លោក លន់ យ៉េង លេខាធិការនៃសហព័ន្ធស្រូវអង្ករកម្ពុជា បានប្រាប់អ្នកសារព័ត៌មានខេមបូណូមីសតាមទូរស័ព្ទថា ចំពោះបិទនេះ វាមានផលប៉ះពាល់តិចតួចប្រមាណតែ១០%ប៉ុណ្ណោះ ចំពោះអង្ករស និងអង្ករចំហុយ តែនេះមិនមែនមានន័យថាបិទរហូតទេ គ្រាន់តែថាលើកពេលនាំចេញបន្តិចប៉ុណ្ណោះ ហើយព្រោះភាគច្រើន គឺកម្ពុជា នាំចេញតែប្រភេទអង្ករក្រអូប និងអង្ករប្រណីត។
លោកបានបន្ថែមថា «នេះជាវិធានការមួយដែលរដ្ឋរៀបចំព្រៀងទុក ក្រែងលោករណីកូវីដ១៩នេះ វាសាយភាយកាន់តែធំគ្រប់គ្រងអត់បានអាចថា រដ្ឋប្រកាសក្នុងភាពអាសន្ន នឹងអាចមានបំរាមជាច្រើន ចឹងរដ្ឋខ្លាចខ្វះខាតប្រជាជនមួយចំនួន ដែលអាចមកពីថៃពីអីចឹង ចឹងនេះជាវិធានកាមួយ ដែលអាចជួយធ្វើម៉េចឲ្យប្រសើរ មានន័យថា ផ្តល់ទំនុកចិត្តដល់ប្រជាជន»។
បើតាមលេខាធិការនៃសហព័ន្ធស្រូវអង្ករកម្ពុជារូបនេះ ក្នុងបរិមាណស្តុកបច្ចុប្បន្ននេះ ចំពោះការផ្អាកការនាំចេញនេះ បើសិនអូសបន្លាយដល់ខែមិថុនាក៏ដោយ ក៏មិនមានអ្វីចោទជាបញ្ហាដែរ តែខ្លាចបញ្ហានេះវាអូសបន្លាយយូរជាងនេះ។
អត្ថបទគួរអាន
ម្យ៉ាងវិញទៀត លោកថា រាជរដ្ឋាភិបាលទប់ស្កាត់នេះគឺដើម្បី ទីមួយ ខ្លាចប្រជាជនយើងប្រមូលស្រូវលក់អស់ ដោយសារស្រូវឡើងថ្លៃបន្តិច ហើយនាំឲ្យអស់ស្តុក អាចឈានដល់ការខ្វះខាតស្រូវបរិភោគខ្លួនឯង។ មួយវិញទៀត ទម្លាប់កសិករយើងបច្ចុប្បន្នខុសពីមុន គឺមិនសូវមានស្រូវស្តុកទុកទេ គឹលក់ឲ្យអស់សិន ចាំទិញអង្ករគេហូបតាមក្រោយ ហើយទី២ ប្រជាកសិករ មិនមែនមាន ៨០%ដូចមុនទេ គឺនៅសល់តែ ៤០% នៃប្រជាជនសរុបប៉ុណ្ណោះ នេះបើតាមស្ថិតិរបស់ក្រសួងផែនការ។
ចំពោះតម្លៃអង្ករក្រអូបវិញ មានការប្រែប្រួលខ្លះ ទៅតាមការចរចារវាងអ្នកលក់និងអ្នកទិញ តែមិនមានតម្លៃរួមណាមួយទេ ពីព្រោះបច្ចេកទេសនៃការកិនខុសគ្នា តម្លៃនៃរោងម៉ាស៊ីនមួយៗក៏ខុសគ្នា។
សហព័ន្ធស្រូវអង្ករកម្ពុជា ក៏បានស្នើដល់ពលរដ្ឋកុំឲ្យមានការព្រួយបារម្ភចំពោះការបិទនេះ វាមិនមានបញ្ហាអ្វីធំដុំទេ ហើយសូមឲ្យប្រជាកសិករព្យាយាមដាំដុះនូវប្រភេទពូជស្រូវដែលឆ្លើយតបនឹងតម្រូវការទីផ្សារ ជាពិសេសស្រូវសែនក្រអូប ជាដើមពីព្រោះថា ឥឡូវនេះតម្រូវការកំពុងតែមានការកើនឡើង៕
None
