គម្រោងផ្សារទំនើបអ៊ីអនម៉លទី ៣នៅកម្ពុជា បានក្លាយជាគម្រោងធំមួយ នៅក្នុងផែនការយុទ្ធសាស្រ្តពង្រីកសក្តានុពលនៅក្នុងតំបន់ ហើយវាបានចូលរួមចំណែកដល់ការពង្រីកចំណូលនៅក្រៅប្រទេសរបស់ ក្រុមហ៊ុនជប៉ុនមួយនេះ ដែលគ្រោងនឹងបង្កើនប្រាក់ចំណូលប្រតិបត្តិការរបស់ខ្លួនពី ៥៨០លានដុល្លារអាមេរិក នៅក្នុងឆ្នាំ ២០១៩ ឲ្យកើនដល់ជិត ១ពាន់លានដុល្លារអាមេរិក នៅក្នុងឆ្នាំ ២០២៥ ពោលគឺ ពង្រីកប្រាក់ចំណូលពីអាជីវកម្មក្រៅប្រទេសឲ្យកើនពី ១២% ទៅ ៣៥%។
បើតាមរបាយការណ៍របស់ ផ្សារទំនើបអ៊ីអន បានគូសបញ្ជាក់ថា ផ្សារទំនើបអ៊ីអនទី ២ ដែលបានវិនិយោគនៅក្នុងឆ្នាំ ២០១៨កន្លងទៅ មានទុនវិនិយោគជាង ១២០លានដុល្លារអាមេរិក គឺជាផ្សារទំនើបលក់រាយធំជាងគេនៅក្នុងតំបន់ ហើយចំពោះសាខាទី ៣ ដែលគ្រោងនឹងបញ្ចប់នៅឆ្នាំ ២០២៣ គឺធំជាងនេះទៅទៀត។
អត្ថបទទាក់ទង!
ផ្សារទំនើបអ៊ីអនទី ៣ ដែលមានផ្ទៃក្រឡា ១៧ម៉ឺនម៉ែត្រការ៉េ ត្រូវបានសាងសង់ឡើង ដោយក្រុមហ៊ុន Hyundai Engineering នៅក្នុងគម្រោងអភិវឌ្ឍន៍ទីក្រុងរណប ING City ដែលក្នុងនោះ មានការអភិវឌ្ឍសាងសង់ផ្សារទំនើបធំៗចំនួន ២ ដោយក្រុមហ៊ុន ប៉េង ហួត គ្រុប និងផ្សារទំនើបរបស់ ក្រុមហ៊ន ជីប ម៉ុង ផងដែរ។
បើតាមអ្នកជំនាញអចលនវត្ថុ ដែលបានអះអាងប្រាប់សារព័ត៌មាន Nikkei បានគូសបញ្ជាក់ថា អ្នកអភិវឌ្ឍន៍ក្នុងស្រុក បានមើលឃើញពី ឱកាសនៃការចាប់ចំណែកទីផ្សារក្នុងស្រុក ដោយពួកគេ ចាប់ផ្តើមសាងសង់គម្រោងផ្សារធំៗ និងយីហោផ្ទាល់ខ្លួន ដែលគ្រោងនឹងបញ្ចប់ក្នុងពេលឆាប់ៗខាងមុខនេះ ហើយវានឹងធ្វើឲ្យការផ្គត់ផ្គង់ផ្សារទំនើបនៅកម្ពុជា កាន់តែគ្រប់គ្រាន់ និងអាចលើសពីតម្រូវការ បើសិនជា ប្រាក់ចំណូលរបស់ប្រជាពលរដ្ឋកម្ពុជា ទទួលរងឥទ្ធិពលពីវិបត្តិមេរោគកូវីដ-១៩ ក្នុងរយៈពេលយូរ។
គួររម្លឹកបន្តិចថា កាលពីចុងឆ្នាំ ២០១៩កន្លងទៅ ក្រុមប្រឹក្សាអភិវឌ្ឍន៍កម្ពុជា បានអនុម័តជាស្ថាពរលើ គម្រោងវិនិយោគសាងសង់ ផ្សារទំនើប អ៊ីអន សាខាទី ៣ ដែលចាប់ផ្តើមជាមួយទុនវិនិយោគប្រមាណ ២៩០លានដុល្លារអាមេរិកនោះ ដែលនឹងលេចរូបរាង តាមបណ្តោយមហាវិថីសម្តេច តេជោ ហ៊ុន សែន ឬហៅថា ផ្លូវ ៦០ម៉ែត្រ ស្ថិតនៅភូមិព្រែកតាឡុង ៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ៕
None
