កម្ពុជារំពឹងទទួលបានហិរញ្ញប្បទានឥតសំណងពីអាមេរិក ៣០០លានដុល្លារ នៅត្រីមាសទី១ឆ្នាំ២០២២

សេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា នៅក្រោយជំនួបពិភាក្សាការងារ រវាង ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទានិងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា ជាមួយនឹងឯកឧត្តម ផាតទ្រីក មូហ្វី ឯកអគ្គរដ្ឋទូតអាមេរិកប្រចាំកម្ពុជា នៅថ្ងៃទី ១៦ ខែធ្នូ ឆ្នាំ២០២១ បានឲ្យដឹងថា កម្ពុជា និងអាមេរិក គ្រោងនឹងបញ្ចប់ការចរចា និងត្រៀមចុះហត្ថលេខាលើកិច្ចព្រមព្រៀងស្ដីពីហិរញ្ញប្បទានសហប្រតិបត្តិការរវាងរដ្ឋាភិបាលប្រទេសទាំងពីរ នៅអំឡុងត្រីមាសទី១ឆ្នាំ២០២២ខាងមុខនេះ។ ដោយក្នុងនោះ អាមេរិក នឹងផ្ដល់ហិរញ្ញប្បទានឥតសំណងប្រមាណ៣០០លានដុល្លារអាមេរិក សម្រាប់រយៈពេល៥ឆ្នាំ ចាប់ពីឆ្នាំ២០២១ដល់២០២៥។

ឯកឧត្តម ឈៀង យ៉ាណារ៉ា បានគូសបញ្ជាក់ថា តាមរយៈទីភ្នាក់ងារUSAID អាមេរិក បានផ្ដល់ជាជំនួយជាច្រើនដល់កម្ពុជា ទាំងផ្នែកបច្ចេកទេស និងហិរញ្ញវត្ថុ សម្រាប់ វិស័យសុខាភិបាល អប់រំ កសិកម្ម បរិស្ថាន និងអភិបាលកិច្ច និងអន្តរវិស័យ។ ជាពិសេស សហរដ្ឋអាមេរិកបានផ្ដល់នូវហិរញ្ញប្បទាន ឥតសំណងប្រមាណ ១៥ លានដុល្លារអាមេរិក និងវ៉ាក់សាំងកូវីដ១៩ (Johnson & Johnson) ចំនួនប្រមាណជាង ១ លានដួស ដល់កម្ពុជាសម្រាប់គាំទ្រដល់វិធានការឆ្លើយតបនឹងជំងឺកូវីដ-១៩ និងវិធានការស្ដារសង្គម និងសេដ្ឋកិច្ចរបស់រាជរដ្ឋាភិបាលកម្ពុជានៅអំឡុងពេលនៃវិបត្តិកូវីដ១៩ នេះផងដែរ។

ជាមួយគ្នានេះដែរ ឯកឧត្តមឯកអគ្គរដ្ឋទូតអាមេរិក លោក ផាតទ្រី មូហ្វី ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ពិសេសការគ្រប់គ្រងបានល្អនៃការឆ្លងរីករាលដាលកូវីដ១៩ និងការសម្រេចបានចាក់វ៉ាក់សាំងជូនដល់ប្រជាជនកម្ពុជា និងជនប្រទេសរស់នៅ និងធ្វើការនៅកម្ពុជាផងដែរ៕

 អត្ថបទ៖ ហួន ស្រីនីត