ព្យាករណ៍ររបស់ស្ថាប័នអន្តរជាតិទាំង៣ ខាងលើនេះ គឺធ្វើឡើងដោយផ្អែកទៅលើអំនះអំណាងផ្សេងៗគ្នា។ ។ ទោះយ៉ាងរបាយការណ៍ របស់ស្ថាប័ននីមួយៗ ក៏បានបង្ហាញថា សម្រាប់កត្តាប្រឈម ក្នុងការលូតលាស់សេដ្ឋកិច្ចរបស់កម្ពុជា ក៏នៅតែមានកាន់តែខ្ពស់ និងគួរឲ្យតាមដានយកចិត្តទុកដាក់ដោះស្រាយផងដែរ។
របាយការណ៍របស់ស្ថាប័នរូបិយវត្ថុអន្តរជាតិ IMF ដែលបានចេញផ្សាយថ្មីនេះ បានគូសបញ្ជាក់ថា សេដ្ឋកិច្ចកម្ពុជា ក្នុងឆ្នាំ ២០១៩ នៅតែសម្រេចបានកំណើនរឹងមាំ ក្នុងអត្រា៧% ដែលត្រូវបានគាំទ្រដោយការបន្តកំណើននៃការនាំចេញ និងវិស័យសំណង់ ខណៈដែលអតិផរណាត្រូវបានរក្សាឲ្យស្ថិតនៅក្នុងកម្រិតទាប ប្រមាណ ២,៥%។ ទន្ទឹមនឹងនេះ ស្ថានភាពហិរញ្ញវត្ថុសាធារណៈ នៅតែបន្តស្ថិតក្នុងភាពល្អប្រសើរ ស្របពេលដែលបំណុលសាធារណៈ ក៏ស្ថិតនៅក្នុងកម្រិតហានិភ័យទាប អាចគ្រប់គ្រងបាន។
អត្ថបទទាក់ទង!
ទោះយ៉ាងណា ស្ថាប័នរូបិយវត្ថុអន្តរជាតិ ក៏បានបញ្ជាក់ដែរថា សេដ្ឋកិច្ចកម្ពុជា ក៏កំពុងប្រឈមនឹងហានិភ័យខ្ពស់ជាងមុន ដែលបណ្ដាលមកពី ការកើនឡើងភាពតានតឹងនៃសង្គ្រាមពាណិជ្ជកម្ម និងលទ្ធភាពនៃការដកប្រព័ន្ធអនុគ្រោះពន្ធ (EBA) សម្រាប់ការនាំទំនិញទៅអឺរ៉ុប ដែលវាអាចនឹងជះឥទ្ធិពលអវិជ្ជមាន ដល់សេដ្ឋកិច្ចកម្ពុជាគួរឲ្យកត់សម្គាល់។
របាយការណ៍នោះ បានកត់សម្គាល់ទៀតថា ហានិភ័យចំពោះសេដ្ឋកិច្ចកម្ពុជាមួយទៀតនោះ គឺអាចកើតឡើងនៅក្នុងវិស័យហិរញ្ញវត្ថុ តាមរយៈការផ្តល់ឥណទានប្រមូលផ្តុំកាន់តែខ្លាំងឡើងៗនៅក្នុងវិស័យអចលនទ្រព្យនិងសំណង់ ដែលវាត្រូវបានរំពឹងថា នឹងកើនឡើងប្រហែល ២៨ភាគរយ ក្នុងឆ្នាំ២០១៩។
របាយការណ៍ ក៏បានបញ្ជាក់ទៀតថា ការខ្ចីភាគច្រើនដោយអ្នកអភិវឌ្ឍន៍អចលនទ្រព្យ នៅតែមិនមានការត្រួតពិនិត្យនិងគ្មានការគ្រប់គ្រង ហើយទិន្នន័យផ្លូវការស្តីពីតម្លៃអចលនទ្រព្យនៅមិនទាន់ មាននៅឡើយដែរ។
គួរបញ្ជាក់ដែរថា កំណើនសេដ្ឋកិច្ចរបស់កម្ពុជា កាលពីឆ្នាំ២០១៨ ត្រូវបានប៉ាន់ប្រមាណថា មានកំណើនខ្ពស់ រហូតដល់ទៅ ៧,៥% ដោយរុញពីក្រោយដោយសន្ទុះនៃកំណើនការនាំចេញខ្ពស់។ បើតាមព្យាករណ៍របស់ធនាគារអភិវឌ្ឍន៍អាស៊ី ធនាគារពិភពលោក និងស្ថាប័នរូបិវត្ថុអន្តរជាតិ ឃើញថា សេដ្ឋកិច្ចកម្ពុជានៅឆ្នាំ២០២០ ខាងមុខ អាចនឹងមានការថយចុះមកវិញ ពោលគឺ មកនៅត្រឹមតែ ៦,៨% ដោយសារតែការថយចុះកំណើននៃសេដ្ឋកិច្ចសកល៕
None
