តាមអ្នកនាំពាក្យក្រសួងទេសចរណ៍ បានគូសបញ្ជាក់ថា ការចេញធ្វើដំណើរកម្សាន្ដរបស់ទេសចរក្នុងស្រុកនេះ គឺដោយសារតែ បញ្ហាកូវីដ-១៩ នៅកម្ពុជាហាក់មានភាពធូរស្បើយជាងមុន ហើយពលរដ្ឋខានបានចេញធ្វើដំណើរកម្សាន្ដយូរ ប៉ុន្ដែលោកថា ប្រតិបត្តិករក្នុងវិស័យទេសចរណ៍ ក៏ដូចជាភ្ញៀវទេសចរខ្លួនឯង ក៏មិនត្រូវប្រហែសភ្លេចខ្លួននោះដែរ ពោលគឺត្រូវគោរពតាមគោលការណែនាំរបស់ក្រសួងសុខាភិបាលឲ្យបានខ្ជាប់ខ្ចួន ដើម្បីទប់ស្កាត់ការចម្លងមេរោគកូវីដ-១៩។
រយៈពេល២សប្ដាហ៍ដើមខែឧសភា ឆ្នាំ២០២០នេះ ចលនាទេសចរក្នុងស្រុកបានបន្តកើនឡើង បណ្ដើរៗឡើងវិញហើយ ដោយជាក់ស្ដែង មានភ្ញៀវទេសចរប្រមាណជាង ២៥ ម៉ឺននាក់បានចេញ ទស្សនាកម្សាន្តនៅទូទាំងប្រទេស ដែលមានការកើនឡើងជិត ៤៧% បើធៀបនឹងពីរសប្តាហ៍ចុងខែមុន។
ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ បានឲ្យដឹងថា ក្នុងចំណោមភ្ញៀវទេសចរសរុបជាង ២៥ម៉ឺននាក់ ភាគច្រើនពួកគេបានធ្វើដំណើរទៅកាន់តំបន់អេកូទេសចរណ៍នាភូមិភាគឦសាន ភាគនិរតី និងតំបន់ឆ្នេរ ពិសេសខេត្តព្រះសីហនុ ខេត្តកំពត និងខេត្តកែប។
អត្ថបទទាក់ទង!
លោក តុប សុភ័ក អ្នកនាំពាក្យក្រសួងទេសចរណ៍ បានអះអាងថា ការកើនឡើងនៃភ្ញៀវទេសចរចេញធ្វើដំណើរកម្សាន្ដនៅ២សប្ដាហ៍នៃដើមខែឧសភានេះ គឺជាសន្ទុះកំណើនមួយសន្សឹមៗប៉ុណ្ណោះ មិនបានកើនគំហុកពេកនោះទេ ស្របពេលដែលស្ថានភាពកូវីដ-១៩ នៅកម្ពុជាហាក់មានសភាពធូរស្រាលច្រើនជាងមុន។ ប៉ុន្ដែ លោកថា ទាំងប្រតិបត្តិករទេសចរណ៍ និងភ្ញៀវទេសចរ ក៏មិនត្រូវភ្លេចគោលការណ៍ណែនាំ ពីសំណាក់រាជរដ្ឋាភិបាល ដើម្បីចូលរួមការទប់ស្កាត់ការចម្លងមេរោគនោះដែរ។
ដោយឡែក ចំពោះចំនួនភ្ញៀវទេសចរពីបរទេសវិញ ត្រូវបានអ្នកនាំពាក្យក្រសួងទេសចរណ៍រូបនេះ បានបញ្ជាក់ទៀតថា ដោយសារតែមានវិធានការរឹតត្បិតលើការធ្វើដំណើរនៅអំឡុងពេលកូវីដ-១៩នេះ សម្រាប់ភ្ញៀវទេសចរបរទេស គឺអាចនឹងនៅតែបន្តការថមថយបន្តទៀត។អត្ថបទគួរអាន!
ទោះជាបែបនេះក្ដី សម្រាប់កាលៈទេសៈនេះ ក្រសួងទេសចរណ៍ចាត់ទុកថា ចលនាទេសចរក្នុងស្រុក ក៏ជាការរួមចំណែកមួយក្នុងការផ្ដល់ដង្ហើមរស់សម្រាប់អាជីវកម្មក្នុងវិស័យទេសចរណ៍ ហើយបើគ្មានការចូលរួមចំណែកពីចលនាទេសចរក្នុងស្រុកទេនោះ អាជីវកម្មជាច្រើនដូចជាភោជនីយដ្ឋាន ផ្ទះសំណាក់ សណ្ឋាគារ សុទ្ធតែត្រូវប្រឈមនឹងបញ្ហាធ្ងន់ធ្ងរជាក់ជាមិនខានឡើយ។
សូមបញ្ជាក់ថា ប្រទេសកម្ពុជា បានជួបប្រទះនូវ វិបត្តិមេរោគកូវីដ១៩ ដូចបណ្តាប្រទេសដទៃជាច្រើនលើសកលលោកដែរ គឺបានធ្វើឲ្យ វិស័យទេសចរណ៍កម្ពុជា បាត់បង់ចំណែកភ្ញៀវទេសចរបរទេស ប្រមាណ ៣៨% ពោលគឺធ្លាក់ចុះជាង ៧សែននាក់ នៅក្នុងត្រីមាសទី១ ឆ្នាំ ២០២០នេះ ធៀបនឹងពេលដូចគ្នាកាលពីឆ្នាំមុន។ នេះយោងតាមរបាយការណ៍ពីក្រសួងទេសចរណ៍៕
None
