ក្រុមហ៊ុនទាំងពីរបានព្រមព្រៀងគ្នាចុះហត្ថលេខាលើអនុស្សរណៈយោគយល់គ្នាក្នុងការបង្កើតក្រុមហ៊ុនវិនិយោគ (ជាក្រុមហ៊ុន) ដើម្បីទទួលរ៉ាប់រងយកគម្រោងនានារបស់រាជរដ្ឋាភិបាលមកអនុវត្ត តាមទិសដៅចូលរួមអភិវឌ្ឍនិងកែលម្អហេដ្ឋារចនាសម្ព័ន្ធឲ្យកាន់តែល្អប្រសើរនៅកម្ពុជា។
ក្រុមហ៊ុនទាំងពីរនេះត្រូវបានមជ្ឈដ្ឋានជាតិនិងអន្តរជាតិទទួលស្គាល់ថា សុទ្ធតែជាក្រុមហ៊ុនខ្នាតធំល្បីៗលំដាប់ថ្នាក់អន្តរជាតិ។
កិច្ចព្រមព្រៀងលើអនុស្សរណៈយោគយល់គ្នាក្នុងការបង្កើតក្រុមហ៊ុនវិនិយោគ (ជាក្រុមហ៊ុន)នេះ ក្រុមហ៊ុនលោកឧកញ៉ា សៀ ឫទ្ធី អគ្គនាយកក្រុមហ៊ុន Worldbridge Land (Cambodia) នឹងមានចំណែកភាគហ៊ុន ៤០ភាគរយ និងក្រុមហ៊ុន Sino Great Wall International Engineering Co., Ltd មកពីប្រទេសចិន មានចំណែកភាគហ៊ុន ៦០ភាគរយ។ ក្រុមហ៊ុនទាំងពីរបាននិងកំពុងសិក្សានិងពិភាក្សាពីទំហំទឹកប្រាក់វិនិយោគជាមួយគ្នាទៅថ្ងៃមុខ។
ឧកញ៉ា សៀ ឫទ្ធី ចុះហត្ថលេខាព្រមព្រៀងសហការជាមួយវិនិយោគិនចិន នាថ្ងៃទី២ ខែសីហា ឆ្នាំ២០១៧ ដើម្បីបើកក្រុមហ៊ុនថ្មីដ៏ធំមួយ។
(រូបភាព៖ ហេង ភារម្យ)
តើអ្នកបានអានអត្ថបទនេះឬនៅ?
លោកឧកញ៉ា សៀ ឫទ្ធី បានមានប្រសាសន៍ថា លោកសម្រេចចិត្តចាប់ដៃគូជាមួយក្រុមហ៊ុន Sino Great Wall International ពីព្រោះក្រុមហ៊ុននេះធ្លាប់មានបទពិសោធន៍ដ៏រឹងមាំក្នុងការសាងសង់សំណង់អគារធំៗជាច្រើនប្រកបដោយគុណភាព នៅក្នុងបណ្តាប្រទេសជាច្រើន។ នេះគឺជាសញ្ញាដ៏ល្អមួយដើម្បីឆ្លើយតបទៅនឹងការរីកចម្រើន និងការអភិវឌ្ឍឥតឈប់ឈរនៅក្នុងវិស័យហេដ្ឋារចនាសម្ព័ន្ធនៅទូទាំងប្រទេសកម្ពុជា។
លោកឧកញ៉ា សៀ ឫទ្ធី ថ្លែងយ៉ាងដូច្នេះ ៖ «ខ្ញុំពិតជាមានជំនឿយ៉ាងមុតមាំថា តាមរយៈការចុះហត្ថលេខាលើអនុស្សរណៈយោគយល់គ្នានៅថ្ងៃនេះ គឺជាការត្រួសត្រាយបើកផ្លូវដ៏ធំសម្រាប់បោះជំហាន ឆ្ពោះទៅរកការបណ្តាក់ទុនរួមគ្នាវិនិយោគ នៅថ្ងៃអនាគតដ៏ខ្លីខាងមុខនេះហើយ។ វាមិនមែនគ្រាន់តែចុះ MOU ធម្មតានោះឡើយ»។
ក្រុមហ៊ុនទាំងពីរនឹងចូលរួមចំណែកក្នុងការអភិវឌ្ឍហេដ្ឋារចនាសម្ព័ន្ធសាធារណៈ ដូចជាស្ពាន ផ្លូវថ្នល់ និងសំណង់ផ្សេងៗនៅកម្ពុជាឲ្យកាន់តែរីកចម្រើន ដើម្បីជាសសរស្តម្ភ រុញច្រានកំណើនសេដ្ឋកិច្ចជាតិឲ្យកាន់តែខ្លាំង។ លោកឧកញ៉ាថា នឹងខិតខំកៀងគរប្រភពទុនពីក្រៅប្រទេសមកធ្វើការវិនិយោគនៅក្នុស្រុក ដូចជាជួយអភិវឌ្ឍប្រទេសជាតិផងដែរ។
លោក Liang Rong អនុប្រធានក្រុមប្រឹក្សាភិបាល ក្រុមហ៊ុន Sino Great Wall International Engineering Co., Ltd បានលើកឡើងថា ក្រុមហ៊ុន Sino Great Wall International គឺជាក្រុមហ៊ុនសាងសង់ដ៏ធំដែលបានចុះបញ្ជីនៅក្នុងទីផ្សារភាគហ៊ុន Shenzhen នៅប្រទេសចិន។
លោកថា ក្រុមហ៊ុនរបស់លោកមានធនធាននិងមធ្យោបាយជាក់លាក់ក្នុងការទទួលយកគម្រោងខា្នតធំៗមកអនុវត្ត។ ហើយលោកបន្តថា ក្រុមហ៊ុននឹងចូលរួមផ្តល់វិភាគទានដ៏ល្អប្រសើរដើម្បីជួយអភិវឌ្ឍប្រទេសកម្ពុជា។
សូមបញ្ជាក់ដែរថា ក្រុមហ៊ុន Sino Great Wall International បានចូលមកបោះទុនវិនិយោគសាងសង់សំណង់អគារធំៗខ្ពស់ៗជាច្រើននៅកម្ពុជា។ ថ្មីៗនេះ ក្រុមហ៊ុនបានឈ្នះការដេញថ្លៃ ទទួលសិទ្ធិសាងសង់អគារភ្លោះ មជ្ឈមណ្ឌលពាណិជ្ជកម្ម កម្ពស់ ១៣៣ជាន់ ដែលមានតម្លៃគម្រោងសាងសង់ ២,៧ពាន់លានដុល្លារអាមេរិក នៅភ្នំពេញកម្ពុជា។
ហើយបច្ចុប្បន្ន ក្រុមហ៊ុននេះ Sino Great Wall International Engineering Co., Ltd កំពុងតែសាងសង់អគារ The Bridge ដែលមានកម្ពស់ ៤៥ជាន់ ដែលគ្រោងនឹងរួចរាល់ បើកទ្វារប្រតិបត្តិការពាណិជ្ជកម្មនៅដើមឆ្នាំ២០១៨។ ហើយក្រុមហ៊ុននេះដែរ ក៏បានចាប់ផ្ដើមសាងសង់អគារ The Peak កម្ពស់ ៥៥ជាន់ ដែលនឹងផុសឡើងបង្ហាញរូបរាងនៅ២ខែខាងមុខ ដែលគម្រោងទាំងវិនិយោគដោយលោក ឧកញ៉ា សៀ ឫទ្ធី រួមសហការជាមួយអ្នកវិនិយោគមកពីប្រទេសសិង្ហបុរី៕
None
