បើតាមរបាយការណ៍បូកសរុបលទ្ធផលការងារពាណិជ្ជកម្ម ឆ្នាំ ២០១៩ និងទិសដៅការងារពាណិជ្ជកម្ម ឆ្នាំ ២០២០ របស់ក្រសួងពាណិជ្ជកម្មកម្ពុជា បានគូសបញ្ជាក់បន្ថែមថា ក្នុងរយៈពេល ១០ខែ ដើមឆ្នាំ ២០១៩នេះ ការនាំចេញសម្លៀកបំពាក់ មានទំហំទឹកប្រាក់ប្រមាណជាង ៦,៤ ពាន់លានដុល្លារអាមេរិក រីឯវាយនភ័ណ្ឌមានទឹកប្រាក់ប្រមាណ ៤០លានដុល្លារអាមេរិក និងស្បែកជើងប្រមាណ ៩០៥លានដុល្លារអាមេរិក។
ដោយឡែក ការនាំចេញអង្ករក្រោមប្រព័ន្ធអនុគ្រោះពាណិជ្ជកម្ម និងកិច្ចព្រមព្រៀងពាណិជ្ជកម្មសេរី សម្រេចបានជាង ២៨៦លានដុល្លារអាមេរិក ហើយផលិតផលផ្សេងៗជាច្រើនមុខទៀត សម្រេចបានប្រមាណ ៣,១ ពាន់លានដុល្លារអាមេរិក។
អត្ថបទទាក់ទង!
ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានថ្លែងនៅក្នុង ពិធីបើកសន្និបាតបូកសរុបលទ្ធផលការងារពាណិជ្ជកម្ម ឆ្នាំ ២០១៩ និងទិសដៅការងារពាណិជ្ជកម្ម ឆ្នាំ ២០២០ បានឲ្យដឹងថា ការនាំចេញរបស់កម្ពុជា ជាទូទៅ រក្សាបានកំណើនប្រមាណ ១០% ធៀបនឹងតម្លៃនាំចេញក្នុងឆ្នាំកន្លងទៅ ដោយសារតែ កម្ពុជា បានជំរុញការធ្វើសមាហរណកម្មបន្ថែមទៀត ក្នុងក្របខណ្ឌអាស៊ាន និងជាមួយដៃគូអាស៊ាន ដូចជា ចិន កូរ៉េ ជប៉ុន អូស្រ្តាលី ជាដើម ខណៈ ការនាំចេញទៅកាន់ទីផ្សារធំៗ ដូចជា អាមេរិក និងចិន នៅរក្សាអត្រាកំណើនដូចក្នុងឆ្នាំ ២០១៨។
សូមជម្រាបថា កម្ពុជា ក៏កំពុងពង្រីកទីផ្សារថ្មី ទៅកាន់បណ្តាប្រទេសមួយចំនួននៅអឺរ៉ុបខាងកើត និងទីផ្សារដែលមានសក្តានុពលនាំចេញ ដូចជា ចិន ជប៉ុន និងកូរ៉េ តាមរយៈការចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគី និងបញ្ចប់ការចរចាកិច្ចព្រមព្រៀងពាណិជ្ជកម្មសេរីរវាង ១៦ប្រទេស ហៅកាត់ថា RCEP (អរ សេប) ដែលនឹងឈានទៅចុះហត្ថលេខានៅឆ្នាំ ២០២០៕
None
