នាសន្និសីទសារព័ត៌មានស្តីពីប្រេង ឧស្ម័ន និងថាមពលកម្ពុជាឆ្នាំ២០២២ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពលបានព្យាករពីកំណើនតម្រូវការប្រើប្រាស់ប្រេងឥន្ធនៈនៅកម្ពុជានាថ្ងៃអនាគត ក្នុងនោះឯកឧត្តមព្យាករថា កម្ពុជានឹងមានតម្រូវការប្រេងកើនឡើងដល់ ៤,៨លានតោននៅឆ្នាំ២០៣០ កើនឡើងស្ទើរតែ ១០០%បើធៀបនឹងបរិមាណកាលពីឆ្នាំ២០២០ដែលមាន ២,៨លានតោន។ ជាមួយគ្នានេះកម្ពុជាត្រូវបានរំពឹងថានឹងមានតម្រូវការប្រើប្រាស់ប្រេងកើនដល់ ៨,៣លានតោននៅឆ្នាំ២០៤០។
កត្តានេះទាមទារឲ្យមានការយកចិត្តទុកដាក់ខ្ពស់លើការអភិវឌ្ឍវិស័យបូមប្រេងដោយខ្លួនឯង ខណៈបច្ចុប្បន្នការបូមប្រេងនៅឈូងសមុទ្រកម្ពុជាកំពុងជាប់គាំង ក្រោយក្រុមហ៊ុនរុករកនិងបូមប្រេងរបស់សិង្ហបុរី KrisEnergy ដែលទទួលបានសិទ្ធិលើប្រតិបត្តិការនេះ ជួបវិបត្តិក្ស័យធន។ សម្រាប់ឯកឧត្តម ស៊ុយ សែម ការវិនិយោគបន្ថែមលើវិស័យប្រេងឥន្ធនៈ វាជារឿងចាំបាច់ណាស់សម្រាប់កម្ពុជា ដែលជាប្រទេសនាំចូលប្រេងទាំងស្រុង ដើម្បីឆ្លើយតបនឹងតម្រូវការ ដែលកំពុងមានការកើនឡើង និងត្រៀមឆ្លើយតបនឹងការកើនឡើងបន្ថែមទៀតនាពេលខាងមុខ។ នេះបើតាមការចុះផ្សាយដោយសារព័ត៌មានចិន ស៊ិនហួរ។
បើតាមការគូសបញ្ជាក់របស់មន្ត្រីជាន់ខ្ពស់ក្រសួងពាណិជ្ជកម្ម នៅក្នុងរយៈពេល៦ខែកន្លងមកនេះ កម្ពុជា បាននាំចូលប្រេងឥន្ធនៈមិនក្រោម៣០លានលីត្រនោះទេក្នុង១ខែៗ ក្នុងនោះកម្ពុជាបាននាំចូលប្រេងសាំងជាមធ្យមជាង១០លានលីត្រ និងម៉ាស៊ូតប្រមាណ២០លានលីត្រ។ ប្រេងឥន្ធនៈដែលប្រជាពលរដ្ឋ ក្រុមហ៊ុន សហគ្រាសកំពុងប្រើប្រាស់នាពេលបច្ចុប្បន្ន កម្ពុជាបាននាំចូលពីប្រទេសវៀតណាម ថៃ និងសិង្ហបុរី។
អត្ថបទគួរអាន
ទិន្នន័យរបស់ក្រសួងពាណិជ្ជកម្មបានបង្ហាញឲ្យឃើញថា កម្ពុជាបានចំណាយថវិកាជាង៩៧០លានដុល្លារលើការនាំប្រេងឥន្ធនៈនៅក្នុងរយៈពេល៥ខែឆ្នាំ២០២២ មានការកើនឡើងជាង៥៧% បើធៀបនឹងរយៈពេលដូចគ្នាកាលពីឆ្នាំមុនដែលមានត្រឹមតែជាង៦១៧លានដុល្លារ។ ក្នុងនោះការនាំចូលប្រេងសាំងមានតម្លៃជាង៣៤២លានដុល្លារ កើនជាង១០៣% និងប្រេងម៉ាស៊ូតតម្លៃ៦២៩លានដុល្លារកើនជាង៤០% បើធៀបនឹងរយៈពេលដូចគ្នាកាលពីឆ្នាំមុន។
យើងកត់សម្គាល់ឃើញថា ក្រោយរុស្ស៊ីវាយចូលឈ្លានពានអ៊ុយក្រែនបានជំរុញឲ្យតម្លៃប្រេងឥន្ធនៈសកលរួមទាំងកម្ពុជាបានហក់ឡើងថ្លៃជាបន្តបន្ទាប់ ដែលបាននិងកំពុងរុញច្រានឲ្យប្រទេសជាច្រើនជួបបញ្ហាការកើនឡើងអត្រាអតិផរណា ដែលបង្កឡើងដោយការកើនឡើងតម្លៃក្រុមទំនិញពាក់ព័ន្ធប្រេងឥន្ធនៈ និងការរអាក់រអួលខ្សែចង្វាក់ផ្គត់ផ្គង់។ បើតាមព្រឹត្តិបត្តិស្ថិតិសេដ្ឋកិច្ចនិងហិរញ្ញវត្ថុប្រចាំត្រីមាសទី១ឆ្នាំ២០២២របស់ក្រសួងសេដ្ឋកិច្ច និងហិរញ្ញវត្ថុ សន្ទស្សន៍តម្លៃប្រេងសាំងបានកើនឡើងជាង៣០% និងម៉ាស៊ូតកើនជាង៤០%។ បច្ចុប្បន្នសាំងធម្មតាលក់ចេញ៤,៨០០រៀលក្នុង១លីត្រ ខណៈម៉ាស៊ូត៥,៣០០រៀលក្នុង១លីត្រ៕
