ការដំឡើងប្រាក់ឈ្នួល៤% នឹងជួយឱ្យធនាគារកណ្ដាលជប៉ុនបញ្ចប់អត្រាការប្រាក់អវិជ្ជមានជាប្រវត្តិសាស្ត្រ

លោក អីជិ ម៊ែដា (Eiji Maeda) អតីតនាយកប្រតិបត្តិធនាគារកណ្ដាលជប៉ុន (BOJ) ដែលដើរតួនាទីជាឧបការីទេសាភិបាល បានលើកឡើងក្នុងបទសម្ភាស​មួយកាលពីពេលថ្មីៗនេះថា ការចរចាជុំវិញការដំឡើងប្រាក់ឈ្នួលប្រចាំឆ្នាំនៅនិទាឃរដូវ ឬរដូវផ្ការីកនេះ អាចទទួលបានផលលទ្ធផលល្អប្រសើរជាងឆ្នាំមុន ដោយការដំឡើងប្រាក់ឈ្នួលអាចឈានដល់៤% ដែលនឹងជួយត្រួសត្រាយផ្លូវសម្រាប់ធនាគារកណ្ដាលជប៉ុន (BOJ) បញ្ចប់អត្រាការប្រាក់អវិជ្ជមានរបស់ខ្លួនជាប្រវត្តិសាស្ត្រ។ នេះបើយោងតាមការចុះផ្សាយរបស់សារព័ត៌មាន Japan Times។

អត្រាការប្រាក់អវិជ្ជមាន ឬ Negative Interest Rate សំដៅដល់អត្រាការប្រាក់ដែលស្ថិតក្រោម០%។ យោងតាមការចុះផ្សាយរបស់គេហទំព័រ ស្តាធីស្តា (Statista) អត្រាការប្រាក់គោលនយោបាយរបស់ធនាគារកណ្ដាលជប៉ុន (BOJ) នៅតែស្ថិតក្នុងរង្វង់-០,១% ក្នុងមួយឆ្នាំគិតត្រឹមខែធ្នូ ចុងឆ្នាំ២០២៣។ បណ្ដាវិនិយោគិនកំពុងតាមដានយ៉ាងយកចិត្តទុកដាក់ ចំពោះការចរចាដំឡើងប្រាក់ឈ្នួលប្រចាំឆ្នាំនេះ ពីព្រោះវាអាចដើរតួនាទីយ៉ាងសំខាន់នៅក្នុងការចាប់បង្ខំឱ្យធនាគារកណ្ដាលជប៉ុន (BOJ) បញ្ចប់អត្រាការប្រាក់អវិជ្ជមានរបស់ខ្លួនជាប្រវត្តិសាស្ត្រ។

សម្រាប់ហេតុផលនេះ អ្នកតាមដានស្ថានការណ៍របស់ធនាគារកណ្ដាលជប៉ុន (BOJ) ភាគច្រើនជឿថា ធនាគារកណ្ដាលមួយនេះនឹងរង់ចាំរហូតដល់ខែមេសា មុននឹងដំឡើងអត្រាការប្រាក់ ជាលើកដំបូងមិនធ្លាប់មានចាប់តាំងពីឆ្នាំ២០០៧ មក។

លោក អីជិ ម៊ែដា (Eiji Maeda) បានព្យាករថា ប្រសិនបើការដំឡើងប្រាក់ឈ្នួលប្រចាំឆ្នាំកើនឡើងដល់៤% ដូចការរំពឹងទុក វានឹងក្លាយជាការដំឡើងប្រាក់ឈ្នួលក្នុងអត្រាខ្ពស់បំផុតមិនធ្លាប់មានចាប់តាំងពីឆ្នាំ១៩៩២ មក។ លទ្ធផលបឋមរបស់ រ៉េនហ្គោ (Rengo) ដែលជាសហព័ន្ធសហជីពធំបំផុតនៅប្រទេសជប៉ុន នឹងត្រូវបញ្ចេញនៅថ្ងៃទី១៥ ខែមីនា មុនពេលធនាគារកណ្ដាលជប៉ុន (BOJ) កោះប្រជុំនៅក្នុងខែដដែលនេះ។

លោក អីជិ ម៊ែដា (Eiji Maeda) ដែលបច្ចុប្បន្នជាប្រធានវិទ្យាស្ថានស្រាវជ្រាវឈីបាហ្គីន (Chibagin Research Institute) បានលាឈប់ពីធនាគារកណ្ដាលជប៉ុន (BOJ) ក្នុងឆ្នាំ២០២០ បន្ទាប់ពីលោកបានដើរតួនាទីយ៉ាងសំខាន់ នៅក្នុងការរៀបចំគោលនយោបាយបឋមរបស់ធនាគារកណ្ដាលមួយនេះសម្រាប់ឆ្លើយតបទៅនឹងវិបត្តិកូវីដ-១៩៕

ដោយ: តែម សុខុម