មូលធនីយកម្មទីផ្សាររបស់ អាលីបាបា បានកើនឡើងដល់ ៨៤៦ ពាន់លានដុល្លារ នៅចុងខែតុលា ឆ្នាំ ២០២០ ប៉ុន្តែចាប់តាំងពីពេលនោះមក វាបានធ្លាក់ចុះមកត្រឹមតែ ៣៥៨ ពាន់លានដុល្លារប៉ុណ្ណោះ។ ទន្ទឹមនេះ តម្លៃភាគហ៊ុន របស់ក្រុមហ៊ុន Ant Group ក៏បានធ្លាក់ចុះពី ៣០០ ពាន់លានដុល្លារមកនូវក្រោម ២០០ ពាន់លានដុល្លារកាលផងដែរពីឆ្នាំមុន។
ប្រធានផ្នែកហិរញ្ញវត្ថុអាលីបាបា លោក មេហ្គី វូ (Maggie Wu) បានធ្វើឱ្យមានការភ្ញាក់ផ្អើលយ៉ាងខ្លាំងដល់អ្នកវិភាគជាច្រើន ដោយលោកបាននិយាយថា កំណើនប្រាក់ចំណូលអាលីបាបាត្រូវបានព្យាកថានឹងថយចុះមកនៅត្រឹម ១១% ទៅ ១៦% នៅក្នុងឆមាសទី ២ នៃឆ្នាំសារពើពន្ធឆ្នាំនេះ ពោលគឺធ្លាក់ចុះពី កំណើន ៤១% សម្រាប់ឆ្នាំសារពើពន្ធមុន។
អត្ថបទគួរអាន
នៅក្នុងឆ្នាំ ២០២០ ការរំពឹងទុកទីផ្សារសម្រាប់ក្រុមហ៊ុន អាលីបាបា គឺខ្ពស់ជាងពេលណាៗទាំងអស់ ដោយសារកាលនោះ មានការរំពឹងទុកខ្លាំងលើការបោះផ្សាយលក់មូលបត្ររបស់ក្រុមហ៊ុន Ant Group ក៏ដូចជាការជំរុញឱ្យមានតម្រូវការទិញទំនិញតាមអ៊ីនធឺណិតផងដែរ។ ប៉ុន្តែ មួយឆ្នាំក្រោយមក តម្រូវការទីផ្សារសំខាន់ៗរបស់ក្រុមហ៊ុននេះបានចុះខ្សោយ ក្រោយពេលដែលការបោះផ្សាយលក់មូលបត្ររបស់ក្រុមហ៊ុន Ant Group ត្រូវបានហាមឃាត់ដោយរដ្ឋចិន។ លើសពីនេះទៅទៀត ប្រាក់ចំណេញប្រតិបត្តិការសម្រាប់ផ្នែកពាណិជ្ជកម្មរបស់អាលីបាបា ក៏បានធ្លាក់ចុះ ១៧% ក្នុងត្រីមាសមុន បើធៀបនឹងរយៈពេលដូចគ្នាកាលពីឆ្នាំមុន ដែលវាបានបង្ហាញពីភាពទន់ខ្សោយនៅក្នុងអាជីវកម្មអេឡិចត្រូនិច ដែលជាអាជីវកម្មស្នូលរបស់ក្រុមហ៊ុននេះ ។
តែយ៉ាងណាមិញ ក្រុមហ៊ុន អាលីបាបា បានរាយការណ៍ពីការលក់ ទំនិញប្រចាំឆ្នាំ នៅថ្ងៃ Singles Day បានកើនឡើងដល់ ៨៤ ពាន់លានដុល្លារ កើនឡើងត្រឹមតែ ៨,៥%ប៉ុណ្ណោះ ខណៈឆ្នាំមុនធ្លាប់មានកំណើន២៦% ដែលជាកំណើនយឺតបំផុតមិនធ្លាប់មាន។ នេះបើយោងតាមការចុះផ្សាយដោយសារព័ត៌មានរ៉យទ័រ៕
អត្ថបទ ស៊ើង និមល់
None
