អតិផរណាកើនឡើងគំហុក ហិរញ្ញវត្ថុរបស់រដ្ឋាភិបាលចុះទន់ខ្សោយ ការកាត់បន្ថយពន្ធ និងមេរោគឆ្លងរាតត្បាត គឺជាកត្តាចម្បង ដែលរុញច្រានឲ្យឧស្សាហកម្មទេសចរណ៍ និងការផ្ញើប្រាក់ពីពលករនៅក្រៅប្រទេសមមានការដាំក្បាលចុះខ្លាំង។ បញ្ហាទាំងអស់នេះ បានបំផ្លិចបំផ្លាញធ្ងន់ធ្ងរដល់សេដ្ឋកិច្ចស្រីលង្កានៅក្នុងរយៈពេលប៉ុន្មានខែមកនេះ។ នេះបើតាមការរាយការណ៍ពីសារព័ត៌មានអាល្លឺម៉ង់ DW។
អតិផរណាតម្លៃម្ហូបអាហារនៅប្រទេសស្រីលង្កាកាលពីខែមករាដើមឆ្នាំនេះ បានកើនដល់២៥% ដែលជាអត្រាខ្ពស់បំផុតមិនធ្លាប់មានឡើយ។ បញ្ហាខ្វះសាច់ប្រាក់បរទេស ឬទុនបម្រុងអន្តរជាតិ ក្នុងការទ្រទ្រង់ដល់ការនាំចូលទំនិញ ក៏ជាការរួមចំណែកធំមួយធ្វើឲ្យសេដ្ឋកិច្ចស្រីលង្កាធ្លាក់ចូលមាត់ជ្រោះនៃវិបត្តិ ដោយវាបាននាំឲ្យមានបញ្ហាកង្វះស្បៀងអាហារ និងប្រេងឥន្ធនៈប្រើប្រាស់យ៉ាងខ្លាំង។ តួយ៉ាង ទុនបម្រុងអន្តរជាតិ របស់ប្រទេសដីកោះមួយនេះ បានធ្លាក់ចុះប្រហែល៧០% តាំងពីខែមករាឆ្នាំ២០២០មក ដោយមានត្រឹមតែ ជាង២ពាន់៣រយលានដុល្លារប៉ុណ្ណោះ ក្នុងខែកុម្ភៈ ខណៈដែលខ្លួនត្រូវសងបំណុលប្រហែល៤ពាន់លានដុល្លារនៅក្នុងឆ្នាំនេះ។
បញ្ហាមួយទៀត ដែលធ្វើឲ្យសេដ្ឋកិច្ចស្រីលង្កាដើរដល់ដំណាក់កាលនេះ គឺ ការកាត់បន្ថយពន្ធ និងរងសម្ពាធហិរញ្ញវត្ថុសាធារណៈ។ លោក រ៉ាចាប៉ាក់សា ប្រធានាធិបតីស្រីលង្កាធ្លាប់បានសន្យាកាលពីអំឡុងពេលលោកធ្វើយុទ្ធនាការឈរឈ្មោះជាប្រធានាធិបតីថា លោកនឹងកាត់ពន្ធពាក់កណ្ដាលនៃអាករលើតម្លៃបន្ថែម (VAT) ១៥% ព្រមទាំងបានលុបចោលពន្ធមួយចំនួនទៀត ដើម្បីជាមធ្យោបាយបង្កើនការប្រើប្រាស់ និងជំរុញកំណើន។ ក៏ប៉ុន្ដែ ការកាត់បន្ថយពន្ធទាំងអស់នេះ បានធ្វើឲ្យរដ្ឋាភិបាលប្រទេសនេះ បាត់បង់ចំណូលយ៉ាងច្រើន ធ្វើឲ្យមានសម្ពាធហិរញ្ញវត្ថុសាធារណៈ ខណៈដែលប្រទេសស្រីលង្កាក៏បានជំពាក់បំណុលក្រាស់ក្រាលរួចទៅហើយនោះពិសេសបំណុលចិន។
អត្ថបទគួរអាន
បំណុលសាធារណៈរបស់ស្រីលង្កា ដែលមិនមានភាពច្បាស់លាស់តាំងពីមុនពេលមានមេរោគកូវីដ១៩រាតត្បាតនោះ ត្រូវបានគេប៉ាន់ប្រមាណថា បានកើនឡើងពី ៩៤% នៃ GDP នៅឆ្នាំ២០១៩ មកដល់ ១១៩% នៃGDP នៅក្នុងឆ្នាំ២០២១។
ស្ថិតក្នុងវិបត្តិសេដ្ឋកិច្ចដ៏អាក្រក់បំផុត នាបច្ចុប្បន្ននេះ ស្រីលង្កា កំពុងតែស្វែងរកជំនួយហិរញ្ញវត្ថុដើម្បីអន្តរគមន៍ចំពោះវិបត្តិសេដ្ឋកិច្ច ពីប្រទេសចិន និងដៃគូអភិវឌ្ឍជាច្រើនផ្សេងទៀតផងដែរ។ ដោយកន្លងទៅនេះ ស្រីលង្កាបានពិភាក្សាខ្ចីប្រាក់បន្ថែមពីប្រទេសចិន ២ពាន់៥រយលានដុល្លារទៀត ដើម្បីសង្គ្រោះសេដ្ឋកិច្ច ហើយក៏កំពុងបោះដៃសុំជំនួយបន្ទាន់ពីធនាគារពិភពលោក ធនាគារអភិវឌ្ឍន៍អាស៊ី និងអង្គការមូលនិធិរូបិយវត្ថុអន្តរជាតិផងដែរ ប៉ុន្ដែ នៅមិនទាន់មានដំណឹងឆ្លើយតបពីស្ថាប័នហិរញ្ញវត្ថុទាំងអស់នោះនៅឡើយទេ៕
None
