ធនាគារ អេស៊ីលីដា គ្រោងដាក់ឲ្យដំណើរការទូទាត់តាមកូដ QR ឆ្លងដែនជាមួយប្រទេសវៀតណាម និងឡាវនៅចុងឆ្នាំ២០២២

លោកបណ្ឌិត អ៊ិន ចាន់នី ប្រធាននាយកប្រតិបត្តិ​ ធនាគារអេស៊ីលីដា ភីអិលស៊ី បានអះអាងថា ជាមួយនឹងការត្រៀមខ្លួនរួចជាស្រេច​នូវបច្ចេកវិទ្យាហិរញ្ញវត្ថុ ធនាគារជាតិ នៃ កម្ពុជា បានជ្រើសរើសយក ធនាគារ អេស៊ីលីដា ភីអិលស៊ី ជាធនាគារទំនាក់ទំនង​សម្រាប់ការទូទាត់ប្រាក់រៀលឆ្លងដែន​តាម ឃ្យូអរកូត (QR Code) ជាមួយនឹងប្រទេសវៀតណាម និងប្រទេសឡាវ ក្នុងគោលដៅលើកកម្ពស់ការទូទាត់ប្រាក់រៀលឲ្យកាន់តែទូលំទូលាយក្នុង​តំបន់អាស៊ាន និងដើម្បីជំរុញ​បរិយាបន្នហិរញ្ញវត្ថុ​អាស៊ាន ស្របតាមទិសដៅ​សមាហរណកម្មសហគមន៍​សេដ្ឋកិច្ចអាស៊ាន។

លោកបណ្ឌិត អ៊ិន ចាន់នី បានគូសបញ្ជាក់ទៀតថា បន្ថែមលើការទូទាត់ប្រាក់រៀលតាមឃ្យូអរកូត (QR Code) នៅប្រទេសថៃ ដែលកំពុងដំណើរការបច្ចុប្បន្ន ធនាគារ អេស៊ីលីដា ក៏បាននិងកំពុងសហការជាមួយស្ថាប័ន​ពាក់ព័ន្ធ ដើម្បីដំណើរការការទូទាត់ប្រាក់រៀលឆ្លងដែន​នៅវៀតណាម និងឡាវ តាមរយៈការប្រើប្រាស់ឃ្យូអរកូត (QR Code) ដែលគ្រោងនឹងដាក់ឲ្យដំណើរការនៅចុងឆ្នាំ២០២២នេះផងដែរ។ ជំហានបន្ទាប់ ធនាគារ អេស៊ីលីដា គ្រោងនឹងសហការជាមួយបណ្តាប្រទេសដទៃទៀត ដែលជាសមាជិក​អាស៊ាន ដើម្បីបន្តពង្រីកការទូទាត់ប្រាក់រៀលនៅតំបន់អាស៊ានឲ្យកាន់តែទូលំទូលាយបន្ថែមទៀត ដើម្បីសម្រួលដល់ការទូទាត់ កាត់បន្ថយចំណាយប្រតិបត្តិការ និងជួយជំរុញបរិយាបន្នហិរញ្ញវត្ថុអាស៊ាន។

សូមបញ្ជាក់ថា កាលពីខែកុម្ភៈ ឆ្នាំ២០២០ ធនាគារ អេស៊ីលីដា ភីអិលស៊ី និង Siam Commercial Bank (SCB) ត្រូវបានជ្រើសរើសជាធនាគារទំនាក់ទំនង ដើម្បីសហការគ្នាគាំទ្រលើការទូទាត់តាមរយៈប្រព័ន្ធឃ្យូអរកូត (QR Code) ឆ្លងដែន ដោយអតិថិជន និងប្រជាជនកម្ពុជាអាចធ្វើការទូទាត់ជាប្រាក់រៀលនៅក្នុងព្រះរាជាណាចក្រថៃ តាមរយៈការស្កែនឃ្យូអរកូត (QR Code)។ នៅចុងឆ្នាំ២០២២នេះ អតិថិជន និងប្រជាជនថៃ ក៏អាចធ្វើការទូទាត់ជាប្រាក់បាតថៃ នៅក្នុងព្រះរាជាណាចក្រកម្ពុជា តាមរយៈការស្កែនឃ្យូអរកូត (QR Code)ផងដែរ៕