នាយកគ្រប់គ្រងនៃក្រុមហ៊ុន WorldBridge Homes លោក យក់ សុធីរិទ្ធ បានប្រាប់ខេមបូណូមីសថា នៅមិនយូរទៀត ក្នុងទីក្រុងរណបសិរីមង្គលនឹងមានហ្សបហោសន៍(ផ្ទះអាជីវកម្ម)ប្រមាណជិត១០០ខ្នង ដើម្បីធ្វើឲ្យទីក្រុងរណបមួយនេះកាន់តែមានលក្ខណៈគ្រប់គ្រាន់ក្នុងការបំពេញតម្រូវការរស់នៅរបស់ប្រជាពលរដ្ឋក្នុងសហគមន៍នេះ។
លោក យក់ សុធីរិទ្ធ បានប្រាប់ថា « កន្លែងរបស់យើងនេះ ជាក្រុងរណបសិរីមង្គល អញ្ចឹងជាតំបន់មួយដែលយើងផ្តល់ភាពងាយស្រួលដល់ការរស់នៅរបស់ពួកគាត់ អញ្ចឹងយើងអត់អាចមានតែផ្ទះ ដែលគាត់រស់នៅទេ គឺត្រូវមានផ្ទះដែលគាត់អាចប្រកបរបរអាជីវកម្មបាន ហើយនឹងផ្សារសហគមន៍ ក៏ដូចជាសាលាមតេយ្យ អាហ្នឹងគឺនៅក្នុងគម្រោងយើងទាំងអស់»។
លោក យក់ សុធីរិទ្ធ បានបន្តថា «គម្រោងរបស់យើង យើងមានចំនួន៨៨ផ្ទះអាជីវកម្ម គឺធ្វើនៅជិតផ្សារសហគមន៍តែម្តង ដោយនឹងចាប់ផ្តើមសាងសង់នៅក្នុងឆ្នាំនេះ»។ បែបនេះក្តី លោកបានបន្ថែមថា គម្រោងហ្សបហោសន៍(ផ្ទះអាជីវកម្ម) បានចាបផ្តើមទទួលបានការកក់បិទទីតាំងជាបណ្តើរៗហើយ ចាប់តាំងពីដើមខែមិថុនាមក ។
អត្ថបទទាក់ទង!
បើតាមលោកនាយកគ្រប់គ្រងនៃក្រុមហ៊ុន WorldBridge Group នៅពេលដែលជំងឺកូវីដ-១៩ បានធូរស្រាលបន្តិច ក្រុមហ៊ុននឹងសម្ពោធបើកការដ្ឋានសាងសង់តំបន់សហគ្រាសខ្នាតតូចនិងមធ្យម ដែលនៅជាប់នឹងក្រុងរណបសិរីមង្គលតែម្តង ដើម្បីអាចផ្តល់ការងារដល់ពលរដ្ឋរស់នៅក្នុងតំបន់នេះ។
គូសបញ្ជាក់ថា គម្រោងទីក្រុងរណបសិរីមង្គល ជាគម្រោងលំនៅឋានតម្លៃសមរម្យធំជាងគេនិងទីមួយក្នុងព្រះរាជាណាចក្រកម្ពុជា ដែលបានទទួលការគាំទ្រពីក្រសួងរៀបចំដែនដី នគរូបនីយកម្ម និងសំណង់។
គម្រោងនេះ មានលំនៅឋានសរុបចំនួន ២.៤៥៧ផ្ទះ សាងសង់នៅលើផ្ទៃដី ២៣ហិតា ស្ថិតនៅលើផ្លូវជាតិលេខ ២១ ក្នុងសង្កាត់កោះគរ ក្រុងតាខ្មៅ ខេត្តកណ្តាល។ នៅក្នុងគម្រោងនេះ មានផ្សារឯកជន សាលារៀនឯកជន ផ្ទះល្វែងអាជីវកម្ម សួនច្បារធំៗ ចំណតឡានសាធារណ: ដែលជាសហគមន៍ធំមួយមានប្រជាពលរដ្ឋរស់នៅជាង១០.០០០នាក់។
លំនៅឋានតម្លៃសមរម្យក្នុងទីក្រុងរណបសិរីមង្គល
បើតាមបុគ្គលិកគ្រប់គ្រងផ្នែកទីផ្សារនៃក្រុមហ៊ុន Worldbridge Homes លំនៅឋានទីក្រុងរណបសិរីមង្គល នៅតែបន្តការលក់ដោយផ្តល់ជូននូវលក្ខខណ្ឌបង់រំលស់សុទ្ធ គ្មានប្រាក់កក់មុន គ្មានការប្រាក់២៤ខែ ព្រមទាំងមានដៃគូធនាគារផ្តល់កម្ចីរហូតដល់៩០%និងរយ:ពេល២០ឆ្នាំ៕
None
