លោក Liz Truss ដែលទើបជាប់ឆ្នោតជានាយករដ្ឋមន្ត្រីអង់គ្លេស បាននិយាយថា កិច្ចព្រមព្រៀងឆ្លងសមុទ្រអាត្លង់ទិកមិនទាន់ជាបញ្ហាអាទិភាពមួយរបស់លោកស្រីនៅឡើយទេដែលវាមានភាពផ្ទុយស្រះទៅនឹងជំហររបស់អតីតនាយករដ្ឋមន្ត្រីអង់គ្លេសចំនួន ២ រូបមុន គឺលោក បូរីស ចនសុន និងលោកស្រី ថេរ៉េសា ម៉េយ៍ ដែលតែងតែផ្ដោតជាសំខាន់លើកិច្ចព្រមព្រៀងពាណិជ្ជកម្មសេរីជាមួយសហរដ្ឋអាមេរិក ព្រោះវាជាកិច្ចការដ៏សំខាន់មួយសម្រាប់ចក្រភពអង់គ្លេស ដែលបានចាកចេញពីសហភាពអឺរ៉ុប។
លោកស្រី Liz Truss បានប្រាប់អ្នកយកព័ត៌មាននៅលើយន្តហោះរបស់លោកស្រីឆ្ពោះទៅកាន់ទីក្រុងញូវយ៉ក ដើម្បីចូលរួមមហាសន្និបាតសហប្រជាជាតិថា បច្ចុប្បន្ននេះមិនទាន់មានការចរចាណាមួយកើតឡើងជាមួយសហរដ្ឋអាមេរិកនៅឡើយទេ ហើយលោកស្រីក៏មិនរំពឹងទុកថា វានឹងចាប់ផ្តើមឆាប់ៗនេះឬក៏យូរប៉ុន្មាននោះដែរ។
អត្ថបទគួរអាន
លោកស្រី ត្រាស បាននិយាយថា លោកស្រីកំពុងផ្តោតជាសំខាន់លើការទទួលបានភាពជាដៃគូពាណិជ្ជកម្មអន្តរប៉ាស៊ីហ្វិក និងកិច្ចព្រមព្រៀងពាណិជ្ជកម្មដ៏ទាក់ទាញជាមួយប្រទេសឥណ្ឌា និងក្រុមប្រឹក្សាសហប្រតិបត្តិការឈូងសមុទ្រពែក្សនៃបណ្ដាប្រទេសមួយចំនួនរួមទាំងអារ៉ាប៊ីសាអូឌីត និងប្រទេសកាតាផងដែរ។ កិច្ចព្រមព្រៀងទាំងនេះហើយគឺជាអាទិភាពពាណិជ្ជកម្មសម្រាប់ប្រទេសអង់គ្លេស។
ការមិនសូវផ្ដល់តម្លៃរបស់លោកស្រី Liz Truss ចំពោះពាណិជ្ជកម្មឆ្លងមហាសមុទ្រអាត្លង់ទិកនេះបានធ្វើឡើងនៅមុនពេលកិច្ចប្រជុំផ្ទាល់ជាលើកដំបូងរបស់លោកស្រីជាមួយប្រធានាធិបតីអាមេរិកគឺលោក ចូ បៃដិន ចាប់តាំងពីលោកស្រីបានឡើងកាន់តំណែងកាលពី២សប្តាហ៍មុន។ មេដឹកនាំទាំង២រូបនេះត្រូវជួបគ្នានៅថ្ងៃទី ២១ ខែកញ្ញានៅខាងក្រៅមហាសន្និបាតអង្គការសហប្រជាជាតិនៅទីក្រុងញូវយ៉កសហរដ្ឋអាមេរិក។
លោកស្រី ត្រាស បាននិយាយថា របៀបវារៈសំខាន់ដែលលោកស្រីគ្រោងនឹងយកទៅជជែកគ្នាក្នុងកិច្ចប្រជុំជាមួយលោក បៃដិន នេះគឺ«ការធ្វើឱ្យប្រាកដថា ពួកគេអាចដោះស្រាយរួមគ្នាចំពោះការឈ្លានពានរបស់រុស្ស៊ី លើអ៊ុយក្រែន និងការធានាបានថា ពួកគេមិនពឹងផ្អែកជាយុទ្ធសាស្ត្រលើរបបផ្តាច់ការណាមួយឡើយ»៕
អត្ថបទ៖ សុខ ជា
