នាយកដ្ឋានការងារអាមេរិក បានគូសបញ្ជាក់ថា ការដាក់ពាក្យស្នើសុំទាមទារសំណងធានារ៉ាប់រងការងារ បានកើនដល់ ១លាន ៤សែនឯកសារ ក្នុងមួយសប្តាហ៍ កាលពីសប្តាហ៍ទី ៣ នៃខែមិថុនានេះ ហើយប្រជាពលរដ្ឋអាមេរិក ជាច្រើនលាននាក់ នៅតែបន្តប្រមូលសំណងធានារ៉ាប់រងការងារ ច្រើនជាងមួយលើក បើទោះបីជា អាជីវកម្មជាច្រើន ចាប់ផ្តើមបើកដំណើរការឡើងវិញក៏ដោយ។
សេដ្ឋវិទូ មកពីក្រុមហ៊ុន PNC Financial បានពន្យល់ថា ស្របពេលដែលមានក្រុមហ៊ុនជាច្រើន ប្រកាសស្វែងរកបុគ្គលិក ក៏មានក្រុមហ៊ុនដទៃទៀត រក្សាទុកនូវកំលាំងពលកម្មរបស់ពួកគេ និងរង់ចាំមើលសភាពការណ៍ជាក់ស្តែង ក៏ប៉ុន្តែ ក្រោយពេលដែល សេដ្ឋកិច្ចបើកដំណើរការឡើងវិញ តម្រូវការប្រើប្រាស់របស់ ប្រជាពលរដ្ឋ នៅទន់ខ្សោយនៅឡើយ ជាហេតុដែលក្រុមហ៊ុនទាំងអស់នោះ សម្រេច កាត់បន្ថយការងារអស់ជាច្រើន បន្ថែមទៀតដែរ។
អត្ថបទទាក់ទង!
គ្រប់វិស័យទាំងអស់ រួមមានទាំងឧស្សាហកម្មផលិត វិស័យដឹកជញ្ជូន ការលក់ដុំ និងរាយ និងវិស័យបដិសណ្ឋាកិច្ចជាដើម សុទ្ធតែរៀបចំហេដ្ឋារចនាសម្ព័ន្ធអាជីវកម្មឡើងវិញដើម្បីសម្របខ្លួនទៅតាម បរិយកាសដែលកំពុងផ្លាស់ប្តូរយ៉ាងឆាប់រហ័សនេះ ក្នុងនោះក៏មានការសម្រេចកាត់បន្ថយបុគ្គលិក និងប្រកាសក្ស័យធនផងដែរ។
សូមជម្រាបដែរថា ករណីឆ្លងមេរោគកូវីដ១៩ ដែលកំពុងផ្ទុះឡើងខ្លាំង ជាច្រើនកន្លែង នៅក្នុងសហរដ្ឋអាមេរិក ក៏ជាកត្តាអវិជ្ជមានមួយ ដែលប៉ះពាល់ដល់ អត្រាការងារ បន្ថែមទៀត ព្រោះប្រជាពលរដ្ឋ ពុំហ៊ានធ្វើដំណើរទៅខាងក្រៅ ឬចូលញ៉ាំអាហារនៅក្រៅផ្ទះ នោះឡើយ។
បើតាមទិន្នន័យរបស់ នាយកដ្ឋានពាណិជ្ជកម្មអាមេរិក បានបង្ហាញថា ផលិតផលក្នុងស្រុកសរុប របស់អាមេរិក ក្នុងត្រីមាសទី ១ ដើមឆ្នាំ ២០២០ មានការធ្លាក់ចុះ ៥% ដោយក្នុងនោះ ការចំណាយរបស់ប្រជាពលរដ្ឋអាមេរិក ដែលជាផ្នែកមួយសំខាន់បំផុត និងកាន់កាប់ ៧០% នៃ GDP សរុប គឺថា មានការធ្លាក់ចុះដល់ទៅ ៦.៨%។
ទោះយ៉ាងណា ការព្យាករណ៍ពី កំណើនសេដ្ឋកិច្ចអាមេរិក នៅត្រីមាសទី ២ នឹងប្រកាសនៅដំណាច់ខែមិថុនា នេះ ក៏ប៉ុន្តែសេដ្ឋកិច្ចវិទូ បានព្រមានរួចហើយថា សេដ្ឋកិច្ចអាមេរិក នឹងបន្តធ្លាក់ចុះទៀត នៅក្នុងត្រីមាសទី ២ ឆ្នាំនេះ។
គួរបញ្ជាក់ដែរថា ចំនួនប្រជាពលរដ្ឋអាមេរិក ដែលបានដាក់ពាក្យស្នើសុំសំណងធានារ៉ាប់រងការងារ ជាលើកដំបូងបង្អស់របស់ពួកគេ បានកើនឡើងលើស ១លាននាក់ ជារៀងរាល់សប្តាហ៍ ដោយវាបានកើតមានឡើង ១៤សប្តាហ៍ជាប់ៗគ្នាហើយ ខណៈពាក្យស្នើសុំទាំងអស់ បានកើនដល់ ៤៧លានឯកសារ៕
None
