វិធី៦យ៉ាងដើម្បីដោះស្រាយរឿងកូនតូចរពឹសឬស្តីមិនស្តាប់!
តើលោកអ្នកតែងតែឈឺក្បាលជាមួយកូនតូចដ៏រពឹសរបស់លោកអ្នកមែនទេ? តើលោកអ្នកមានវិធីសាស្ត្របែបណាក្នុងការដោះស្រាយនៅពេលដែលគេធ្វើអ្វី មួយដែលអ្នក មិនចង…
អ្នកខ្លះអាយុទើបតែ ១៥ ឬ ១៦ឆ្នាំ ក៏ប្រែជាមានឫកពារចាស់ទុំ ឯអ្នកខ្លះវិញ វ័យសាមប្លាយ ឬសែប្លាយហើយ នៅតែមានចរិតដូចក្មេងដដែល។ ខាងក្រោមនេះ គឺជាលក្ខណៈ ៨យ៉ាង ដែលបង្ហាញពីភាពខុសគ្នារវាងបុរសដែលមានឫកពារចាស់ចិត្តចាស់គំនិត និងបុរសដែលមិនទាន់ចាស់ចិត្តចាស់គំនិត។
បុរសពិតមិនរិះគន់រូបសម្បត្តិនារីជាដាច់ខាត !
«ហេតុអ្វីអូនមិនលាបពណ៌សក់ជាពណ៌ទង់ដែង ?» «បើអូនឯងរៀងស្គមជាងនេះបន្តិចប្រាកដជាស្អាត !» បុរសដែលស្រលាញ់អ្នកពិតប្រាកដនឹងមិននិយាយបែបនេះអំពីរូបសម្បត្តិរបស់អ្នកឡើយ ! គាត់និយាយបែបនេះ គឺគាត់មិនមែនកំពុងព្យាយាមជួយអ្នកឡើយ ប៉ុន្តែ ផ្ទុយទៅវិញ គាត់កំពុងធ្វើឲ្យអ្នកគិតថា អ្នកនៅមានចំណុចខ្វះខាត ដូច្នេះមិនអាចចាកចេញពីគាត់បានទេ។ បុរសចាស់ចិត្តចាស់គំនិត គឺមិនរិះគន់ដៃគូដើម្បីចង់បង្ហាញថាខ្លួនគាត់គ្រាន់បើជាងឡើយ។
(https://pixabay.com)
បុរសចាស់ចិត្តចាស់គំនិត នឹងមិនរំលោភភាពឯកជនរបស់អ្នកឡើយ !
ប្រសិនបើអ្នកមានទំនាក់ទំនងល្អ អ្នកមិនចាំបាច់ត្រូវលាក់បាំងអ្វីពីគ្នាទៅវិញទៅមកទេ ទោះជាសារតាមហ្វេសប៊ុកក្ដី ឬសារក្នុងទូរស័ព្ទក្ដី។ ប៉ុន្តែ នេះមិនមែនមានន័យថា ដៃគូរបស់អ្នកអាចលូកហោប៉ៅរបស់អ្នក ឬអានសារផ្ទាល់ខ្លួនរបស់អ្នកបាននោះទេ។ ធ្វើបែបនេះ វាបង្ហាញថា បុរសជាដៃគូរបស់អ្នកមានចិត្តសង្ស័យ និងខ្វះការគោរពចំពោះរូបអ្នក។
បុរសពិតមិនរត់គេចពីការលំបាក
កាលយើងនៅពីក្មេង យើងចូលចិត្តសម្ងំនៅម្នាក់ឯងនៅពេលជួបការលំបាក។ ប៉ុន្តែ ជាបុរសពិតដែលមានចិត្តគំនិតចាស់ទុំ គាត់ប្រាកដជាដឹងច្បាស់ថា វិធីដែលល្អបំផុតដើម្បីដោះស្រាយបញ្ហាណាមួយ ទោះជាបញ្ហាផ្ទាល់ខ្លួនក្ដី បញ្ហាគ្រួសារក្ដី ឬបញ្ហាការងារក្ដី គឺប្រឈមនឹងបញ្ហានោះ មិនមែនរត់គេចចេញពីវាឡើយ។ ប៉ុន្តែ នេះមិនមែនបានន័យថា រូបគាត់ចូលចិត្តរត់រកបញ្ហានោះទេ។ បុរសដែលមានគំនិតចាស់ទុំដឹងថា ពេលណាត្រូវដោះស្រាយបញ្ហា និងពេលណាត្រូវជៀសវាងការឈ្លោះប្រកែក។
បុរសមានភាពចាស់ទុំមិនគិតថា ការបង្ហាញមនោសញ្ចេតនាជាសញ្ញានៃភាពទន់ជ្រាយនោះទេ !
ធ្វើជាបុរសពិតមិនមែនបានន័យថា ត្រូវតែចេះទប់អារម្មណ៍ មិនចេះសើចយំនោះទេ។ បុរសពិត មិនខ្លាចអ្នកណារិះគន់ចំពោះការចេះបង្ហាញអារម្មណ៍ និងភាពទន់ភ្លន់ ឬរ៉ូមែនទិកឡើយ។ រូបគេដឹងថា គ្រាន់តែបង្ហាញមនោសញ្ចេតនា (អារម្មណ៍) មិនធ្វើឲ្យបាត់បង់ភាពជាបុរសទេ ប៉ុន្តែ ផ្ទុយទៅវិញ វាជាផ្នែកមួយនៃការកសាងនូវទំនាក់ទំនងដ៏ល្អមួយ។
បុរសចាស់ចិត្តចាស់គំនិតមិនមែនគិតតែថ្ងៃនេះប៉ុណ្ណោះនោះទេ !
មនុស្សប្រុសខ្លះអាចចាយលុយផឹកស៊ីនៅហាងថ្លៃមួយយប់អស់ប្រាក់រលីង ដោយមិនគិតខ្វល់ពីផលវិបាកឡើយ។ ឬបុរសខ្លះទៀតជប់លៀងផឹកស៊ីកពាក់កណ្ដាលសប្ដាហ៍ រួចហើយសុំច្បាប់សម្រាកពីការងារនៅថ្ងៃបន្ទាប់។ មនុស្សប្រុសទាំងនេះហាក់មិនខ្វល់ធ្វើផែនការអនាគត ឬគិតគូរពីថ្ងៃស្អែកឡើយ។ និយាយបែបនេះមិនមែនបានន័យថា មនុស្សប្រុសមិនត្រូវសប្បាយសោះនោះទេ ប៉ុន្តែ ធ្វើអ្វីក៏ដោយក៏គួរតែគិតពីផលវិបាក ឬគិតពីអនាគតផង។
(https://pixabay.com)
បុរសពិតមិនធ្វើឲ្យអ្នកមានអារម្មណ៍ថាអ្នកសំខាន់តិចជាងមិត្តភក្ដិរបស់គាត់ទេ
ម្ដងម្កាល មនុស្សប្រុសត្រូវការចេញក្រៅជាមួយមិត្តភក្ដិ និងសប្បាយបែបមនុស្សប្រុស។ ប៉ុន្តែ បុរសដែលឆ្លាតវៃនឹងមិនធ្វើឲ្យភរិយា ឬដៃគូស្នេហារបស់ខ្លួនមានអារម្មណ៍ថា មិនសំខាន់ស្មើនឹងមិត្តភក្ដិរបស់ខ្លួនឡើយ។ បុរសចាស់ចិត្តចាស់គំនិត គឺមិនស្ដាប់តែយោបល់មិត្តភក្ដិ និងមិនស្ដាប់យោបល់របស់មនុស្សជាទីស្រលាញ់របស់ខ្លួននោះទេ។
បុរសមានភាពចាស់ទុំ គឺតែងមានទំនាក់ទំនងល្អជាមួយម្ដាយ
បុរសចាស់ទុំចិត្តគំនិត តែងតែផ្ដល់ពេលវេលាខ្លះសម្រាប់ឪពុកម្ដាយ។ គាត់យល់ថា ការចំណាយពេលមើលថែទាំអ្នកដែលបានថែទាំគាត់ជាច្រើនឆ្នាំង គឺជាកិច្ចការសំខាន់។ ប៉ុន្តែ គាត់ក៏ធ្វើមិនឲ្យហួសព្រំដែនដែរ នៅពេលឪពុក ឬម្ដាយ (ជាធម្មតា គឺម្ដាយ) ចាប់ផ្ដើមគ្រប់គ្រងរូបគាត់ ខែងរែងមិនឲ្យរវល់ជាមួយអ្នកដទៃទាំងអស់។
បុរសចាស់ទុំមានការគោរពចំពោះអ្នកនិងមិនវាយ ឬប្រមាថអ្នកឡើយ
អំពើហិង្សាគឺរាប់ទាំងផ្លូវកាយ និងផ្លូវចិត្ត។ ប្រសិនបើអ្នកទទួលរងអំពើហិង្សាពីដៃគូ ឬស្វាមីរបស់អ្នក អ្នកត្រូវចាកចេញពីបុរសនោះភ្លាម ! បុរសដែលចាស់ចិត្តចាស់គំនិត គឺមិនវាយស្ត្រីជាដាច់ខាត ទោះបីរូបគេខឹងខ្លាំងយ៉ាងណាក៏ដោយ។
សរុបមក ទង្វើរបស់បុរសចំពោះស្ត្រីមិនមែនអាស្រ័យលើអត្តចរិតរបស់គាត់តែមួយមុខទេ ប៉ុន្តែ វាក៏អាស្រ័យលើឥរិយាបថរបស់ស្ត្រីផងដែរ។ ទំនាក់ទំនងល្អ គឺជាលទ្ធផលនៃការខិតខំប្រឹងប្រែងរបស់មនុស្សពីរនាក់ ហើយស្ត្រីក៏ត្រូវតែជៀសវាងកំហុសមួយចំនួនដូចគ្នាដែរ ដើម្បីរស់នៅចុះសម្រុងមានសុភមង្គលជាមួយស្វាមី ឬដៃគូស្នេហារបស់ខ្លួន៕
