បើតាមការសិក្សាររបស់មជ្ឈមណ្ឌលវេជ្ជសាស្ត្រ Sheba បានឱ្យដឹងថា រយៈពេលមួយសប្តាហ៍បន្ទាប់ពីចាក់ដូសទី៤ហើយ មជ្ឈមណ្ឌលនេះអាចវាយតម្លៃបានថាការចាក់លើកទី ៤ គឺមានសុវត្ថិភាពសម្រាប់សុខភាពរបស់មនុស្ស។ ហើយបើតាមការសិក្សាដដែលនេះ នាយករដ្ឋមន្រ្តីអ៊ីស្រាអែលក៏បាននិយាយដែរថា ប្រសិទ្ធភាពនៃការចាក់វ៉ាក់សាំងដូសទី៤នេះ នឹងជួយកាត់បន្ថយការព្រួយបារម្ភអំពីការឆ្លងមេរោគ ការចូលមន្ទីរពេទ្យ និងរោគសញ្ញាធ្ងន់ធ្ងរដែលបណ្ដាលមកពីកូវីដ១៩ផងដែរ។
សូមជម្រាបថា អ៊ីស្រាអែលបានដើរមុនគេក្នុងការសិក្សាពីផលប៉ះពាល់នៃការចាក់វ៉ាក់សាំងកូវីដ១៩ដូសទី៤ ហើយក៏ជាប្រទេសនេះ គឺជាប្រទេសបានចាក់វ៉ាក់សាំងបានលឿនបំផុតសម្រាប់ប្រជាជនរបស់ខ្លួនកាលពីឆ្នាំមុន ផងដែរ។ បច្ចុប្បន្ននេះ អ៊ីស្រាអែលកំពុងចាប់ផ្ដើមយុទ្ធនាការចាក់ដូសទី ៤ ដល់មនុស្សដែលមានអាយុលើសពី ៦០ ឆ្នាំ បុគ្គលិកសុខាភិបាល អ្នកមានភាពស៊ាំចុះខ្សោយ និងមនុស្សចាស់នៅមណ្ឌលថែទាំថែមទៀតផង។
អត្ថបទគួរអាន
ទន្ទឹមនេះ សម្រាប់ក្រុមដាច់ដោយឡែកមួយផ្សេងទៀត ក៏ត្រូវបានកំណត់ឱ្យទទួលបានការចាក់វ៉ាក់សាំងប្រភេទ Moderna សម្រាប់ដូសទី ៤ នៅសប្តាហ៍នេះដែរ។
គួរបញ្ជាក់ថា ការចាក់ដូសទី៤នេះ មានផលប៉ះពាល់កម្រិតស្រាល មិនខុសពីការចាក់ដូសទីបីនោះទេ ដោយខ្លះការឈឺចាប់បន្តិចបន្តួចនៅមុខម្ជុល ខ្លះគ្រុនក្តៅ និងឈឺក្បាល។
យ៉ាងណាមិញ នៅក្នុងប្រទេសអ៊ីស្រាអែល រហូតមកដល់ពេលនេះការឆ្លងប្រចាំថ្ងៃបានកើនឡើងច្រើនជាង ១០ ដងក្នុងរយៈពេលមួយខែកន្លងមកនេះ។ ជាក់ស្ដែង ការឆ្លងថ្មីជាមធ្យមក្នុងមួយថ្ងៃៗមានប្រមាណជាង ៥ពាន់ ៦រយ ករណី ដែលធ្វើឱ្យចំនួនឆ្លងសរុបកើនដល់ជាង ១លាន ៤សែននាក់ និងស្លាប់សរុបមានជាង៨ពាន់នាក់។ ដោយឡែក ការចាក់វ៉ាក់សាំងដូសទី២វិញ អ៊ីស្រាអែលបានចាក់ជូនប្រជាជនប្រហែល ៦៥% នៃប្រជាជនសរុប ខណៈដូសទី៣ចាក់បានប្រមាណ៤៧%ហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
