លោក សារ ចំរើន ទីប្រឹក្សាសមាគមមៀនប៉ៃលិន បានគូសបញ្ជាក់ថា គិតមកទល់ពេលនេះ ស្ថានភាពទីផ្សារនាំចេញផ្លែមៀនស្រស់កម្ពុជា ទៅកាន់ប្រទេសចិន បានបង្ហាញលទ្ធផលផ្លែផ្កាគួរឱ្យកត់សម្គាល់។ តួយ៉ាង តាមរបាយការណ៍របស់អគ្គនាយដ្ឋានកសិកម្ម បានបង្ហាញថា នៅរយៈពេល១១ខែ ឆ្នាំ២០២៣នេះ កម្ពុជាបាននាំចេញផ្លែមៀនស្រស់ទៅកាន់ទីផ្សារប្រទេសចិន ជាង ១ម៉ឺន៣ពាន់តោន កើនឡើងប្រមាណ ៥៧០% បើធៀបនឹងរយៈពេលដូចគ្នាឆ្នាំមុន។ ការនាំចេញមានការកើនឡើងខ្ពស់បែបនេះ ត្រូវបាន លោក សារ ចំរើន អះអាងថា ដោយសារឆ្នាំនេះជាឆ្នាំទី២ ដែលកម្ពុជាបាននាំចេញមៀនស្រស់ទៅទីផ្សារចិន បានទូលំទូលាយ ដូច្នេះទិន្នផលដែលប្រជាកសិករទទួលបានសម្រាប់នាំចេញក៏មានច្រើនជាងឆ្នាំមុនដែរ។ ទីប្រឹក្សាសមាគមមៀនប៉ៃលិនរូបនេះ បានអះអាងទៀតថា កាលពីឆ្នាំកន្លងទៅប្រជាកសិករមួយចំនួនបានផ្អាកការដាក់អរម៉ូនយកផ្លែផ្កា ដើម្បីទទួលផល ក្រោយពួកគាត់បានខាតបង់ច្រើនកាលពីជំនាន់កូវីដ-១៩មក ដែលធ្វើឱ្យទិន្នផលកាលពីឆ្នាំមុនមានតិចសម្រាប់នាំចេញ ហើយស្របពេលដែលកម្ពុជាអាចនាំចេញផ្លែមៀនស្រស់ទៅកាន់ទីផ្សារចិនជាផ្លូវការដំបូងក៏ស្ថិតនៅអំឡុងពេលចុងឆ្នាំ២០២២ហើយផងដែរ។
អត្ថបទគួរអាន
បើតាមទីប្រឹក្សាសមាគមមៀនប៉ៃលិនរូបនេះ ការនាំចេញផ្លែមៀនស្រស់កម្ពុជា ទៅប្រទេសចិននឹងកាន់តែមានភាពល្អប្រសើរនៅឆ្នាំបន្តបន្ទាប់ខាងមុខ ខណៈបច្ចុប្បន្នទិន្នផលមៀនប៉ៃលិន ដែលកសិករប្រមូលផលបាននៅមិនអាចឆ្លើយតបនឹងតម្រូវការបញ្ជាទិញរបស់ក្រុមហ៊ុននាំចេញនោះទេ ដ្បិតសម្រាប់ពេញមួយឆ្នាំ២០២៣នេះ កម្ពុជាមានទិន្នផលមៀនស្រស់ប្រមាណ១ម៉ឺន៥ពាន់តោនប៉ុណ្ណោះ សម្រាប់លក់ឱ្យក្រុមហ៊ុននាំចេញ។
ក្រៅតែពីទីផ្សារចិន លោក សារ ចំរើន អះអាងថា បច្ចុប្បន្នកម្ពុជាក៏បានសាងល្បងនាំចេញទៅកាន់ទីផ្សារអឺរ៉ុបផងដែរ ដោយនាំចេញបន្តតាមរយៈទីផ្សារចិន ហើយមកទល់ពេលនេះក្រសួងស្ថាប័នពាក់ព័ន្ធ និងក្រុមហ៊ុននាំចេញបាននិងកំពុងធ្វើការជំរុញ និងសិក្សាអំពីលទ្ធភាព ដើម្បីធ្វើយ៉ាងណាឱ្យមៀនស្រស់កម្ពុជាអាចនាំចេញដោយផ្ទាល់ទៅកាន់ទីផ្សារអឺរ៉ុបនាពេលឆាប់ៗខាងមុខ។
សូមជម្រាបថា តម្លៃផ្លែមៀនស្រស់កម្ពុជានៅឆ្នាំនេះមានតម្លៃល្អជាងឆ្នាំមុន ពោលគឺចាប់ពីខែកក្កដា ដល់ខែធ្នូឆ្នាំ២០២៣នេះ ក្រុមហ៊ុនបញ្ជាទិញបានដាក់តម្លៃមៀនស្រស់កម្ពុជាក្នុងតម្លៃ ៣ពាន់៦រយរៀលក្នុងមួយគីឡូក្រាម ខណៈចាប់ពីខែមករា ដល់ខែកុម្ភៈ ឆ្នាំ២០២៤ មៀនស្រស់កម្ពុជាអាចលក់បានក្នុងតម្លៃ៤ពាន់រៀលក្នុងមួយគីឡូក្រាម និងចាប់ពីខែមីនា ឆ្នាំ២០២៤ តទៅលក់បានក្នុងតម្លៃ៤ពាន់៥រយរៀលក្នុងមួយគីឡូក្រាម។ នេះបើតាមការបញ្ជាក់របស់សមាគមមៀនប៉ៃលិន៕
None
