឆ្នាំ ២០២២ ក៏ដូចជាកង្វះខាតបន្ទះឈីបសកល ដែលនៅតែអូសបន្លាយ និងបង្កជាកង្វល់ចម្បងផងដែរ។ យ៉ាងណាមិញ ក្រុមហ៊ុនផលិតរថយន្តនៅទូទាំងពិភពលោកជាច្រើនទៀត ក៏មានការព្រួយបារម្ភដូចគ្នាដែរ អំពីការខ្វះខាតបន្ទះឈីប ដែលនឹងបង្កឱ្យដូចកាលពីអំឡុងពេលដើមឆ្នាំនេះដែរ ដូច្នេះពួកគេកំពុងកែសម្រួលផែនការអាជីវកម្មរបស់ពួកគេ ដើម្បីឆ្លើយតបទៅនឹងស្ថានភាពបច្ចុប្បន្ននេះ។
អត្ថបទគួរអាន
សូមជម្រាបថា យោងតាមសហព័ន្ធឧស្សាហកម្មថៃ បានឱ្យដឹងថា ចាប់ពីខែមករាដល់ខែវិច្ឆិកា ឆ្នាំ ២០២១នេះ ការនាំចេញរថយន្តរបស់ថៃបានកើនឡើងជិត ២៩% បើធៀបទៅនឹងឆ្នាំមុន កើនដល់ជិត ៨៦ម៉ឺនគ្រឿង ដែលមានតម្លៃសរុបជិត ១៥ពាន់លានដុល្លារអាមេរិក។
បើទោះបីជា ការនាំចេញមានការកើនឡើងនៅក្នុងឆ្នាំនេះក៏ពិតមែន ប៉ុន្ដែថៃ ក៏កំពុងប្រឈមនឹងបញ្ហាកូវីដ១៩កំពុងរាតត្បាតផងដែរ។ ទោះយ៉ាងណា សហព័ន្ធឧស្សាហកម្មថៃ មិនចង់ឱ្យរដ្ឋាភិបាលដាក់វិធានការបិទប្រទេសឡើងវិញ ដើម្បីប្រឆាំងនឹងមេរោគអូមីក្រុងនោះទេ ព្រោះថាការបិទប្រទេសកាលពីលើកមុនបានប៉ះពាល់ដល់ទំនុកចិត្ត និងអំណាចទិញរបស់អ្នកប្រើប្រាស់ផងដែរ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
