លោក Johnson បានប្រកាសកាលពីថ្ងៃព្រហស្បតិ៍ម្សិលមិញនេះថា លោកនឹងលាលែងពីតំណែងនាយករដ្ឋមន្ត្រី ហើយការជ្រើសរើសអ្នកមកជំនួសលោកអាចចំណាយពេលច្រើនសប្តាហ៍ទៀត ដែលនឹងធ្វើឱ្យប្រទេសដែលសេដ្ឋកិច្ចធំជាងគេទី៥ក្នុងពិភពលោកមួយនេះប្រឈមនឹងហានិភ័យនៃការរសាត់បន្ថែមទៀត នៅពេលដែលរូបិយវត្ថុរបស់ចក្រភពអង់គ្លេសក៏បានធ្លាក់ជិតដល់កម្រិតទាបបំផុតក្នុងរយៈពេល ២ ឆ្នាំធៀបនឹងប្រាក់ដុល្លារអាមេរិក ហើយធនាគារកណ្ដាលអង់គ្លេសស្ថិតក្នុងស្ថានភាពកាន់តែលំបាក ដោយប្រហែលជានឹងត្រូវដំឡើងអត្រាការប្រាក់ ជាមួយនឹងការធានាមិនធ្វើឱ្យប៉ះពាល់ដល់សកម្មភាពសេដ្ឋកិច្ច។
ក្នុងអំឡុងពេលនៃការប្រកួតប្រជែងដឹកនាំគណបក្សអភិរក្សនេះ មានការប្រែប្រួលផ្សេងៗគ្នា។ លោកស្រី Theresa May ត្រូវការពេលវេលាតិចជាង៣សប្តាហ៍ ដើម្បីឡើងគ្រប់គ្រងតំណែងនាយករដ្ឋមន្ត្រីអង់គ្លេស បន្ទាប់ពីលោក David Cameron បានលាឈប់នៅឆ្នាំ២០១៦ ចំណែកគូប្រជែងខ្លះទៀតបានបោះបង់ចោលការប្រកួតក៏មានដែរ។
ប៉ុន្តែលោក ចនសុន បានចំណាយពេល២ខែ ដើម្បីក្លាយជាអ្នកដឹកនាំថ្មី បន្ទាប់ពីលោកស្រី Theresa May បានប្រកាសពីបំណងលាលែងពីតំណែងនៅឆ្នាំ២០១៩ ហើយនៅពេលលោក ចនសុន បានប្រកាសពីលាលែងពីតំណែងនេះ គឺមានបេក្ខជនយ៉ាងតិចជិត១០នាក់ត្រូវគេរំពឹងទុកថានឹងចូលរួមប្រកួតប្រជែងយកតំណែងនេះ។
អ្វីចោទជាបញ្ហានោះ គឺថាតើសេដ្ឋកិច្ចរបស់ចក្រភពអង់គ្លេសនឹងប្រែទៅជាយ៉ាងណានៅក្រោយពេលលោក បូរីស ចនសុន បានសម្រេចចិត្តលាឈប់ពីតំណែងនាយករដ្ឋមន្ត្រីអង់គ្លេសហើយនោះ នៅចំពេលដែលសេដ្ឋកិច្ចប្រទេសនេះ កំពុងរង្គោះរង្គើ0x017d7
ចក្រភពអង់គ្លេសកំពុងមានរងសម្ពាធនៃអត្រាអតិផរណាដែលកំពុងដំណើរការក្នុងកម្រិតខ្ពស់មិនធ្លាប់មានរយៈពេល ៤០ ឆ្នាំមកនេះគឺឡើងដល់ ៩.១% ឯណោះ ហើយធនាគារកណ្ដាលអង់គ្លេស (BoE) គិតថាវានឹងកើនឡើងដល់ ១១% នៅចុងឆ្នាំនេះ។
អត្ថបទគួរអាន
មូលនិធិរូបិយវត្ថុអន្តរជាតិបាននិយាយកាលពីខែមេសាថា ចក្រភពអង់គ្លេសនឹងប្រឈមមុខអតិផរណាកើនឡើង និងកំណើនយឺតជាងប្រទេស ដែលមានសេដ្ឋកិច្ចធំៗផ្សេងទៀតនៅក្នុងឆ្នាំ២០២៣។
ការធ្លាក់ចុះតម្លៃលុយស្ទឺលីង (Sterling) ដែលជារូបិយវត្ថុផ្លូវការរបស់ចក្រភពអង់គ្លេស ថ្មីៗនេះបានបន្ថែមទៅលើសម្ពាធអតិផរណាចាប់តាំងពីពេលនោះមក ទោះបីជាការរំពឹងទុកនៃការកើនឡើងនៃការចំណាយសាធារណៈ ឬក៏ការកាត់បន្ថយពន្ធ ដើម្បីបង្កើនប្រជាប្រិយភាពរបស់គណបក្សអភិរក្សនិយម បានជំរុញឱ្យលុយផោនកើនឡើងមួយកម្រិតទៀតក៏ដោយ។
ដូច្នេះហើយគ្រប់អ្នកដែលឡើងកាន់តំណែងជំនួសលោក ចនសុន គឺត្រូវតែខិតខំធ្វើការងារជាច្រើន ដើម្បីទូទាត់ផលប៉ះពាល់នៃការកើនឡើងនៃតម្លៃថាមពល និងអាហារពិភពលោក ហើយមេដឹកនាំថ្មីនោះ ក៏ត្រូវសម្រេចចិត្តពីរឿងពន្ធដារ និងការចំណាយដែលអាចបន្ថយហានិភ័យ នៃការដាំក្បាលសេដ្ឋកិច្ច ប៉ុន្តែក៏ប្រហែលជាអាចបន្ថែមសម្ពាធអតិផរណានៅក្នុងសេដ្ឋកិច្ចក៏ថាបានដែរ។
ក្រុមអ្នកវិភាគនៅធនាគារ Citi នៅសហរដ្ឋអាមេរិកបាននិយាយថា ពួកគេរំពឹងថា គូប្រជែងក្នុងការដឹកនាំគណបក្សអភិរក្សនិយម គឺលោកស្រី Priti Patel ជារដ្ឋមន្ត្រីមហាផ្ទៃ និងលោកស្រី Liz Truss ជារដ្ឋមន្ត្រីការបរទេសរបស់លោក Johnson នោះអាចនឹងអំពាវនាវឱ្យកាត់បន្ថយពន្ធឆាប់រហ័ស និងបង្កើនការចំណាយថែមទៀត សម្រាប់រដ្ឋាភិបាលអង់គ្លេស៕
អត្ថបទ៖ សុខ ជា
