ទំហំទឹកប្រាក់នៃការនាំចេញរបស់កម្ពុជាទៅជប៉ុន ចាប់ពីខែមករា ដល់ដំណាច់ខែកញ្ញា ឆ្នាំ២០២០នេះ បង្ហាញពីការធ្លាក់ចុះគួរឲ្យកត់សម្គាល់ ទោះយ៉ាងណា តួលេខនាំចេញនេះ នៅតែខ្លាំងជាង ប្រទេសឡាវ និងមីយ៉ាន់ម៉ា ដដែល សម្រាប់ប្រទេសជាសមាជិកអាស៊ាន ដែលបានធ្វើការនាំចេញទៅជប៉ុនដូចគ្នា។`
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានគូសបញ្ជាក់ថា មានបញ្ហាធំតែមួយគត់ ដែលធ្វើឲ្យការនាំចេញរបស់កម្ពុជាទៅប្រទេសជប៉ុនមានការធ្លាក់ចុះនាពេលនេះ គឺបញ្ហាកូវីដ-១៩ ដែលធ្វើឲ្យជប៉ុនកាត់បន្ថយការប្រើប្រាស់សម្ភារៈមិនចាំបាច់ ដូចជាគ្រឿងអេឡិចត្រូនិច សម្លៀកបំពាក់ កង់ និងរថយន្តជាដើម។
លោកឧកញ៉ាបានគត់សម្គាល់ឃើញថា ក្នុងស្ថានភាពនៃវិបត្តិកូវីដ-១៩ នេះ ធ្វើឲ្យការផលិតនៅកម្ពុជាសម្រាប់ទីផ្សារគោលដៅនៅប្រទេសជប៉ុនមានការថយចុះជាបន្តបន្ទាប់ ស្របពេលដែលជើងហោះហើររវាងកម្ពុជា និងជប៉ុនត្រូវបានផ្អាកម្តងហើយម្តងទៀត។ ទោះយ៉ាងណា ក្នុងអំឡុងនៃវិបត្តិជំងឺសកលនេះដែរ ការនាំចេញរបស់កម្ពុជាទៅទីផ្សារអាមេរិក និងអឺរ៉ុបមានការកើនឡើងគួរឲ្យកត់សម្គាល់។
អត្ថបទទាក់ទង!
លោកឧកញ៉ាបានលើកឡើងទៀតថា ការធ្វើពាណិជ្ជកម្មជាមួយជប៉ុនកន្លងមកមានភាពរលូនជាមួយគ្នាដោយភាគច្រើនការនាំចេញរបស់កម្ពុជាទៅជប៉ុនមានការកើនជាបន្តបន្ទាប់រៀងរាល់ឆ្នាំ ប៉ុន្តែ បញ្ហាដែលធ្វើឲ្យការនាំចេញរបស់កម្ពុជាទៅជប៉ុននៅដើមឆ្នាំនេះមានការធ្លាក់ចុះនេះ គឺដោយសារតែបញ្ហាជំងឺកូវីដ-១៩តែប៉ុណ្ណោះ។ លោក ឧកញ៉ា លឹម ហេង ក៏សង្ឃឹមផងដែរថា ការធ្វើពាណិជ្ជកម្មជាមួយប្រទេសជប៉ុននៅតែដំណើរការល្អជាធម្មតាក្រោយវិបត្តិកូវីដនេះ ត្រូវដោះស្រាយបាន ខណៈជប៉ុនបានសម្រេចយកកម្ពុជាជាគោលដៅវិនិយោគ ពិសេសគឺផ្តោតសំខាន់វិនិយោគក្នុងវិស័យកសិកម្ម និងកសិ-ឧស្សាហកម្មបែបទំនើប។
សូមជម្រាបថា គិតមកដល់ត្រឹមដំណាច់ខែកញ្ញា ជប៉ុនបាននាំចូលមកកម្ពុជាមានទំហំទឹកប្រាក់ប្រមាណជាង ៣៣៩ លានដុល្លារ ដែលតួលេខនេះគឺទាបជាងកម្ពុជានាំចេញទៅជប៉ុន ដែលមានទឹកប្រាក់ប្រមាណជាង ១.២០០លានដុល្លារ។ ក្នុងនោះផលិតផលសំខាន់ៗ ដែលកម្ពុជាបាននំាចេញទៅជប៉ុនមានដូចជាស្បែកជើង សម្លៀកបំពាក់ និង គ្រឿងបង្គំម៉ាស៊ីនអគ្គិសនី។ ចំណែកឯ កម្ពុជាមានតម្រូវការនាំចូលពីជប៉ុនវិញ គឺផលិតផលគ្រឿងម៉ាស៊ីនសម្រាប់ដំណើរការរោងចក្រ រថយន្ត គ្រឿងអេឡិចទ្រូនិច គ្រឿងចក្រសម្រាប់វិស័យកសិកម្ម និងគ្រឿងបរិក្ខារសម្រាប់លំនៅដ្ឋានជាដើម៕
None
