AirAsia ជប៉ុន ប្រកាសក្ស័យធនហើយ, ក្លាយជាអាកាសចរណ៍ដំបូងគេបំផុតនៅជប៉ុនដែលដួលរលំក្នុងពេលកូវីដ-១៩

ក្រុមហ៊ុនអាកាសចរណ៍ AirAsia ជប៉ុន បានដាក់ពាក្យសុំប្រកាសក្ស័យធនហើយ នៅតុលាការស្រុកតូក្យូ នៅថ្ងៃអង្គារ (ទី១៧ វិច្ឆិកា)ម្សិលមិញនេះ ដោយជំពាក់បំណុលជិត ២១០លានដុល្លារអាមេរិក ហើយបានក្លាយជាក្រុមហ៊ុនអាកាសចរណ៍ដំបូងគេបំផុតនៅក្នុងប្រទេសជប៉ុន ដែលរកស៊ីដួលរលំក្នុងអំឡុងពេលកូវីដ-១៩ ។

AirAsia ជប៉ុន ប្រកាសក្ស័យធនហើយ, ក្លាយជាអាកាសចរណ៍ដំបូងគេបំផុតដែលដួលរលំក្នុងពេលកូវីដ-១៩

ការប្រកាសក្ស័យធននេះ ធ្វើឡើងបន្ទាប់ពីក្រុមហ៊ុនមេ AirAsia របស់ម៉ាឡេស៊ី បានកាត់ផ្ដាច់ជំនួយទៅឲ្យក្រុមហ៊ុនបុត្រសម្ព័ន្ធនៅជប៉ុនមួយនេះ ខណៈដែលវិស័យធ្វើដំណើរតាមផ្លូវអាកាសបានធ្លាក់ចុះជាសាកល ដោយសារជំងឺឆ្លងរាតត្បាតកូវីដ-១៩ ។

អតិថិជនដែលបានកក់ទិញសំបុត្រហើយ ជាង ២ម៉ឺន៣ពាន់នាក់ មិនបានទទួលសំណងសម្រាប់ការលុបចោលជើងហោះហើរនៅឡើយទេ ។ នេះបើយោងតាមការផ្សាយរបស់សារព័ត៌មាន Nikkei របស់ជប៉ុន ។ ក្រុមហ៊ុនមេ AirAsia និយាយថា ខ្លួននឹងផ្ដល់ជាឥណទានដែលអាចប្រើប្រាស់សម្រាប់ការហោះហើរអន្តរជាតិ ជាមួយនឹងក្រុមហ៊ុនអាកាសចរណ៍ជាបុត្រសម្ព័ន្ធផ្សេងៗទៀត ។

បន្ទាប់ពីលុបចោលជើងហោះហើរដោយចាប់ផ្ដើមពីខែមេសាមក AirAsia ជប៉ុន បានប្រកាសកាលពីខែតុលាអំពីការបញ្ឈប់ការហោះហើរសម្រាប់គ្រប់ផ្លូវហោះហើរទាំងអស់របស់ខ្លួន ហើយភាគច្រើនបំផុតនៃបុគ្គលិកជិត ៣០០នាក់របស់ខ្លួន បានត្រូវឲ្យឈប់ពីការងារ កាលពីដើមខែវិច្ឆិកា ដោយទុកបុគ្គលិកតែប្រហែល ៥០នាក់ប៉ុណ្ណោះ ដើម្បីចាត់ចែងការងារលក់ទ្រព្យក្រុមហ៊ុនដើម្បីសងបំណុល ៕