រោងចក្ររបស់ Foxconn ក្នុងក្រុងចឹងចូវ នៃខេត្តហ៊ឺណាននេះ គឺជារោងចក្រដ៏ធំបំផុតមួយក្នុងប្រទេសចិន ដែលដំឡើងផលិតផលសម្រាប់ក្រុមហ៊ុនអាមេរិក Apple ក្នុងនោះ រួមមានទាំង iPhone 14 ផងដែរ។
បើតាមប្រភពមួយប្រាប់សារព័ត៌មាន Reuters ឱ្យដឹងថា បញ្ហាកូវីដ១៩ ក្នុងរោងចក្រនេះ នឹងកាត់បន្ថយការដឹកជញ្ជូនទូរសព្ទ iPhone រហូតដល់ ៣០% នៅក្នុងខែវិច្ឆិកា ឆ្នាំ២០២២នេះ។ តែយ៉ាងណា Foxconn កំពុងជំរុញការផលិត iPhone នៅរោងចក្ររបស់ខ្លួនដែលស្ថិតនៅក្រុងស៊ីនជិនវិញហើយ។
បើតាមការបញ្ជាក់របស់ក្រុមហ៊ុន Foxconn កាលពីថ្ងៃទី៣០ ខែតុលា ឱ្យដឹងថា ស្ថានភាពនេះកំពុងត្រូវបានគ្រប់គ្រងមកវិញជាបណ្តើរៗ ហើយក្រុមហ៊ុននឹងសម្របសម្រួលការផលិតជាមួយរោងចក្ររបស់ខ្លួនផ្សេងៗទៀត ដើម្បីកាត់បន្ថយផលប៉ះពាល់។ ទោះយ៉ាងណា ក្រុមហ៊ុនតៃវ៉ាន់នេះមិនបានបញ្ជាក់ពីចំនួនអ្នកឆ្លងកូវីដ១៩ ក្នុងរោងចក្រដែលមានកម្មករប្រមាណ ២០ម៉ឺននាក់របស់ខ្លួននេះឡើយ។
អត្ថបទគួរអាន
ក្រុមហ៊ុនបន្តថា ចំពោះការធ្វើចត្តាឡីស័ករបស់កម្មករខ្លួន គឺអាជ្ញាធរបានផ្តល់អាហារសម្រាប់ពួកគេ។ ក្នុងពេលហ្នឹងដែរ បើមានកម្មករណាចង់ទៅផ្ទះវិញ គឺខាងរោងចក្រមិនហាមឃាត់ទេ ហើយថែមទាំងសហការជាមួយអាជ្ញាធរ ដើម្បីរៀបចំរថយន្តសម្រាប់ដឹកជូនទៀតផង។
យោងតាមរូបភាព និងវីដេអូជាច្រើនដែលបានបង្ហោះនៅលើបណ្តាញសង្គមចិន កាលពីថ្ងៃទី៣០ ខែតុលា បានបង្ហាញពីកម្មកររបស់ក្រុមហ៊ុន Foxconn បានចាកចេញពីរោងចក្រទៅផ្ទះពួកគេវិញទាំងយប់ ដោយមានទាំងកាបូបខោអាវ និងភួយទៅជាមួយ។
គួររំលឹកថា កាលពីសប្តាហ៍មុន ក្រុមហ៊ុន Apple បានប្រកាសពីប្រាក់ចំណូលប្រចាំឆ្នាំរបស់ខ្លួនគិតត្រឹមថ្ងៃទី២៤ ខែកញ្ញា ឆ្នាំ២០២២ គឺមានចំនួនជាង ៣៩៤ ពាន់លានដុល្លារ កើនឡើង ៨% បើប្រៀបធៀបនឹងឆ្នាំមុន។ បើគិតត្រឹមតែត្រីមាសទី៤ នៃឆ្នាំសារពើពន្ធ ២០២២ របស់ Apple គឺមានចំនួនជាង ៩០ពាន់លានដុល្លារ កើនឡើង ៨% ផងដែរ។ ចំពោះការលក់ទូរសព្ទខ្សែស្រលាយ iPhone 14 ដែលទើបចេញកាលពីខែមុននោះ គឺមានចំនួនដល់ទៅជាង ៤២ពាន់លានដុល្លារ កើនឡើង ១០% ប្រៀបធៀបនឹងរយៈពេលដូចគ្នាកាលពីឆ្នាំមុន។ ចំនួននេះ គឺបានចូលរួមចំណែកជិតពាក់កណ្តាលនៃចំណូលសរុបរបស់ Apple៕
អត្ថបទ៖ នៅ សំភី
