រុស្ស៊ី និងបេឡារុសដាក់ពង្រាយទ័ពនៅតាមព្រំដែនអ៊ុយក្រែនបន្ថែម ក្រោយបាញ់ស្រោចមីស៊ីលលើទីក្រុងធំៗរបស់អ៊ុយក្រែន
ក្រុមអ្នកវិភាគលោកខាងលិចបាននិយាយថា ក្រោយពីប្រទេសរុស្ស៊ីបានបាញ់ស្រោចមីស៊ីលចូលទីក្រុងធំៗរបស់អ៊ុយក្រែនកាលពីថ្ងៃចន្ទ ទី ១០ ខែតុលា បន្ទាប់ពីច…
ក្នុងកិច្ចប្រជុំកំពូលស្ត្រីអាស៊ានលើកទី២ ក្រោមប្រធានបទ «ការកសាងអនាគតប្រកបដោយចីរភាព បរិយាបន្ន និង កាន់តែរឹងមាំ៖បំផុសសហគ្រិនភាពរបស់ស្ត្រីនៅក្នុងអាស៊ាន» នេះដែរ សម្តេចតេជោ ហ៊ុន សែន កត់សម្គាល់ថាសេដ្ឋកិច្ចនៃបណ្ដាប្រទេសអាស៊ាន ពឹងផ្អែកខ្លាំងលើសហគ្រាសធុនមីក្រូ ធុនតូច និងមធ្យម ដែលដឹកនាំដោយស្ត្រី។
ជាក់ស្ដែង កម្ពុជាមានសហគ្រាសទាំងនេះរហូតដល់ទៅ ៩៨% នៃចំនួនសហគ្រាសសរុប ដែល បានចូលរួមចំណែកដល់សេដ្ឋកិច្ចជាតិប្រមាណ៥៨% និងបានផ្តល់ការងារប្រមាណ ៧៣%នៃការងារសរុប។ ក្នុងនោះមានសហគ្រាស៦១% ត្រូវបានបង្កើតឡើងនិងគ្រប់គ្រងដោយស្ត្រី។ ការណ៍នេះ បានធ្វើឱ្យរាជរដ្ឋាភិបាលកម្ពុជា កំណត់ និង ជំរុញការលើកតម្កើង ស្ត្រីជាឆ្អឹងខ្នងនៃការអភិវឌ្ឍសង្គម-សេដ្ឋកិច្ចជាតិ តាមរយៈការបង្កើនការវិនិយោគលើសមភាពយេនឌ័រ និង ការលើកកម្ពស់តួនាទីរបស់ស្ត្រី នៅក្នុងកិច្ចអភិវឌ្ឍនៅគ្រប់វិស័យ និង គ្រប់កម្រិត ។
បើតាមសម្តេច ហ៊ុន សែន ក្នុងក្របខណ្ឌអាស៊ាន ទាំងបច្ចុប្បន្ន និងទៅអនាគត ស្ត្រី នឹងបន្តដើរតួនាទីជាតួអង្គដ៏សំខាន់ ពិសេសក្នុងការស្តារ និងជំរុញកំណើនសេដ្ឋកិច្ចអាស៊ានឡើងវិញ ដែលវាទាមទារឱ្យមានការសហការគ្នាបង្កើតប្រព័ន្ធអេកូឡូស៊ី ដែលអំណោយផលដល់ការរីកលូតលាស់របស់សហគ្រិន និងដោះស្រាយបញ្ហាប្រឈមផ្សេងៗ។
នាយករដ្ឋមន្ត្រីកម្ពុជាមើលឃើញថា សហគ្រិនភាពរបស់ស្ត្រីនៅក្នុងតំបន់អាស៊ានបាន និង កំពុងប្រឈមឧបសគ្គជាច្រើនក្នុងការអភិវឌ្ឍ និងការគ្រប់គ្រង ពិសេសនៅតាមតំបន់ទីជនបទ ។ ម្យ៉ាងវិញទៀត ស្ត្រីភាគច្រើន ចាប់ផ្តើមដំណើរការអាជីវកម្មនៅកម្រិតមីក្រូ កម្រិតតូចៗនិងស្ថិតនៅក្រៅប្រព័ន្ធ ដោយភាគច្រើនមិនទាន់បានចុះបញ្ជីអាជីវកម្មផ្លូវការ។ វាអាចបង្កឱ្យមានការលំបាកដល់រដ្ឋាភិបាល ក្នុងការកំណត់ និងផ្ដល់ការគាំទ្រតាមការចាំបាច់។
សម្តេចតេជោ ហ៊ុន សែន បានផ្តល់ជាដំណោះស្រាយថាចំនួន៤ចំណុចដើម្បីដោះស្រាយបញ្ហានេះ ដោយក្នុងនោះរួមមាន៖
ទី១ - រៀបចំប្រព័ន្ធអេកូឡូស៊ីដែលឆ្លើយតបនឹងតម្រូវការរបស់សហគ្រាសធុន មីក្រូ តូច និង មធ្យម និងសហគ្រិនស្ត្រី។ កែលម្អក្របខណ្ឌគតិយុត្ត និង ផ្នត់គំនិតសង្គមដែលរារាំងដល់សក្តានុពលរបស់ស្ត្រីនៅក្នុងវិស័យសេដ្ឋកិច្ច។
ទី២ - ផ្តោតការយកចិត្តទុកដាក់លើការអភិវឌ្ឍធនធានមនុស្ស តាមរយៈកម្មវិធីលើកកម្ពស់ជំនាញ និងបណ្តុះបណ្តាលជំនាញថ្មី ដល់ស្ត្រី និងក្មេងស្រី រួមទាំងកម្មវិធីអប់រំផ្នែកវិទ្យាសាស្ត្រ បច្ចេកវិទ្យា វិស្វកម្ម និង គណិតវិទ្យា។
ទី៣ - លើកកម្ពស់បរិយាបន្នហិរញ្ញវត្ថុ និង ឌីជីថលសម្រាប់ស្ត្រីតាមរយៈការផ្តល់ចំណេះដឹងផ្នែកហិរញ្ញវត្ថុ ឌីជីថល និងការសម្រួលលទ្ធភាពទទួលឥណទាន ទីផ្សារ និងព័ត៌មាន ក្នុងការចាប់ផ្តើម និងអភិវឌ្ឍអាជីវកម្ម។
ទី៤ - ពង្រីកវិសាលភាពគ្របដណ្តប់នៃប្រព័ន្ធគាំពារសង្គម វិធានការគោលនយោបាយនានាផ្នែកគាំពារសុខុមាភាពគ្រួសារ និង ការឆ្លើយតបលើការងារថែទាំគ្រួសារ និងការងារផ្ទះរបស់ស្ត្រី ព្រមទាំងការវិនិយោគសាធារណៈលើវិស័យសេវាថែទាំ និងសុខុមាលភាពសង្គម៕
