ជាអតីតមេប៉ូលិសហុងកុង ក្នុងវ័យ៦៤ឆ្នាំ លោក ចន លី(John Lee) ជាបេក្ខជនតែម្នាក់គត់ដែលជ្រើសតាំងដោយទីក្រុងប៉េកាំង និងដែលគណៈកម្មការចំនួន ១៤១៦នាក់ បានបោះឆ្នោតសម្រេចកាលពីថ្ងៃអាទិត្យទី៨ឧសភា ប្រគល់តួនាទីជាប្រមុខដឹកនាំតំបន់រដ្ឋបាលស្វយ័តហុងកុង។ ខណៈមានសមាជិកតែ ៨នាក់ប៉ុណ្ណោះ បានជ្រើសរើសបោះឆ្នោតមិនគាំទ្ររូបលោក រីឯការបោះឆ្នោតអនុប្បវាទវិញមាន៣៣សម្លេង។
លោក លី នឹងត្រូវចូលកាន់តំណែងជាផ្លូវការសម្រាប់អាណត្តិ៥ឆ្នាំនៅថ្ងៃទី០១ខែកក្កដា ដែលជាថ្ងៃខួប២៥ឆ្នាំ នៃការប្រគល់ទីក្រុងហុងកុងពីអណានិគមអង់គ្លេស មកឱ្យប្រទេសចិនវិញកាលពីឆ្នាំ១៩៩៧។
គួរកត់សម្គាល់ថា នេះជាលើកទីមួយហើយគិតចាប់តាំងពីឆ្នាំ១៩៩៧មក ដែលហុងកុងមានប្រមុខដឹកនាំមិនប្រសូតចេញពីប្រភពអ្នកជំនួញ និងរដ្ឋបាល តែចេញពីផ្នែកប៉ូលិស។ លោក លី កាលនៅជាមេប៉ូលីសហុងកុង បានអនុវត្តនូវការបង្ក្រាបយ៉ាងចាស់ដៃក្រោមឥទ្ធិពលរបស់ប្រទេសចិន ពិសេសក្រោមច្បាប់សន្តិសុខជាតិដែលដាក់ចេញដោយប៉េកាំង។ ក្នុងនោះមានការចាប់ខ្លួនអ្នកប្រជាធិបតេយ្យជាច្រើននាក់ បំបែកក្រុមសង្គមស៊ីវិល និងបិទប្រព័ន្ធផ្សព្វផ្សាយឯករាជ្យជាច្រើន ដូចជា Apple Daily និង Stand News។
អត្ថបទគួរអាន
សរុបមកទល់នឹងពេលនេះ អាជ្ញាធរបានចាប់ខ្លួនមនុស្សជាង ១៨០នាក់ក្រោមបទចោទបង្កចលាចលដល់សន្តិសុខជាតិ។ អ្នកទាំងនោះរួមមានសកម្មជនគាំទ្រលទ្ធិប្រជាធិបតេយ្យ មេធាវី និងសមាជិកសភាបក្សប្រឆាំង ខណៈអ្នកកាសែតក៏ត្រូវបានគេចាប់ខ្លួនផងដែរ។
ក្រោយការបោះឆ្នោតកាលពីថ្ងៃអាទិត្យ លោក ចន លីនិយាយថា លោកនឹងបន្តអនុវត្តច្បាប់សន្តិសុខជាតិបន្ថែមទៀតសម្រាប់ហុងកុង ហើយវានឹងក្លាយជារឿងអាទិភាពមួយក្រោមការដឹកនាំរបស់លោក។ លោកលី អះអាងថាហុងកុងគឺជា សង្គមដែលគោរពច្បាប់ ហើយថាមនុស្សគ្រប់រូបត្រូវតែអនុវត្តតាមច្បាប់។
ដោយឡែកចំពោះបញ្ហាសេដ្ឋកិច្ចវិញ ហុងកុង ដែលជាក្រុងហិរញ្ញវត្ថុទីបីរបស់ពិភពលោក ទំនងជាឈានដល់ចំណុចមួយដែលលែងដូចពីមុនទៀតហើយ ក្រោមការដឹកនាំរបស់លោក ចន លី រដ្ឋអំណាចប៉េកាំងចង់នាំហុងកុងឱ្យស្ថិតក្រោមការឃុំគ្រងរបស់ខ្លួនពេញដៃ ជាជាងគិតដល់បញ្ហាសេដ្ឋកិច្ច៕
None
