គម្រោង ភូមិកីឡដ្ឋានវើលប្រ៊ីដ នេះ មានទីតាំងស្ថិតនៅជាប់នឹងពហុកីទ្បដ្ឋានជាតិមរតកតេជោ ក្នុងតំបន់អភិវឌ្ឍន៍ទីក្រុងរណបរបស់អ្នកឧកញ៉ា លី យ៉ុង ផាត់ ភាគខាងជើងរាជធានីភ្នំពេញ។
នៅក្នុងបទសម្ភាសន៍ផ្តាច់មុខមួយជាមួយ ក្រុមការងារខេមបូណូមីស កាលពីពេលកន្លងទៅថ្មីៗនេះ អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន វើលដ៍ប្រ៊ីដ គ្រុប បានមានប្រសាសន៍ថា ដោយសាររាជរដ្ឋាភិបាលនឹងធ្វើជាម្ចាស់ផ្ទះសម្រាប់ការប្រកួតកីឡាប្រជាជាតិអាស៊ីអាគ្នេយ៍ និងអាស៊ានប៉ារ៉ាហ្គេម ដូច្នេះ រាជរដ្ឋាភិបាលបានពិភាក្សាជាមួយគណៈកម្មាការកីឡាអូឡាំពិក ក្នុងការបង្កើតភូមិកីឡាមួយទៀត ទើបក្រុមហ៊ុនរបស់អ្នកឧកញ៉ាសហការជាមួយនឹងភាគីពាក់ព័ន្ធ ដើម្បីររៀបចំជាភូមិកីឡានេះឡើង។
អត្ថបទទាក់ទង
អ្នកឧកញ៉ា សៀ ឫទ្ធី បានបញ្ជាក់ថា ដោយសារតែគម្រោងនេះ ជាគម្រោងរបស់ក្រុមហ៊ុន វើលដ៍ប្រ៊ីដ សហការជាមួយរាជរដ្ឋាភិបាល ដូច្នេះ នៅពេលដែលបញ្ចប់ប្រកួតកីឡាប្រជាជាតិអាស៊ីអាគ្នេយ៍និង អាស៊ានប៉ារ៉ាហ្គេមហើយ ទើបក្រុមហ៊ុនអាចប្រគល់លំនៅឋានដល់អតិថិជនបាន ដោយការសាងសង់គម្រោងនេះ ផ្អែកជាចំបងទៅលើគុណភាព និងសុវត្ថិភាព។
សូមជម្រាបថា គម្រោងភូមិកីឡដ្ឋាន វើលដ៍ប្រ៊ីដ នឹងក្លាយជាតំបន់ពាណិជ្ជកម្មថ្មីសន្លាងមួយទៀត លាតសន្ធឹងលើផ្ទៃដី ៦ហិកតា ក្នុងចំណោមផ្ទៃ ៣ម៉ឺន៥ពាន់ហិកតា នៃទីក្រុងនាគសម្តេចតេជោសែន ដោយ តំបន់ពាណិជ្ជកម្មនេះ ត្រូវបានសិក្សាយ៉ាងល្អិតល្អន់ ដោយក្នុងនោះមានខុនដូរសម្រាប់ការស្នាក់នៅ១២អគារ ស្មើនឹងជាង១៣០០បន្ទប់ មានខុនដូរប្រភេទស្ទូឌីយ៉ូ១អគារ ស្មើនឹង១៦៣បន្ទប់ កម្ពស់១៣ជាន់ ។ហើយក្រៅពីនេះ ក៏មានជាប្រភេទផ្ទះល្វែង ផ្ទះអាជីវកម្ម ផ្ទះវីឡា ផ្សារទំនើប សារមន្ទីរកីឡា ជាដើម ដែលគ្រោងនឹងបញ្ចប់ការសាងសង់ទាំងនៅចុងឆ្នាំ២០២២ខាងមុខនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
