សម្តេច តេជោ សែន បានអះអាងថា ការសម្រេចបានល្បឿនចាក់វ៉ាក់សាំងបានលឿនរហ័សរបស់កម្ពុជានេះ គឺដោយសារតែ រាជរដ្ឋាភិបាលកម្ពុជាមានការសម្រេចចិត្តបានត្រឹមត្រូវ ក្នុងការជ្រើសរើសយកប្រទេសចិន ជាបង្អែកយុទ្ធសាស្ត្រវ៉ាក់សាំងកូវីដ-១៩ និងជ្រើសរើសយកជំនួយវ៉ាក់សាំង និងការបញ្ជាទិញពីប្រភពផ្សេងទៀត គឺជាការគាំទ្របន្ថែម។ សម្តេចតេជោ ហ៊ុន សែន បានថ្លែងយ៉ាងដូច្នេះ នៅក្នុងឱកាសសម្តេចប្រកាសបើកយុទ្ធនាការចាក់វ៉ាក់សាំងជូនដល់កុមារ និងយុវវ័យអាយុពី ១២ឆ្នាំ ដល់ ក្រោម១៨ឆ្នាំ នៅវិមានសន្ដិភាព កាលពីថ្ងៃទី ០១ ខែសីហា ឆ្នាំ២០២១នេះ។
តើមានហេតុផលអ្វីខ្លះ ដែលកម្ពុជាសម្រេចជ្រើសរើសចិន ជាបង្អែកយុទ្ធសាស្ត្រផ្គង់ផ្គង់វ៉ាក់សាំងកូវីដ-១៩? សម្តេច តេជោ ហ៊ុន សែន បានលើកឡើងថា ហេតុផលដែលកម្ពុជាសម្រេចជ្រើសយកចិនជាខ្នងបង្អែកយុទ្ធសាស្ត្រក្នុងការផ្គត់ផ្គង់វា់ក់សាំងនេះ គឺដោយសារតែកម្ពុជាមានបទពិសោន៍ដែលធ្លាប់ឆ្លងកាត់នូវរឿងជាច្រើនពីអតីតកាល ហើយទំនោរនិន្នាការសកល គឺមានប្រទេសជាច្រើនទោះបីជាមានកិច្ចសន្យាទិញវ៉ាក់សាំងបាន ឬមានលុយច្រើនដើម្បីទិញវ៉ាក់សាំងក៏ពិតមែន ប៉ុន្ដែ មិនប្រាកដថា បានទទួលវ៉ាក់សាំងទាំងនោះទាន់ពេលវេលានោះទេ។ ដូច្នេះហើយ ទើបសម្តេចតេជោ បានបញ្ជាឲ្យ ឯកឧត្តម វង្សី វិស្សុត រដ្ឋមន្ត្រីអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ ឲ្យទិញវ៉ាក់សាំងពីចិនឲ្យបានលឿន ពោលគឺ ឲ្យតែចិនថា លក់វ៉ាក់សាំង គឺត្រូវបញ្ជាទិញពីចិនភ្លាម។
បើតាមការគូសបញ្ជាក់ពីសម្តេចតេជោ ហ៊ុន សែន មកទល់ពេលនេះ ប្រទេសចិន បានផ្ដល់ជំនួយវ៉ាក់សាំងកូវីដ-១៩ មកឲ្យកម្ពុជាប្រមាណ ៣លាន២សែនដូសហើយ ខណៈដែលកម្ពុជាបានបញ្ជាទិញវ៉ាក់សាំងពីចិនមានប្រមាណ ២០លាន ៥សែនដូសហើយ។ បើគិតមកដល់ពេលនេះ ចំនួនវ៉ាក់សាំងដែលកម្ពុជាមាន និងកំពុងដំណើរការចាក់ជូនពលរដ្ឋ មានប្រមាណ ១៩លានដូសហើយ ខណៈដែលនៅក្នុងខែសីហានេះ នឹងមានវ៉ាក់សាំងដឹកជញ្ជូនមកបន្ថែមទៀត ដែលជាជំនួយផង និង ជាការបញ្ជាទិញផង សរុបទៅ កម្ពុជានឹងមានវ៉ាក់សាំងប្រហែល ២៥លានដូស។
អត្ថបទគួរអាន
សូមបញ្ជាក់ថា ក្រៅតែពីវ៉ាក់សាំងដែលជាជំនួយ និង បញ្ជាទិញពីប្រទេសចិន កម្ពុជាក៏បាន និងកំពុងទទួលជំនួយវ៉ាក់សាំងពីប្រទេសផ្សេងទៀតដែរ ទាំងជំនួយតាមរយៈកូវ៉ាក់សាំង និងជំនួយទ្វេភាគី ដូចជាជប៉ុន អាមេរិក និង អង់គ្លេសជាដើម។
សូមបញ្ជាក់ថា មកទល់ពេលនេះ កម្ពុជាសម្រេចបានការចាក់វ៉ាក់សាំងជូនពលរដ្ឋជាង៧លាន៣សែននាក់ហើយ ក្នុងនោះ អ្នកចាក់បានពីរដូសមានជាង ៤លាន៧សែននាក់។ សរុបជារួម កម្ពុជាសម្រេចបានអត្រាអ្នកបានចាក់វ៉ាក់សាំងជាង ៧៣%ហើយ ធៀបនឹងផែនការចាក់វ៉ាក់សាំង ១០លាននាក់ ហើយបើធៀបនឹងចំនួនប្រជាជនសរុបជាង១៦លាននាក់ កម្ពុជាសម្រេចបានក្នុងអត្រាជាង៤៥%ហើយ។
ក្រៅតែពីបាននិងកំពុងចាប់ផ្ដើមចាក់វ៉ាក់សាំងជូនដល់កុមារ និង យុវវ័យ អាយុ១២ ដល់ក្រោម១៨ឆ្នាំហើយនោះ សម្តេចតេជោ ហ៊ុន សែន ក៏បានសម្រេចឲ្យមានការចាក់វ៉ាក់សាំងដូសទី ៣ ដោយប្រើវ៉ាក់សាំង AstraZeneca ជាដូសជំរុញ ដើម្បីបង្កើនប្រសិទ្ធភាពការពារ និង បង្ការជំងឺកូវីដ-១៩ផងដែរ។ អ្នកដែលអាចមានអាទិភាពចាក់ដូសទី៣នេះ គឺជាក្រុមជួរមុខ ដែលមានចំនួន៥០ម៉ឺន ទៅ១លាននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
