បួនថ្ងៃកន្លងមកនេះ តម្លៃភាគហ៊ុនរបស់អេស៊ីលីដាកើនដល់កម្រិតអតិបរមា ខណៈការចាប់អារម្មណ៍មកលើផ្សារមូលបត្រពីសំណាក់វិនិយោគិននិងសាធារណជនកាន់តែមានការកើនឡើងច្រើនគួរឲ្យកត់សម្គាល់។
ជាក់ស្តែង នៅថ្ងៃទី២៨ ឧសភា នៅពេលបិទការជួញដូរ ឃើញថា ទំហំនៃការទិញលក់ភាគហ៊ុនធនាគារអេស៊ីលីដា មានចំនួន ២៤ម៉ឺនហ៊ុន ក្នុងតម្លៃ ១ភាគហ៊ុន ២១,៥៥០រៀល ដែលមានទំហំទឹកប្រាក់ជិត ៥ពាន់លានរៀល ស្មើនឹងប្រមាណជាង ១លាន២សែនដុល្លារអាមេរិក។ ប្រហាក់ប្រហែលគ្នាទៅនឹងថ្ងៃទី២៧ ខែឧសភា ម្សិលមិញ ទំហំនៃការទិញលក់ភាគហ៊ុន នៅក្នុងផ្សារមូលបត្រកម្ពុជា មានទំហំទឹកប្រាក់ជាង ៥ពាន់ ១០០លានរៀល ស្មើនឹងប្រមាណ ១លាន៣សែនដុល្លារអាមេរិក។
ប៉ុន្តែ អ្វីដែលគួរឲ្យកត់សម្គាល់ជាពិសេសនោះ គ្រាន់តែទំហំនៃការជួរដូរភាគហ៊ុនរបស់ធនាគារ អេស៊ីលីដា តែមួយប៉ុណ្ណោះ ត្រូវបានទិញលក់ចំនួន ២៥ម៉ឺនហ៊ុន ក្នុងតម្លៃ ១ហ៊ុន ១៩៦០០រៀល ដែលមានទឹកប្រាក់សរុបជាង ៤ពាន់ ៨រយលានរៀល វាស្មើនឹងប្រមាណជាង ១លាន ២សែនដុល្លារអាមេរិកទៅហើយ ខណៈ ការជួញដូរភាគហ៊ុនរបស់ក្រុមហ៊ុនចុះបញ្ជី ៥ផ្សេងទៀត សម្រេចបានទំហំទឹកប្រាក់ជួញដូរប្រមាណជាង ៣រយលានរៀល ស្មើនឹងប្រមាណ ១០ម៉ឺនដុល្លារអាមេរិកប៉ុណ្ណោះ។
ទស្សនាវីដេអូសេចក្ដីរាយការណ៍ អំពីការឡើងផ្សារហ៊ុនជាផ្លូវការរបស់ ធនាគារ អេស៊ីលីដា
អត្ថបទទាក់ទង
នេះសរបញ្ជាក់ឲ្យឃើញថា វត្តមានរបស់ធនាគារអេស៊ីលីដានៅលើវិថីផ្សារមូលបត្រកម្ពុជាពិតជាមេដែកឆក់ និងបានបំបែកឯតទគ្គកម្មភាពស្ងប់ស្ងាត់របស់ទីផ្សារភាគហ៊ុនកម្ពុជាអស់កាលជិត១០ឆ្នាំកន្លងមកនេះ ឲ្យក្លាយជាទីផ្សារដ៏មានសកម្មភាពរស់រវើកជាមួយនឹងការទាក់ទាញសាធារណជនដែលជាអ្នកវិនិយោគ ឲ្យចាប់អារម្មណ៍វិនិយោគនៅក្នុងវិស័យមូលបត្រកម្ពុជាកាន់តែខ្លាំង។
ជុំវិញទៅនឹងបញ្ហានេះ ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានគូសបញ្ជាក់ថា ការចុះបញ្ជីនៅលើផ្សារភាគហ៊ុនរបស់ធនាគារអេស៊ីលីដា គឺខុសពីការចុះបញ្ជីរបស់ក្រុមហ៊ុនដទៃ ដោយមានលក្ខណៈពិសេសជាច្រើន ក្នុងនោះទំហំនៃការជួញដូរភាគហ៊ុនរបស់អេស៊ីលីដា បានកើនឡើងដល់ខ្ទង់លានដុល្លារ ក្នុងរយៈពេល ៤ថ្ងៃជាប់ៗគ្នា មិនដែលធ្លាប់មានពីមុនមកនោះទេ ហើយលើសពីនេះទៅទៀត ថ្លៃភាគហ៊ុនរបស់ក្រុមហ៊ុនផ្សេងៗ ដែលទើបតែចុះបញ្ជីថ្មីៗ គឺមានការធ្លាក់ចុះតម្លៃបន្តិច ឬនៅថេរ តែចំពោះភាគហ៊ុនរបស់អេស៊ីលីដា នៅពេលបានចុះបញ្ជីហើយ មានការកើនឡើងភ្លាមៗតែម្តង។
ឯកឧត្តម ហុង សុហួរ បានបញ្ជាក់ថា វត្តមានរបស់គ្រឹះស្ថានហិរញ្ញវត្ថុដ៏ធំមួយនេះដែលមានប្រាក់ចំណូល និងប្រាក់ចំណេញច្រើន បានទាក់ទាញវិនិយោគិននិងសាធារណជន ឲ្យចាប់អារម្មណ៍មកលើវិស័យមូលបត្រកាន់តែច្រើន ជំរុញឲ្យមានសកម្មភាពជួញដូរកាន់តែមមាញឹក ហើយក្រុមហ៊ុនផ្សេងៗកាន់តែចាប់អារម្មណ៍ និងមើលឃើញកាន់តែច្បាស់ពីប្រយោជន៍នៃការចុះបញ្ជីលើផ្សារមូលបត្រកម្ពុជា។
ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា បានឲ្យដឹងថា ការជួញដូរខ្ទង់លានដុល្លាររបស់ធនាគារអេស៊ីលីដា ក្នុងរយៈពេល ៣ថ្ងៃជាប់ៗគ្នានេះ គឺមានពេលវេលាខ្លីណាស់សម្រាប់ការវាយតម្លៃ ក៏ប៉ុន្តែ វាសរបញ្ជាក់ពី កំណើនទំនុកចិត្តរបស់វិនិយោគិនសាធារណៈ មកលើទីផ្សារមូលបត្រនិងភាពរឹងមាំរបស់ក្រុមហ៊ុនចុះបញ្ជីអេស៊ីលីដានេះ ដែលជំរុញបន្ថែមនូវភាពទាក់ទាញសម្រាប់ការជួញដូរលើទីផ្សារ និងធ្វើឲ្យទំហំជួញដូរកើនឡើងគួរឲ្យកត់សម្គាល់។
ឯកឧត្តម ស៊ូ សុជាតិ ក៏បានអំពាវនាវឲ្យធនាគារ ឬគ្រឹះស្ថានហិរញ្ញវត្ថុផ្សេងទៀត ពិចារណាចុះបញ្ជីក្នុងផ្សារមូលបត្រកម្ពុជា ដើម្បីទទួលបាននូវភាពជឿជាក់បន្ថែមពីសាធារណជន ព្រមទាំងជំរុញកំណើនសេដ្ឋកិច្ច តាមរយៈការពង្រីកធុរកិច្ចរបស់ខ្លួន និងការបែងចែកភាពរីកចម្រើនរបស់ខ្លួន ដល់វិនិយោគិនសាធារណៈ។
លោក ព្រំ វិសុទ្ធ អគ្គនាយកក្រុមហ៊ុន ACLEDA Securities Plc. បានបញ្ជាក់ឲ្យដឹងថា វត្តមានរបស់ធនាគារអេស៊ីលីដា ពិតជាបានជំរុញឲ្យវិស័យមូលបត្រកម្ពុជាមានភាពប្រសើរឡើងមួយកម្រិតទៀត ហើយវាជាប្រវត្តិសាស្រ្តថ្មីមួយ ចាប់តាំងពីមានផ្សារមូលបត្រកម្ពុជា គឺពុំមានការជួញដូរក្នុងទំហំធំបែបរូបវ័ន្តបុគ្គលបែបនេះទេ ពោលគឺការរជួញដូរភាគហ៊ុនរបស់អេស៊ីលីដា ភាគច្រើនជារូបវ័ន្តបុគ្គល ឬហៅថា អ្នកទិញរាយតូចៗជាច្រើន ដែលជំរុញឲ្យសកម្មភាពទិញលក់កាន់តែមមាញឹក និងរស់រវើក។
ព្រឹត្តិការណ៍នេះសរបញ្ជាក់ឲ្យឃើញពីជំនឿទុកចិត្តរបស់សាធារណជន និងវិនិយោគិន មកលើធនាគារអេស៊ីលីដា ដែលមានប្រតិបត្តិការល្អប្រសើរ បើទោះបីជាក្នុងសម័យវិបត្តិនៃការរីករាលដាលឆ្លងនៃជំងឺកូវីដ យ៉ាងណាក៏ដោយ ហើយលោក ព្រំ វិសុទ្ធ បានបញ្ជាក់ថា រហូតមកដល់ពេលនេះ នៅមានអ្នកបញ្ជាទិញហ៊ុនអេស៊ីលីដា ជាង ៣ម៉ឺន ៤ពាន់ហ៊ុនទៀត ក្នុងតម្លៃអតិបរមា ដែលកំពុងតែទន្ទឹងរង់ចំាមើលអ្នកលក់។
លោក បណ្ឌិត អិុន ចាន់នី ប្រធាននាយកប្រតិបត្តិធនាគារអេស៊ីលីដា ធ្លាប់បានអះអាងប្រាប់សារព័ត៌មាន ខេបូណូមីស ថា សម្រាប់ឆ្នាំ២០២០នេះ ធនាគារអេស៊ីលីដា រំពឹងប្រាក់ចំណេញនឹងកើនឡើងលើសឆ្នាំ២០១៩ទៅទៀត ដោយយ៉ាងហោចណាស់ក៏មានកំណើន១០%ដែរ ខណៈដែលកាលពីឆ្នាំ២០១៩ប្រាក់ចំណេញរបស់អេស៊ីលីដា ធ្លាប់បានរំពឹងថានឹងមានជាង ១០០ លានដុល្លារអាមេរិក។
លោកបណ្ឌិត អុិន ចាន់នី មានប្រសាសន៍យ៉ាងដូច្នេះថា «រឹតតែច្រើនជាងឆ្នាំ២០១៩ទៀត [កំណើនប្រាក់ចំណេញឆ្នាំ២០២០] … នរណាចង់បានប្រាក់ចំណេញស្មើឆ្នាំមុននោះ? វាត្រូវតែច្រើនជាងហ្នឹង! ... បទពិសោធន៍ជាក់ស្ដែងមួយឆ្នាំៗ កើនប្រមាណជាង ១០%»។
សូមជម្រាបផងដែរថា បើយោងតាមរបាយការណ៍សវនកម្មប្រាក់ចំណេញក្រោយបង់ពន្ធរួចរបស់ធនាគារអេស៊ីលីដាជាផ្លូវការបានបង្ហាញឲ្យដឹងថា ធនាគារពាណិជ្ជដ៏ធំជាងគេនៅកម្ពុជាមួយនេះទទួលបានប្រាក់ចំណេញប្រចាំឆ្នាំ២០១៩ ប្រមាណ ១២០លានដុល្លារអាមេរិក គឺដូចទៅនឹងការរំពឹងទុករបស់លោក បណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា ដែលបានលើកឡើងប្រាប់សារព័ត៌មានខេមបូណូមីស ពិតប្រាកដមែន។
លោក បណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា ធ្លាប់បានអះអាងប្រាប់ក្រុមអ្នកសារព័ត៌មាន នៅថ្ងៃគោះជួងចុះបញ្ជីជាផ្លូវការចូលផ្សារមូលបត្រកម្ពុជារបស់ធនាគារអេស៊ីលីដា ថា ការដែលធនាគារអេស៊ីលីដា សម្រេចចិត្តចុះបញ្ជីលក់ភាគហ៊ុននាពេលនេះ គឺដើម្បីធ្វើពិពិធកម្មប្រភពទុនដោយកាលពីមុន អេស៊ីលីដា ពឹងផ្អែកតែលើប្រភពទុនពីដៃគូវិនិយោគយុទ្ធសាស្ត្រ ហើយឥឡូវនេះ ធនាគារអេស៊ីលីដាមានប្រភពទុនថ្មីមួយទៀត ពីវិនិយោគិនសាធារណៈ ដែលធ្វើឲ្យប្រភពទុនរបស់ធនាគារនេះកាន់តែមានភាពចម្រុះ និងសម្បូរបែប។
សូមបញ្ជាក់ដែរថា មុនដំណាច់ឆ្នាំ២០២០នេះ ក្រុមហ៊ុនផ្សារមូលបត្រកម្ពុជា រំពឹងយ៉ាងមុតមាំថា នឹងមានក្រុមហ៊ុនចុះបញ្ជីចំនួន ២បន្ថែមទៀត ដែលអាចចុះបញ្ជីលក់ភាគហ៊ុន ចំនួន០១ និងមួយទៀត ចុះបញ្ជីលក់មូលបត្របំណុល៕
None
