លោក Tony Fernandes អគ្គនាយកប្រតិបត្តិនៃក្រុមហ៊ុន AirAsia Group បានបង្ហាញក្តីរំពឹងថា ស្ថានភាពនៃការហោះហើរតាមផ្លូវអាកាស នឹងត្រលប់មករកសភាពដើមវិញ ក្នុងចន្លោះពេល ៦ខែ ទៅ ១២ខែខាងមុខនេះ ហើយតម្រូវការហោះហើររបស់មនុស្សទូទាំងសកលលោក នឹងផ្ទុះឡើងវិញ ដែលជាចំណុចសំខាន់គួរតែចាប់អារម្មណ៍ និងចាប់ផ្តើមការវិនិយោគ។
លោកបន្តថា ជាក់ស្តែងដូចទីផ្សារអាកាសចរណ៍ក្នុងប្រទេសថៃ កំពុងតែវិលត្រលប់មករកសភាពដើមវិញហើយ គឺដូចទៅនឹងស្ថានភាពមុនពេលវិបត្តិកូវីដ-១៩ ហើយតម្លៃសំបុត្រធ្វើដំណើរ គឺនៅដូចដើម។
បើតាមផែនការរបស់ក្រុមហ៊ុន គឺមានបំណងវិនិយោគជាង ៦០០លានដុល្លារអាមេរិក ហើយក្រុមហ៊ុន មានសុទិដ្ឋិនិយមខ្ពស់សម្រាប់ឆ្នាំ ២០២១ខាងមុខនេះ។
អត្ថបទទាក់ទង!
លោក Tony បន្ថែមថា នៅពេលណាមួយដែលត្រឹមត្រូវ ក្រុមហ៊ុននឹងធ្វើសេចក្តីប្រកាសអំពីគម្រោងវិនិយោគនេះ ហើយចំណុចខ្លាំងរបស់ក្រុមហ៊ុន គឺនៅក្នុងតំបន់អាស៊ីអាគ្នេយ៍ ដែលជាគោលដៅពង្រីកអាជីវកម្មនាពេល ២ ទៅ ៣ឆ្នាំខាងមុខនេះ។
ទោះយ៉ាងណាក៏ដោយ ក្រុមហ៊ុន AirAsia បានពង្រឹងយុទ្ធសាស្រ្តរបស់ខ្លួន ដោយផ្តោតទៅលើ អាជីវកម្មឌីជីថល អំឡុងពេលវិបត្តិកូវីដ១៩ ហើយក្រុមហ៊ុន ក៏កំពុងតែស្នើសុំអាជ្ញាប័ណ្ណធនាគារឌីជីថល នៅក្នុងប្រទេសម៉ាឡេស៊ី និង ២ប្រទេសទៀត ក្នុងតំបន់អាស៊ីអាគ្នេយ៍ ដែលគ្រោងនឹងផ្តល់សេវាកម្មផ្ទេរប្រាក់ ផ្តល់កម្ចី ធានារ៉ាប់រង និងគ្រប់គ្រងទ្រព្យសម្បត្តិជាដើម៕
None
