ការលើកឡើងរបស់អតីតប្រធានាធិបតីរុស្ស៊ីនេះ ធ្វើឡើងស្របពេលដែល អង្គការណាតូត្រៀមនឹងបង្កើនកងទ័ពជាង ៣ សែននាក់បន្ថែម ដើម្បីប្រុងជើងការខ្ពស់ ដែលជាយុទ្ធសាស្ត្រថ្មីក្នុងការឆ្លើយតបនឹងគំរាមកំហែង ដោយផ្ទាល់ពីសំណាក់រុស្សី ក្រោយពីបានចូលឈ្លានពានអ៊ុយក្រែនអស់រយៈពេលបួនខែកន្លងមកនេះ។
លោក Medvedev បានថ្លែងក្នុងគេហទំព័រព័ត៌មាន (Argumenty i Fakty) ក្នុងស្រុករុស្សីថា "ដែនដីគ្រីមៀរជាផ្នែកមួយរបស់ប្រទេសរុស្សី ហើយវាមិនអាចកាត់ផ្តាច់ពីរុស្សីបានឡើយ។ ការប៉ុនប៉ងណាមួយ ដើម្បីរំលោភបំពានលើតំបន់គ្រីមៀរ គឺជាការប្រកាសសង្គ្រាមប្រឆាំងនឹងប្រទេសរុស្សីហើយ"។
អតីតប្រធានាធិបតីរុស្ស៊ីរូបនេះ បានបន្ថែមយ៉ាងច្បាស់ៗថា "ប្រសិនបើទង្វើឈ្លានពានត្រូវបានធ្វើដោយរដ្ឋសមាជិកណាតូ នោះមានន័យថា រុស្សីនឹងប្រកាសង្គ្រាមជាមួយសម្ព័ន្ធមិត្តណាតូទាំងមូល ហើយសង្គ្រាមលោកលើកទីបីនឹងផ្ទុះ។
លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខជាតិរុស្ស៊ី ក៏បានគូសបញ្ជាក់ផងដែរថា ប្រសិនបើប្រទេសហ្វាំងឡង់ និងស៊ុយអែត ចូលជាសមាជិកភាពរបស់អង្គការណាតូមែន នោះរុស្ស៊ីក៏នឹងពង្រឹងព្រំដែនរបស់ខ្លួនជាមួយប្រទេសទាំងពីរនេះដែរ ហើយក៏នឹង "ត្រៀមខ្លួនសម្រាប់ការវាយបកវិញ" ដោយវិមានក្រឹមឡាំងនឹងដាក់ពង្រាយប្រព័ន្ធមីស៊ីលអ៊ីស្កេនដើ (Iskander) របស់ខ្លួននៅតាមព្រំដែនផងដែរ។
យ៉ាងណាមិញ ស្របពេលដែលសង្គ្រាមលើអ៊ុយក្រែនបានអូសបន្លាយជាងបួនខែមកនេះ អគ្គលេខាធិការអង្គការ NATO លោកចីន ស្តូថេនបើក (Jens Stoltenberg) បាននិយាយកាលពីថ្ងៃចន្ទនេះថា ណាតូនឹងអនុម័តបង្កើនចំនួនកងទ័ព ៧ ដងបន្ថែមទៀត ស្មើនឹងជាង ៣ សែននាក់ បើធៀបនឹងបច្ចុប្បន្នមានត្រឹម ៤ ម៉ឺននាក់ប៉ុណ្ណោះ ដែលជាកងកម្លាំងឆ្លើយតបពិសេស (NRF) របស់ណាតូ។
លើសពីនេះ កងទ័ពថ្មីនេះ គឺត្រូវដាក់ជាកម្លាំងដែលប្រុងជើងការខ្ពស់ ដែលជាយុទ្ធសាស្ត្ររបស់ណាតូក្នុងការឆ្លើយតបនឹងការគំរាមគំហែងដោយផ្ទាល់ពីសំណាក់រុស្សីកន្លងទៅ។
លោក Stoltenberg បាននិយាយនៅទីក្រុងប្រ៊ុចសែល មុនកិច្ចប្រជុំកំពូលរបស់អង្គការណាតូ នៅចុងសប្តាហ៍នេះ នៅទីក្រុងម៉ាឌ្រីតថា "រុស្ស៊ីបានដើរចេញដោយខ្លួនឯងពីភាពជាដៃគូ និងកិច្ចសន្ទនាផ្សេងៗ ដែលណាតូបានព្យាយាមបង្កើតជាមួយរុស្ស៊ីអស់រយៈពេលជាច្រើនឆ្នាំ" មកនេះ។
អគ្គលេខាធិការអង្គការណាតូរូបនេះ បានប្រាប់អ្នកយកព័ត៌មានថា "ទីក្រុងម៉ូស្គូខ្លួនឯងបានជ្រើសរើសយកការប្រឈមមុខយោធាដាក់គ្នាជាមួយណាតូ ជំនួសឱ្យការសន្ទនា ហើយណាតូគ្មានជម្រើសណាក្រៅពីឆ្លើយតបវិញនោះទេ។
ក្នុងនោះដែរ លោក Stoltenberg បាននិយាយថា កងកម្លាំងយោធារបស់អង្គការណាតូនៅភាគខាងកើត ដែលជាប់នឹងព្រំដែនប្រទេសរុស្សីផងនោះ ពិសេសរដ្ឋនៅជុំវិញសមុទ្របាល់ទិក នឹងត្រូវបន្ថែមកម្លាំងយោធា ក៏ដូចជាពង្រឹងដើម្បីត្រៀមប្រយុទ្ធផងដែរ។
លោកចីន ស្តូថេនបើក ដែលជាអគ្គលេខាធិការអង្គការណាតូដដែល បានសង្គត់ធ្ងន់ៗថា “សម្ព័ន្ធមិត្តទាំងអស់ត្រូវតែយល់យ៉ាងច្បាស់ថា រុស្ស៊ីពិតជាបង្កការគំរាមកំហែងយ៉ាងខ្លាំងដល់សន្តិសុខរបស់ពួកយើង ចំពោះគុណតម្លៃស្នូល និងសណ្តាប់ធ្នាប់អន្តរជាតិដែលផ្អែកលើច្បាប់។
គួរជម្រាបដែរថា ការឈ្លានពានរបស់រុស្សីទៅលើអ៊ុយក្រែននៅខែកុម្ភៈ បានធ្វើឱ្យមានការផ្លាស់ប្តូរភូមិសាស្ត្រនយោបាយដ៏ធំមួយនៅទ្វីបអឺរ៉ុបចាប់តាំងពីសង្គ្រាមត្រជាក់មក ដោយបានជំរុញឱ្យប្រទេសអព្យាក្រឹតដូចជាហ្វាំងឡង់ និងស៊ុយអែតបានសម្រេចសុំចូលជាសមាជិកភាពនៃអង្គការណាតូ ហើយនិងអ៊ុយក្រែនចូលជាបេក្ខភាពនៃសហភាពអឺរ៉ុប៕
អត្ថបទ៖ ហ៊ុន គន្ធថៃ
