លោកចូបៃឌិនថា នឹងជួបជាមួយលោកស៊ីជីនពីងឆាប់ៗ ដើម្បីជជែកពីបញ្ហារនាំងពន្ធគយលើទំនិញចិន

ការលើកឡើងគម្រោងជួបគ្នារវាងប្រមុខថ្នាក់ដឹកនាំនៃប្រទេសមហាអំណាចទាំងពីរនេះ ធ្វើឡើងនៅគ្រាដែល ប្រទេសយក្សសេដ្ឋកិច្ចទាំងពីរនេះ នៅមួយរយៈចុងក្រោយនេះ កំពុងប្រឈមមុខដាក់គ្នាកាន់តែខ្លាំងឡើងៗ នៅក្នុងបញ្ហារសើបៗជាច្រើន។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។

លោកបៃឌិន មិនបាននិយាយថា តើពេលណា ឬតាមវិធីណា ដែលមេដឹកនាំកំពូលទាំងពីរនឹងជួបនិយាយនោះទេ ប៉ុន្តែលោកបានអះអាងថា លោកកំពុងខិតខំគិតគូលើការសម្រេចចិត្តអំពីជោគវាសនានៃទណ្ឌកម្មសេដ្ឋកិច្ច ដែលរដ្ឋបាលអាមេរិកមុន បានដាក់ទៅលើទីក្រុងប៉េកាំង។

ប្រាប់ទៅក្រុមអ្នកយកព័ត៌មានដោយខ្លីនៅជិតផ្ទះក្បែរឆ្នេរសមុទ្ររបស់លោកក្នុងរដ្ឋ Delaware លោកបៃឌិននិយាយថា៖ «ខ្ញុំកំពុងតែធ្វើការសម្រេចចិត្តរបស់ខ្ញុំ»។

គួរជម្រាបថា ទីប្រឹក្សាសន្តិសុខជាតិ និងសេដ្ឋកិច្ចអាមេរិកកំពុងស្ថិតក្នុងដំណាក់កាលបញ្ចប់ នៃការពិនិត្យឡើងវិញលើគោលនយោបាយពន្ធរបស់សហរដ្ឋអាមេរិក រួចទើបផ្តល់អនុសាសន៍ទៅកាន់ប្រធានាធិបតី។

សូមរំឭកថា ពន្ធគយដែលដាក់លើទំនិញចិន អំឡុងរដ្ឋការអតីតប្រធានាធិបតី Donald Trump បានអនុវត្តកាតព្វកិច្ចក្នុងអត្រា ២៥% លើផលិតផលចិនក្នុងតម្លៃសរុបដល់ទៅរាប់ពាន់លានដុល្លារ។ ការដាក់ទណ្ឌកម្មនេះមានគោលបំណងកាត់បន្ថយឱនភាពពាណិជ្ជកម្មរបស់សហរដ្ឋអាមេរិក និងបង្ខំឱ្យប្រទេសចិនទទួលយកការអនុវត្តពាណិជ្ជកម្ម ដែលលោកត្រាំហៅថា ជារឿងយុត្តិធម៌ និងស្មើភាពគ្នា។

យ៉ាងណាក៏ដោយ រដ្ឋមន្ត្រីក្រសួងហិរញ្ញវត្ថុអាមេរិកលោកស្រី Janet Yellen ថ្មីៗនេះបានអំពាវនាវឱ្យលុបបំបាត់ពន្ធគយទាំងនោះមួយចំនួន ដើម្បីជាមធ្យោបាយមួយប្រយុទ្ធប្រឆាំងនឹងអតិផរណានៅក្នុងសហរដ្ឋអាមេរិក។ មន្ត្រីផ្សេងទៀតនៅក្នុងរដ្ឋបាលលោក Biden រួមទាំងអ្នកតំណាងពាណិជ្ជកម្មសហរដ្ឋអាមេរិកលោកស្រី Katherine Tai ផងដែរ បានបង្ហាញការព្រួយបារម្ភអំពីការបន្ធូរបន្ថយពន្ធ នៅពេលដែលប្រទេសចិនមិនបានគោរពកិច្ចព្រមព្រៀងរបស់ខ្លួនលើការទិញផលិតផលសហរដ្ឋអាមេរិក។

ភាពតានតឹងផ្នែកសេដ្ឋកិច្ចរវាងយក្សសេដ្ឋកិច្ចទាំងពីរគឺចិននិងអាមេរិក អាចឈានដល់ដំណាក់កាលធូរស្រាលឬយ៉ាងណានោះ យើងមានតែរងចាំតាមដានកិច្ចពិភាក្សារវាងមេដឹកនាំទាំងពីរដោយផ្ទាល់ក្នុងពេលឆាប់ៗ៕