លោក ស៊ី ជិនពីង ក៏បានបង្ហើបពីបំណងគិតគូរចង់ទៅបំពេញទស្សនកិច្ចនៅកូរ៉េខាងត្បូងដែរ ក្រោយខកខានជាង៩ឆ្នាំ។ ការបង្ហាញពីជំហរសហការរបស់ចិននេះ កើតឡើងចំពេលដែលតានតឹងកើនឡើងជុំវិញបញ្ហារុស្ស៊ី កូរ៉េខាងជើង និងឥទ្ធិពលរបស់អាមេរិក។ នេះបើតាមការចុះផ្សាយដោយសារព័ត៌មានអន្តរជាតិធំៗ។
តាមការរាយការណ៍ដោយទូរទស្សន៍រដ្ឋចិន CCTV កាលពីថ្ងៃសៅរិ៍ លោក ស៊ី ជិនពីង ប្រធានាធិបតីចិនបានជួបលោក Han Duck-soo នាយករដ្ឋមន្ត្រីកូរ៉េខាងត្បូងនៅទីក្រុង Hangzhou ភាគខាងកើតប្រទេសចិន មុនពិធីបើកការប្រកួតកីឡាអាស៊ីប្រចាំឆ្នាំ២០២៣ នៅទីនោះ។ ខណៈសារព័ត៌មាន Yonhab របស់កូរ៉េខាងត្បូងបានរាយការណ៍ពីជំនួបនោះដែរថា លោក ស៊ី ជិនពីង នឹងពិចារណាធ្វើទស្សនកិច្ចនៅកូរ៉េខាងត្បូងនាពេលខាងមុខ ដើម្បីលើកកម្ពស់សន្តិភាព និងសន្តិសុខនៅឧបទ្វីបកូរ៉េ។
អត្ថបទគួរអាន
មែនទែនទៅ ការប្តេជ្ញាចិត្តរបស់ចិននេះបានកើតឡើង មុនពេលដែលកិច្ចប្រជុំដែលបានគ្រោងទុកត្រៀមរៀបចំឡើងនៅថ្ងៃទី២៦ ខែកញ្ញា នេះ នៅទីក្រុងសេអ៊ូលដោយមានការចូលរួមពីមន្ត្រីជាន់ខ្ពស់មកពីប្រទេសចិន ជប៉ុន និងកូរ៉េខាងត្បូង។ កិច្ចប្រជុំត្រីភាគីនេះបានខកខានអស់ពេលជាង៤ឆ្នាំមកហើយ ចំពេលេដែលភាពតានតឹងនៅប្រទេសអាស៊ីបូព៌ាទាំងបីកើនឡើងខ្លាំង ជុំវិញដំណើរទស្សនកិច្ចលោក គីម ជុងអ៊ុន ទៅរុស្ស៊ីកាលពីដើមខែនេះដែលបានធ្វើឱ្យសម្ព័ន្ធមិត្តកូរ៉េខាងត្បូង ជប៉ុន និងសហរដ្ឋអាមេរិកខឹងសម្បារ។
យ៉ាងណាក៏ដោយ នៅក្នុងជំនួបកាលពីថ្ងៃសៅរិ៍នោះ លោក ស៊ី ជិនពីង បានប្រាប់សមភាគីកូរ៉េអំពីសារៈសំខាន់នៃទំនាក់ទំនងចិន-កូរ៉េខាងត្បូង ក្នុងការរក្សាកិច្ចសហប្រតិបត្តិការត្រង់ទៅត្រង់មក និងផលប្រយោជន៍រួម។ ប្រធាធិបតីចិនបានលើកឡើងថា ចិនគាំទ្រឱ្យកូរ៉េទាំងពីរពិភាក្សាគ្នាដោយស្រុះស្រួល និងបន្តរក្សាសន្តិភាព និងស្ថិរភាពឧបទ្វីបកូរ៉េ។ ខណៈលោក ហាន ស្នើឱ្យចិនដើរតួនាទីស្ថាបនាក្នុងទំនាក់ទំនងជាមួយកូរ៉េខាងជើង។ ក្រសួងការបរទេសកូរ៉េខាងត្បូងបាននិយាយកាលពីថ្ងៃព្រហស្បតិ៍ថា កូរ៉េខាងត្បូងបានដាក់ទណ្ឌកម្មលើបុគ្គលចំនួន១០រូប និងក្រុមហ៊ុនចំនួន២ ទាក់ទងនឹងកម្មវិធីនុយក្លេអ៊ែរ និងពាណិជ្ជកម្មអាវុធរបស់កូរ៉េខាងជើង ដែលក្នុងនោះក៏មានការចូលរួមពីសំណាក់ចិន និងរុស្ស៊ីដែរ៕
