ក្រុមហ៊ុនអាកាសចរណ៍ជប៉ុន ANA បានបញ្ជាក់ថា ប្រាក់ខាតបង់សុទ្ធរបស់ក្រុមហ៊ុននៅអំឡុងត្រីមាសទី២ នៅឆ្នាំ២០២០នេះ ពោលគឺ ពីខែមេសា ដល់ខែមិថុនា មានតម្លៃជាទឹកប្រាក់ដល់ទៅប្រមាណ១ពាន់លានដុល្លារអាមេរិក ដែលការខាតបង់នេះ គឺជាតួលេខប្រចាំត្រីមាសដ៏អាក្រក់បំផុតមួយ តាំងពីក្រុមហ៊ុននេះ ចាប់ផ្ដើមចេញតួលេខហិរញ្ញវត្ថុប្រចាំត្រីមាសកាលពីឆ្នាំ២០០៣មកម្ល៉េះ។
ការខាតបង់ប្រតិបត្តិការរបស់ក្រុមហ៊ុនអាកាសចរណ៍ជប៉ុនមួយនេះ បានកើនដល់ទៅ ជាង១.៥០០ លានដុល្លារអាមេរិក ធៀបនឹងប្រាក់ចំណេញប្រតិបត្តិការកាលពីឆ្នាំមុនមានជាង១៥០លានដុល្លារ ជាមួយនឹងការលក់មានតម្លៃជាង ១.១៥០ លានដុល្លារអាមេរិក ធ្លាក់ចុះជិត ៧៦%។
អត្ថបទទាក់ទង!
នាយកប្រតិបត្តិផ្នែកហិរញ្ញវត្ថុ របស់ក្រុមហ៊ុន ANA Holdings លោក អ៊ីឈីរ៉ូ ហ្វូកូហ្សាវ៉ា បានថ្លែងនៅក្នុងសេចក្ដីថ្លែងការណ៍ថា «តម្រូវការអ្នកដំណើរទាំងជើងហោះហើរក្នុងស្រុក និងអន្តរជាតិ បានធ្លាក់ចុះយ៉ាងខ្លាំង ដោយសារតែរដ្ឋាភិបាលនៃប្រទេសទូទាំងពិភពលោកមានការរឹតបន្ដឹងលើការធ្វើដំណើរ និងការប្រកាសដាក់ប្រទេសក្នុងគ្រាអាសន្នពីសំណាក់រាជរដ្ឋាភិបាលជប៉ុនជាដើម។» លោក អ៊ីឈីរ៉ូ បន្ថែមថា ក្រុមហ៊ុន ANA នឹងព្យាយាមការបន្ថយថ្លៃដើម និងការចាត់វិធានការផ្សេងៗដើម្បីបន្ធូរបន្ថយការខូចខាតនៅអំឡុងពេលនេះ។
ទោះយ៉ាងណាក្រុមហ៊ុនអាកាសចរណ៍ ANA មិនបានបញ្ជាក់ពីការព្យាករ អំពីការខាតបង់សរុបនៅឡើយទេ ដោយសារតែស្ថានភាពនៃការរីករាលដាលនៃមេរោគស្ថិតនៅក្នុងភាពមិនច្បាស់លាស់នៅឡើយ។
នៅក្នុងខែមិថុនាកន្លងទៅ ក្រុមហ៊ុន ANA បានបើកជើងហោះហើរក្នុងស្រុក បានប្រមាណ២៥% ធៀបនឹងរយៈពេលដូចគ្នាកាលពីឆ្នាំមុន ស្របពេលដែលរាជរដ្ឋាភិបាលជប៉ុនបានជំរុញការបើកសេដ្ឋកិច្ចឡើងវិញ។
នៅខែកក្កដា នេះ ក្រុមហ៊ុននេះ ក៏បានបង្ហាញពីផែនការនឹងធ្វើឲ្យប្រតិបត្តិការជើងហោះហើរក្នុងស្រុកមានដល់ជាង៤៣% នៃជើងហោះហើរដែលធ្លាប់ទទួលបានកាលពីខែកក្កដាឆ្នាំមុន និងបន្ដឲ្យបានដល់ទៅជាង ៧២% នៅខែសីហា។
ដោយឡែក ចំពោះប្រតិបត្តិការដឹកទំនិញវិញ ក្រុមហ៊ុន ANA គឺរងផលប៉ះពាល់តិចតួចប៉ុណ្ណោះ ដោយសារតែមានតម្រូវការដឹកជញ្ជូននូវសម្ភារផ្គត់ផ្គង់បន្ទាន់នានា ដូចជាផលិតផលម៉ាសជាដើម ពោលគឺ ចំណូលពីប្រតិបត្តិការដឹកជញ្ជូនអន្តរជាតិ មានការធ្លាក់ចុះតែ២,៧% ប៉ុណ្ណោះ ខណៈដែលការដឹកជញ្ជូនក្នុងស្រុកធ្លាក់ចុះជាង៤១%៕
None
