តាមសមាគមមីក្រូហិរញ្ញវត្ថុកម្ពុជាអះអាងថា គិតចាប់ពីខែមីនា ឆ្នាំ២០២០ សមាគមបានប្រមូលទិន្និន័យការរៀបចំឥណទានឡើងវិញជារៀងរាល់សប្តាហ៍ពីសមាជិករបស់ខ្លួន រួមមាន គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យាហិរញ្ញវត្ថុ និងគ្រឹះស្ថានឥណទានជនបទ។ ទិន្នន័យនេះ ត្រូវប្រមូលឡើងក្នុងគោលបំណង តាមដានផលប៉ះពាល់ជាក់ស្តែងនៃជំងឺកូវីដ-១៩ ទៅលើអតិថិជន ការគាំពារអតិថិជនរបស់គ្រឹះស្ថានដែលជាសមាជិក និងការវិវត្តទូទៅនៃវិស័យមីក្រូហិរញ្ញវត្ថុទាំងមូល ដើម្បីធ្វើការវាយតម្លៃ និងផ្ញើរបាយការណ៍ជូនភាគីពាក់ព័ន្ធ។
លោក លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជាបានបញ្ជាក់ដែរថា ការរៀបចំឥណទានឡើងវិញនេះ វាគឺជាការជួយសម្រួលសម្រាប់អ្នកខ្ចីប្រាក់ដែលរងផលប៉ះពាល់ព្រោះ កូវីដ-១៩ ដោយសារតែពួកគាត់មិនមានលទ្ធភាពបង់សងត្រឡប់តាមកាលកំណត់។ ដូច្នេះ ឥណទាននេះ ជាទូទៅ គេចាត់ទុកថា ជាឥណទានខូច ហើយអ្នកខ្ចីក៏ត្រូវជាប់ឈ្មោះនៅក្នុងការិយាល័យឥណទានកម្ពុជាផងដែរ។ ប៉ុន្ដែ ដោយសារតែមានលក្ខខណ្ឌពិសេស តាមរយៈការរៀបចំឥណទានឡើងវិញនេះ អ្នកខ្ចីដែលជួបបញ្ហាសងត្រឡប់ មិនត្រូវបានចាត់ចូលជាកម្ចីខូចនោះទេ ហើយក្នុងកាលៈទេសៈនេះ អ្នកខ្ចីប្រាក់ ក៏ត្រូវបានអនុញ្ញាតឲ្យបង់តែការប្រាក់ ដោយមិនបាច់បង់ប្រាក់ដើម ឬមានការផ្អាកការបង់សងប្រាក់ពី ៣ ទៅ៦ខែ ទៅតាមផលប៉ះពាល់ជាក់ស្ដែង តាមការសិក្សានិងវាយតម្លៃរបស់គ្រឹះស្ថានមីក្រូហិរញ្ញវត្ថុនីមួយៗ។
អត្ថបទទាក់ទង!
ថ្លែងនៅក្នុងសិក្ខាសាលាមួយនាពេលថ្មីៗនេះ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានលើកឡើងថា ធនាគារជាតិ បានដាក់ចេញនូវវិធានការមួយចំនួនចំពោះគ្រឹះស្ថានធនាគារ និងហិរញ្ញវត្ថុ ដែលស្ថិតក្រោមដែនសមត្ថកិច្ចរបស់ធនាគារជាតិ ដែលរួមមាន ការកំណត់អត្រាការប្រាក់ឥណទាន និងវិធីសាស្ត្រគណនាអត្រាការប្រាក់, ការរៀបចំឥណទានឡើងវិញក្នុងអំឡុងពេលនៃការប៉ះពាល់នៃការរីករាលដាលនៃមេរោគកូវីដ-១៩, ការស្នើសុំឲ្យគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុអនុគ្រោះបន្ធូរបន្ថយកម្រៃសេវាផ្សេងៗពាក់ព័ន្ធនឹងឥណទាន និងការលើកលែងការផាកពិន័យផ្សេងៗចំពោះអតិថិជនជាដើម។
ជាមួយគ្នានេះដែរ លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុនៅកម្ពុជា បានលើកឡើងថា សមាជិករបស់សមាគមទាំង ១០៣ គ្រឹះស្ថាន បានបង្ហាញពីការប្តេជ្ញាចិត្ត នឹងដោះស្រាយបញ្ហាជាមួយនឹងអតិថិជនរបស់ខ្លួនប្រកបដោយភាពទន់ភ្លន់ និងឈ្នះ-ឈ្នះ ក្នុងអំឡុងពេលដ៏លំបាកដោយសារតែកូវីដ-១៩នេះ។
គិតត្រឹមដំណាច់ខែមេសា ឆ្នាំ២០២០ ចំនួនអ្នកខ្ចីប្រាក់ពីគ្រឹះស្ថានមីក្រូហិរញ្ញវត្ថុនៅកម្ពុជា មានជាង ២,២លាននាក់ និងមានទំហំឥណទានសរុប ជាង ៣០ទ្រីលានរៀល (៧,៤ប៊ីលានដុល្លា) ខណៈអតិថិជនបញ្ញើសរុបមានចំនួន ជាង ២,៨លាននាក់ និងមានទំហំប្រាក់បញ្ញើសរុប ជាង១៤ទ្រីលានរៀល (៣,៦ប៊ីលានដុល្លា)៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
