ក្នុងចំណោមនីតិវិធីការពន្យារការសងប្រាក់ដែលគ្រឹះស្ថានធនាគារ និង មីក្រូហិរញ្ញវត្ថុ កំពុងតែផ្ដល់ជូនអតិថិជនរបស់ខ្លួន រួមមានដូចជា ការពន្យារពេលសងប្រាក់ដើម ដោយសងតែការប្រាក់ ពន្យារការសងទាំងប្រាក់ដើម និង ការប្រាក់ ដែលអាចមានរយៈពេលចាប់ពី ០៣ខែ រហូតដល់ទៅ ០៦ខែ គឺអាស្រ័យទៅតាមស្ថានភាពលំបាកពិតប្រាកដរបស់អតិថិជនម្នាក់ៗ ដែលបានជំពាក់ធនាគារ និងមីក្រូហិរញ្ញវត្ថុ។
លោកបណ្ឌិត អុិន ចាន់នី ប្រធានសមាគមធនាគារនៅកម្ពុជា និង ជាប្រធាននាយកប្រតិបត្តិធនាគារអេស៊ីលីដា បានគូសបញ្ជាក់ថា គ្រឹះស្ថានធនាគារកំពុងតែចូលរួមទាំងអស់គ្នាទៅតាមការណែនាំរបស់រាជរដ្ឋាភិបាលកម្ពុជា ដោយអនុវត្តនិតិវិធីពន្យារការសងត្រឡប់ជូនដល់អតិថិជនរបស់ខ្លួនទៅតាមការស្នើសុំ ស្របទៅតាមលក្ខខណ្ឌកម្ចី។
អត្ថបទទាក់ទង!
លោកបណ្ឌិត អុិន ចាន់នី បន្ថែមថា បច្ចុប្បន្នខាងធនាគារអេស៊ីលីដាមិនទាន់បានធ្វើរបាយការណ៍នៃចំនួនអ្នកដាក់ពាក្យស្នើសុំពន្យារពេលការសងប្រាក់នៅឡើយទេ ក្នុងខែមេសានេះ។ ប៉ុន្តែយ៉ាងណាក៏ដោយចុះ លោកបណ្ឌិត បានបញ្ជាក់ថា សន្ទុះនៃអតិថិជនដែលបានដាក់ពាក្យស្នើសុំពន្យារពេលការសងប្រាក់ គឺមិនមានច្រើនប៉ុន្មានទេ សម្រាប់ធនាគារអេស៊ីលីដា។
ជាមួយគ្នានេះដែរ លោក ផល វ៉ាន់ឌី នាយកប្រតិបត្តិសមាគមមីក្រូហិរញ្ញវត្ថុកម្ពុជាបានមានប្រសាសន៍ថា ក្នុងស្ថានភាពដែលកម្ពុជាកំពុងជួបវិបត្តិដោយសារជំងឺកូវីដ-១៩ ខាងគ្រឹះស្ថានផ្តល់កម្ចីនីមួយៗ គឺកំពុងតែចូលរួមដោះស្រាយជាមួយអតិថិជនផ្អែកតាមប្រភេទកម្ចី និង ភាពទទួលរងផលប៉ះពាល់ដែលនឹងឆ្លើយតបទៅតាមលទ្ធភាពរបស់អតិថិជន។
លោកបន្ថែមថា រហូតមកដល់ពេលនេះ សមាគមមិនទាន់អាចកំណត់បានថា មានអតិថិជនប៉ុន្មាននាក់បានដាក់ពាក្យស្នើសុំពន្យារការសងប្រាក់នៅឡើយទេ ប៉ុន្តែអ្វីដែលជាការកត់សម្គាល់នៅដើមខែមេសានេះ មានអតិថិជនបាន មកដាក់ពាក្យស្នើសុំពន្យារការសងប្រាក់ត្រលប់ទៅគ្រឹះស្ថានមីក្រូហិរញ្ញវត្ថុ មានចំនួនកើនឡើងជាលំដាប់។
លោក ផល វ៉ាន់ឌី បន្តថា មួយរយៈពេលចុងក្រោយនេះ អ្វីដែលយើងមើលឃើញនៅក្នុងវិស័យធនាគារ និងហិរញ្ញវត្ថុ ភាគច្រើនផ្តោតសំខាន់ទៅលើចំនួនអតិថិជនមកដាក់ពាក្យស្នើសុំការពន្យារការសងត្រឡប់ចំពោះកម្ចីឥណទានរបស់ពួកគេប៉ុណ្ណោះ។
ចំណែកឯ លោក ឧកញ៉ា ប៊ុន មុន្នី នាយកប្រតិបត្តិគ្រឹះស្ថានមីក្រូហិរញ្ញវត្ថុវិថី បានឲ្យដឹងថា ចំនួនអតិថិជនដែលដាក់ពាក្យស្នើសុំការពន្យារការសងពីគ្រឹះស្ថានមីក្រូហិរញ្ញវត្ថុរបស់លោក គិតមកដល់ពេលនេះ គឺមានចំនួនតិចតួចបំផុត ប៉ុន្តែបើសិនជាក្នុងស្ថានភាពម៉ាក្រូសេដ្ឋកិច្ចកម្ពុជានៅតែបន្តអូសបន្លាយពេលយូរបន្តទៀតនោះ ពិតណាស់នឹងមានបញ្ហាសម្រាប់ពលរដ្ឋក៏ដូចជាគ្រឹះស្ថានអ្នកផ្តល់កម្ចីដែរ។
ចំណែកឯ លោក ដុស ឌីន អគ្គនាយកគ្រឹះស្ថានមីក្រូហិរញ្ញវត្ថុ អម្រឹត ក៏បានប្រាប់ឲ្យដឹងដែរថា ស្ថិតនៅក្នុងស្ថានភាពដ៏លំបាកនេះ វិធានការណ៍ពន្យារការសងប្រាក់កម្ចីនេះ គឺជាការចូលរួមចំណែកកាត់បន្ថយផលប៉ះពាល់ដល់ជីវភាពរស់នៅរបស់អតិថិជន។
លោក ដុស ឌីន បន្ថែមថា ការពន្យារការសងប្រាក់ ដែលកំពុងផ្តល់ជូននោះគឺ បែងចែកអតិថិជនជាពីរប្រភេទធំៗ គឺ ទីមួយ អតិថិជនឥណទានក្រុមធានា ភាគច្រើនបំផុតរស់នៅទីជនបទដែលខ្ចីប្រាក់ក្នុងទំហំតូច ដែលជួបការលំបាកក្នុងការសង និង ប្រសិនអតិថិជនកម្ចីតូចៗប្រភេទនេះ ស្នើសុំពន្យារការសង អម្រឹតនឹងផ្តល់ការពន្យារការសងទាំងការប្រាក់ និងប្រាក់ដើមជាស្វ័យប្រវត្តិតែម្តង សម្រាប់រយៈពេលបីខែ។ បច្ចុប្បន្ន អម្រឹត មានអតិថិជនឥណទានក្រុមធានា ជាង១២ម៉ឺននាក់ ប៉ុន្តែក្នុងចំណោម ១២ម៉ឺននាក់នោះ មានអ្នកមកដាក់ពាក្យស្នើសុំពន្យារការសងប្រាក់នៅមានចំនួនតិចតួចនៅឡើយ។
លោក ដុស ឌីន បានបញ្ជាក់ទៀតថា តាមរយៈទំនាក់ទំនងទៅដោយផ្ទាល់ជាមួយអតិថិជនរយៈពេលកន្លងមកនេះ អតិថិជនខ្ចីប្រាក់ ដែលមានផលប៉ះពាល់មិនសូវខ្លាំង នៅតែមានឆន្ទៈបំពេញកាត្វកិច្ច គឺបន្តការសងជាធម្មតា៕
None
