រ៉យទ័រ បានផ្សាយដោយយោងប្រភពពីរដែលសុំមិនបញ្ចេញឈ្មោះ ថា លោក មហាធៀ បានដាក់លិខិតសុំលាលែងពីមុខតំណែង ទៅកាន់ព្រះមហាក្សត្ររួចហើយ។
អ្នកនាំពាក្យខុទ្ទកាល័យនាយករដ្ឋមន្ត្រី មិនបានផ្ដល់អត្ថាធិប្បាយអ្វីចំពោះដំណឹងនេះទេ ប៉ុន្តែ បាននិយាយថា នឹងមានការចេញសេចក្ដីថ្លែងការណ៍ជាផ្លូវការឆាប់ៗនេះ។
លោក មហាធៀ បច្ចុប្បន្ន មានអាយុ ៩៤ឆ្នាំ បានឡើងកាន់តំណែងជាលើកទីពីរ ជានាយករដ្ឋមន្ត្រីម៉ាឡេស៊ី កាលពីខែឧសភា ឆ្នាំ២០១៨។
សារព័ត៌មាន អាល់ហ្សាហ្ស៊ីរ៉ា បានផ្សាយថា ការលាលែងពីតំណែងរបស់លោក មហាធៀ ជាការបើកផ្លូវដល់លទ្ធភាពនៃការបង្កើតរដ្ឋាភិបាលថ្មី។ ការសម្រេចចិត្តរបស់លោក មហាធៀ ធ្វើឡើងនៅក្រោយពេលមានការខ្វែងគំនិតគ្នាផ្នែកនយោបាយកាលពីចុងសប្ដាហ៍ បន្ទាប់ពីមានសេចក្ដីរាយការណ៍ថា គណបក្សរបស់លោកមានផែនការបង្កើតរដ្ឋាភិបាលថ្មី ដែលនឹងផាត់លោក អាន់វ៉ា អ៊ីប្រាហ៊ីម ចេញ។
អត្ថបទទាក់ទង
លោក មហាធៀ និងលោក អាន់វ៉ា ជាឥស្សរជននយោបាយដ៏លេចធ្លោពីររូបរបស់ម៉ាឡេស៊ី។ លោកទាំងពីររួបរួមគ្នានៅមុនការបោះឆ្នោតឆ្នាំ២០១៨ ដែលបានយកជ័យជំនះលើគណបក្ស Barisan Nasional ដែលបានគ្រប់គ្រងប្រទេសម៉ាឡេស៊ីអស់ ៦ទសវត្សរ៍ និងបានទម្លាក់អតីតនាយករដ្ឋមន្ត្រី លោក ណាជីប រ៉ាហ្សាក់។
ប៉ុន្តែ ភាពតានតឹងរវាងអ្នកនយោបាយល្បីទាំងពីររូបនេះ បានកើតឡើងកាន់តែពុះកញ្ជ្រោល ដោយសារលោក មហាធៀ ជំទាស់ក្នុងការកំណត់ពេលវេលាជាក់លាក់ក្នុងការរក្សាពាក្យសន្យារបស់លោក ដើម្បីផ្ទេរអំណាចទៅឲ្យលោក អាន់វ៉ា។
លោក អាន់វ៉ា សព្វថ្ងៃ អាយុ ៧២ឆ្នាំ ធ្លាប់ជាឧបនាយករដ្ឋមន្ត្រីរបស់លោក មហាធៀ ក្នុងអំឡុងអាណត្តិរបស់លោកពីឆ្នាំ១៩៨១ ដល់ឆ្នាំ២០០៣ ប៉ុន្តែ ត្រូវលោក មហាធៀ បណ្ដេញចេញនៅឆ្នាំ១៩៩៨ បន្ទាប់ពីខ្វែងគំនិតគ្នាលើរបៀបដោះស្រាយវិបត្តិហិរញ្ញវត្ថុនៅគ្រានោះ៕
