លោក ចាន់ សីហា អគ្គនាយករងធនាគារអភិវឌ្ឍន៍ជនបទ និងកសិកម្មបានលើកឡើងថា តម្រូវការទុនពីសំណាក់ពលរដ្ឋនៅក្នុងវិស័យកសិកម្មក្នុងអំឡុងនៃវិបត្តិកូវីដ-១៩ មានការកើនឡើងខ្ពស់ជាងពេលធម្មតា។ កត្តានេះ បានធ្វើឲ្យការផ្តល់ឥណទានរបស់ធនាគារ អភិវឌ្ឍន៍ជនបទ និងកសិកម្ម ក្រោមកិច្ចសហការជាមួយរាជរដ្ឋាភិបាលមានការកើនឡើងខ្លាំងគួរឲ្យកត់សម្គាល់ដែរ។ បើតាមការអះអាងកន្លងមករបស់ធនាគារអភិវឌ្ឍន៍ជនបទ និងកសិកម្ម ក្នុងរយៈពេល៣ដើមឆ្នាំ២០២១ ទុនឥណទានរបស់រដ្ឋប្រមាណ៥៥លានដុល្លារប្រើអស់ប្រមាណតែ៤៥% តែប៉ុណ្ណោះ។ ប៉ុន្ដែ គិតមកទល់ពេលនេះ ដើមទុនទាំង៥៥លានដុល្លារនោះ ត្រូវបាន ធនាគារអភិវឌ្ឍន៍ជនបទ និងកសិកម្ម (ARDB) ផ្តល់កម្ចីជូនពលរដ្ឋអស់ហើយ ដោយភាគច្រើនផ្តល់ជូនពលរដ្ឋ ដែលប្រកបរបរលើវិស័យវារីវប្បកម្ម ចិញ្ចឹមសត្វ និងដាំបន្លែ។
អត្ថបទទាក់ទង!
បើទោះបីជា ដើមទុនកម្ចីត្រូវបានប្រើប្រាស់អស់ក៏ដោយ ប៉ុន្ដែមន្ត្រីជាន់ខ្ពស់ធនាគារអភិវឌ្ឍន៍ជនបទ និងកសិកម្មរូបនេះ មិនបានបង្ហាញពីគម្រោងរបស់ធនាគារ ក្នុងការស្នើសុំទុនឥណទានបន្ថែមពីរាជរដ្ឋាភិបាលនៅឡើយទេ ខណៈបច្ចុប្បន្នតម្រូវការឥណទានកសិកម្មកំពុងមានការកើនឡើងកាន់តែច្រើន។
គួររំលឹកថា រាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទ និងកសិកម្ម នៅឆ្នាំ២០២១ បានបង្កើនដើមទុនដល់៥៥លានដុល្លារអាមេរិក ដើម្បីផ្តល់ប្រាក់កម្ចីអត្រាការប្រាក់ទាបជូនកសិករដាំដុះបន្លែ និងចិញ្ចឹមសត្វ ក្នុងន័យជួយលើកកម្ពស់ និងអភិវឌ្ឍន៍វិស័យកសិកម្មនៅកម្ពុជា។ ប៉ុន្ដែ ទំហំដើមទុននេះ ហាក់មិនទាន់ឆ្លើយតបបានគ្រប់គ្រាន់នៅឡើយ ទៅនឹងតម្រូវការរបស់ប្រជាកសិករកម្ពុជា ពិសេសអំឡុងពេលមានមេរោគរាតត្បាតកូវីដ-១៩នេះ។ តួយ៉ាង ត្រឹមតែជិតពាក់កណ្ដាលឆ្នាំ២០២១នេះ ដើមទុន៥៥លានដុល្លារ ត្រូវបានប្រើប្រាស់អស់ស្រាច់បាច់ទៅហើយ ហើយគេរំពឹងរដ្ឋាភិបាលនឹងអាចបន្ដទម្លាក់ដើមទុនបន្ថែមទៀតសម្រាប់កសិករ៕
None
