អ្នកជំនាញ សេដ្ឋកិច្ច យល់ឃើញថា គម្រោងផ្លូវល្បឿនលឿន ភ្នំពេញ-ក្រុងព្រះសីហនុ គឺជាសរសៃឈាមសេដ្ឋកិច្ចដ៏សំខាន់ ក្នុងការជំរុញកំណើនសេដ្ឋកិច្ចកម្ពុជា និងអាចទាក់ទាញអ្នកវិនិយោគបន្ថែមឱ្យចូលមកវិនិយោគនៅកម្ពុជា ក្រោយគម្រោងនេះបានបញ្ចប់ការសាងសង់ជាស្ថាពរ។
អ្នកជំនាញក្នុងវិស័យសេដ្ឋកិច្ច មានភាពជឿជាក់ខ្ពស់ ចំពោះគម្រោងផ្លូវល្បឿនលឿន ភ្នំពេញ-ក្រុងព្រះសីហនុ ដែលគ្រោងនឹងបញ្ចប់នៅឆ្នាំ២០២៣ ខាងមុខថា វានឹងផ្ដល់នូវអត្ថប្រយោជន៍ផ្នែកសេដ្ឋកិច្ចយ៉ាងសំខាន់ក្នុងការជំរុញកំណើនសេដ្ឋកិច្ច-ពាណិជ្ជកម្ម និងការវិនិយោគ។
លោក ហុង វណ្ណៈ អ្នកវិភាគសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានគូសបញ្ជាក់ថា គម្រោងផ្លូវល្បឿនលឿន ភ្នំពេញ-ក្រុងព្រះសីហនុ គឺជាផ្លូវដង្ហើមនៃសេដ្ឋកិច្ចដ៏សំខាន់សម្រាប់កម្ពុជា ព្រោះជាផ្លូវដឹកជញ្ជូនទំនិញដ៏សំខាន់ពីភ្នំពេញ ទៅកាន់កំពង់ផែ ខេត្តព្រះសីហនុ។
អត្ថបទគួរអាន
បើតាមលោក ហុង វណ្ណៈ បានគូសបញ្ជាក់ប្រាប់សារព័ត៌មានឌីជីថលខេមបូណូមីសថា គម្រោងខាងនេះមិនត្រឹមតែសម្រួលដល់ដំណើរការដឹកជញ្ជូនទំនិញពីភ្នំពេញ ទៅកំពង់ផែ ខេត្តព្រះសីហនុ ប៉ុណ្ណោះទេ ថែមទាំងដោះស្រាយលើបញ្ហាដឹកជញ្ជូនផលិតផលកសិកម្មទៀតផង។ លោកក៏បានបន្តទៀតថា ការរីកចម្រើនផ្នែកហេដ្ឋារចនាសម្ព័ន្ធ បង្ហាញពីភាពរីកចម្រើនរបស់ប្រទេស ហើយការសម្រេចបាននូវសមិទ្ធិផលដ៏ធំនេះ នឹងជាផ្នែកមួយដែលង្កើននូវទំនុកចិត្តដល់វិនិយោគគិនបរទេសឱ្យចូលមកវិនិយោគនៅប្រទេសកម្ពុជាផងដែរ។
ដោយឡែក ជុំវិញស្ថានភាពនៃសេដ្ឋកិច្ចកម្ពុជា នាពេលបច្ចុប្បន្ន ត្រូវបាន លោក ហុង វណ្ណៈ បានគូសបញ្ជាក់ថា កាន់តែមានភាពប្រសើរឡើង ក្រោយរដ្ឋាភិបាលសម្រេចបើកប្រទេសឡើងវិញ ហើយលោកក៏មានក្ដីរំពឹងខ្ពស់ ដែរថា នៅឆ្នាំបន្ទាប់សេដ្ឋកិច្ចកម្ពុជា នឹងស្ទុះងើបឡើងក្នុងកម្រិត ប្រសើរជាងឆ្នាំនៅ២០២១ ដោយសារតែកម្ពុជា បានចាក់វ៉ាក់សាំងកូវីដ១៩ ជូនពលរដ្ឋរបស់ខ្លួន លើសផែនការកំណត់ ដោយមិនចាំបាច់ព្រួយបារម្ភខ្លាំងនឹងជំងឺកូវីដ១៩។
សូមបញ្ជាក់ថា គម្រោងផ្លូវល្បឿនលឿន ភ្នំពេញ-ក្រុងព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវរបៀងយុទ្ធសាស្ត្រសំខាន់បំផុតនៅកម្ពុជា ដែលជួយកាត់បន្ថយពេលវេលាដំណើរ ពីរាជធានីភ្នំពេញ ទៅកំពង់ផែសមុទ្រក្រុងព្រះសីហនុ ពីរយៈពេល៥ម៉ោង មកត្រឹម២ ម៉ោង និងជួយកាត់បន្ថយថ្លៃដឹកជញ្ជូន ទៀតផង។ គម្រោងនេះ ឆ្លងកាត់ ខេត្តកំពង់ស្ពឺ កោះកុង និងព្រះសីហនុ ដែលគ្រោងចំណាយថវិកាប្រមាណ ២ពាន់លានដុល្លារ ប្រើរយៈពេល ៤៨ខែ លើការសាងសង់ និងគ្រោងបញ្ចប់នៅឆ្នាំ២០២៣៕
None
