របាយការណ៍ទស្សនវិស័យអភិវឌ្ឍន៍អាស៊ី ខែមេសា ឆ្នាំ២០២៣ បានង្ហាញថា ការប្រែប្រួលអាកាសធាតុអាចធ្វើឱ្យ ផសស របស់កម្ពុជានៅទ្រឹងត្រឹមកម្រិតប្រមាណ ១០% នៅត្រឹមឆ្នាំ២០៥០ផងដែរ ដោយភាគច្រើនដោយសារការបាត់បង់ផលិតភាពកម្លាំងពលកម្ម ដោយសារអាកាសធាតុអាក្រក់ខ្លាំង និងការឡើងកម្ដៅ។ របាយការណ៍ដដែលបន្ថែមថា ភាពញឹកញាប់ និងភាពធ្ងន់ធ្ងរកាន់តែអាក្រក់នៃគ្រោះទឹកជំនន់ និងរាំងស្ងួតត្រូវរំពឹងថា នឹងវាយប្រហារទៅលើវិស័យកសិកម្ម ហើយការឡើងកម្ពស់ទឹកសមុទ្រ និងការជ្រៀតចូលនៃជាតិអំបិលនឹងមានផលប៉ះពាល់ចំពោះការនេសាទទឹកសាបរបស់កម្ពុជា និងធ្វើឱ្យខូចដីកសិកម្ម។ រីឯ វិស័យទេសចរណ៍ក៏ងាយរងគ្រោះ ចំពោះការប្រែប្រួលអាកាសធាតុ ដែលអាចបំផ្លាញហេដ្ឋារចនាសម្ព័ន្ធសំខាន់ៗ និងតម្រូវការនៃវិស័យទេសចរណ៍ផងដែរ។
ពាក់ព័ន្ធនឹងបញ្ហាការប្រែប្រួលអាកាសធាតុនេះដែរ ឯកឧត្តម មាស សុខសេនសាន្ត អ្នកនាំពាក្យនៃក្រសួងសេដ្ឋកិច្ចកម្ពុជា បានបញ្ជាក់ឱ្យដឹងថា ការប្រែប្រួលអាកាសធាតុ ត្រូវបានរាជរដ្ឋាភិបាលគិតបញ្ចូលទាំងការវិភាជ និងការគិតគូជាបញ្ហាប្រឈមតាំងពីឆ្នាំ២០២២មក។ ដោយឯកឧត្តម បន្ថែមថាក្រសួងនឹងគិតគូដាក់បញ្ចូលក្នុងជ្រុងកែទម្រង់ សម្រាប់ការប្រែប្រួលអាកាសធាតុមកលើការគ្រប់គ្រងហិរញ្ញវត្ថុសាធារណៈ ជាពិសេសថវិកាបៃតងសម្រាប់រយៈពេលមធ្យម។
ទោះយ៉ាងណា របាយការណ៍ទស្សនវិស័យអភិវឌ្ឍន៍អាស៊ី បានបញ្ជាក់ថា កម្ពុជាត្រូវតែពិចារណាលើការប្រែប្រួលអាកាសធាតុ ពេលដែលព្យាយាមជំរុញកំណើនសេដ្ឋកិច្ចរបស់ខ្លួន។ បើទោះបីជាកម្ពុជាមានការបញ្ចេញឧស្ម័នផ្ទះកញ្ចក់ទាប តែការបញ្ចេញឧស្ម័ននេះនៅកម្ពុជាកំពុងកើនឡើង ដោយសារការកាប់ព្រៃឈើ ការពង្រីកការបង្កបង្កើនផលស្រូវ និងកំណើនតម្រូវការថាមពលពីវិស័យឧស្សាហកម្ម។ ធនាគារអភិវឌ្ឍន៍អាស៊ី គូសបញ្ជាក់ថា ការកាត់បន្ថយបរិមាណកាបូននឹងធ្វើឱ្យកម្ពុជា មានឱកាសសម្រាប់កំណើនសេដ្ឋកិច្ចថ្មីៗ ដោយសារកំណើនតម្រូវការជាសកលចំពោះផលិតផល និងសេវាកម្មដែលមាននិរន្តរភាពខាងបរិស្ថាន ការធ្វើអន្តរកាលទៅជាសេដ្ឋកិច្ចដែលគ្មានការបញ្ចេញឧស្ម័នផ្ទះកញ្ចក់ នឹងបង្កើតការងារដែលមានគុណភាពកាន់តែខ្ពស់ និងផ្តល់លទ្ធភាពកាន់តែប្រសើរដល់កម្ពុជាក្នុងការទទួលបានអ្នកវិនិយោគសកល ដែលមានចំណាប់អារម្មណ៍កាន់តែច្រើនចំពោះការវិនិយោគបៃតង។
សូមបញ្ជាក់ថា រាជរដ្ឋាភិបាលក៏មានការប្តេជ្ញាចិត្ត ស្វះស្វែងរកកំណើនសេដ្ឋកិច្ចបៃតង តាមរយៈផែនការយុទ្ធសាស្ត្រជាតិស្តីពី កំណើនសេដ្ឋកិច្ចបៃតង ឆ្នាំ២០១៣-២០៣០ និង យុទ្ធសាស្ត្ររយៈពេលវែង សម្រាប់អព្យាក្រិតភាពកាបូននៅត្រឹមឆ្នាំ២០៥០ផងដែរ៕
