នៅឯផ្សារធំថ្មី ដែលជាផ្សារមួយមានអាយុកាលចាស់ជាងគេ ពោលគឺត្រូវបានបង្កើតឡើងតាំងពីជំនាន់អាណានិគមបារាំង និងល្បីថា សម្បូរទៅដោយជនបរទេសគ្រប់ជាតិសាសន៍ ទៅទិញអីវ៉ាន់និងវត្ថុអនុស្សាវរីយ៍នោះ ក៏មានសភាពស្ងប់ស្ងាត់ដែរ បើប្រៀបធៀបនឹងកាលពីដែលមិនទាន់មានមេរោគកូវីដ១៩រាតត្បាត។
លោកស្រី ប៉ុន ដានី អភិបាលរដ្ឋាករស្វយ័តផ្សារធំថ្មី បានឲ្យដឹងថា ផ្សារធំថ្មីមានតូបសរុបចំនួន ៣២៨០តូប តែមានតូបចំនួន៦៣០តូប ត្រូវបានបិទទ្វារដោយសារតែអាជីវករភ័យខ្លាចវីរុសកូវីដ១៩ ផង និងដោយសារខ្សត់ភ្ញៀវផង។
លោកស្រីបានបន្តថា ក្រោយពេលដែលមានករណីឆ្លងវីរុសកូវីដ១៩ នៅក្នុងរាជធានីភ្នំពេញមក ផ្សារធំថ្មីចាប់ផ្តើមធ្លាក់ចុះនូវចំនួនភ្ញៀវទេសចរណ៍ជាតិ និងអន្តរជាតិ ប្រមាណពី ២០ ទៅ ៤០% នាប៉ុន្មានសប្ដាហ៍ចុងក្រោយនេះ។
អត្ថបទទាក់ទង
អាជីវករខ្លះដែលបានផ្តល់បទសម្ភាសន៍ដល់ក្រុមការងារសារព័ត៌មាន ខេមបូណូមីស ដោយមានពាក់ម៉ាស់ការពារការឆ្លងមេរោគផងនោះ បានរៀបរាប់ថា ការរាតត្បាតនៃវីរុសកូវីដ១៩ បានធ្វើឲ្យសេដ្ឋកិច្ចគ្រួសាររបស់ពួកគាត់ធ្លាក់ចុះខ្លាំង ស្ទើរតែគ្មានដើមទុនគ្រប់គ្រាន់ដើម្បីបង្វិលផង។
ប្រជាជនអ្នកដើរផ្សារដែលបានទៅផ្សារធំថ្មីដើម្បីទិញសម្ភារប្រើប្រាស់ចាំបាច់មួយចំនួន បានផ្ដល់សម្ភាសន៍ដល់សារព័ត៌មាន ខេមបូណូមីស ដោយពួកគាត់អះអាងថា មានអារម្មណ៍ភ័យខ្លាចខ្លះដែរ ពេលមកផ្សារដូច្នេះ ប៉ុន្តែ ពួកគាត់មានអារម្មណ៍ប្រសើរឡើងបន្តិចវិញ ព្រោះបានឃើញផ្សារធំថ្មី រៀបចំនូវវិធានការការពារអតិថិជនពីវីរុសកូវីដ១៩នេះ។
អាវីជករខ្លះបានបិទតូបលែងលក់ដូរ ដោយសារភ័យខ្លាចនឹងការឆ្លងរាតត្បាតនៃវីរុសកូវីដ១៩។
បើតាមលោកស្រីប្រធានផ្សារធំថ្មីបញ្ជាក់ថា គ្រប់ច្រកទាំងអស់នៅផ្សារនេះ សុទ្ធតែបានដាក់ឧបករណ៍វាស់កម្តៅ និងទឹកអាល់កុលសម្រាប់បុគ្គលិកផ្សារផង សម្រាប់ភ្ញៀវ និងអាជីវករផង។ ហើយមិនត្រឹមតែផ្សារថ្មីទេ នៅតាមបណ្តាផ្សារមួយចំនួនទៀត ក៏បានដាក់ចេញនូវឧបករណ៍ទាំងនេះ និងវិធានការអនាម័យមួយចំនួនទៀត ដើម្បីផ្តល់ទំនុកចិត្តដល់ពលរដ្ឋកុំឲ្យមានការភ័យខ្លាចចំពោះវីរុសកូវីដ១៩នេះខ្លាំងពេក។
បើតាមអ្នកនាំពាក្យសាលារាជធានីភ្នំពេញ ថ្វីត្បិតតែមានផ្សារមួយចំនួនធំក្នុងរាជធានីភ្នំពេញ ហាក់មានសភាពស្ងប់ស្ងាត់ពិតមែន តែរហូតមកទល់នឹងពេលនេះ មិនទាន់មានការសម្រេចបិទផ្សារណាមួយជាផ្លូវការនោះទេ ពោលគឺនៅដំណើរការជាធម្មតាគ្រប់ផ្សារទាំងអស់ ដែលស្ថិតក្រោមការគ្រប់គ្រងរបស់អាជ្ញាធររាជធានី៕
None
