មុនការចេញដំណើររបស់ សម្តេច ហ៊ុន សែន ពីកម្ពុជា ទៅចូលរួមវេទិកាខ្សែក្រវាត់ និងផ្លូវ នៅប៉េកាំង នៅថ្ងៃព្រហស្បតិ៍នេះ លោក ស្រី ថាំរ៉ុងបានថ្លែងថា សម្តច នឹងមានជំនួបជាមួយអនុប្រធានក្រុមហ៊ុន Huawei ហើយបន្ទាប់មក នឹងមានការចុះហត្ថលេខារវាងក្រុមហ៊ុនចិនមួយនេះ ជាមួយក្រសួងប្រៃសណីយ៍ និងទូរគមនាគមន៍ទាក់ទងនឹងការអភិវឌ្ឍបណ្តាញ 5G នៅកម្ពុជា ដែលគឺជាបណ្តាញទូរគមនាគមន៏លឿនបំផុត។
លោក ស្រី ថាំរ៉ុងបានថ្លែងថា «នៅក្នុងអាស៊ាននេះ មិនទាន់មានទេ [បណ្ដាញ 5G] យើងប្រហែលជាអាចចាប់ផ្តើមមុនគេ ដោយថា សម្តេច យកចិត្តទុកដាក់លើបច្ចេកវិទ្យាចុងក្រោយ»។
លោក ស្រី ថាំរ៉ុង បានបន្តថា ខណ:ដែលនៅចិន សម្តេច ហ៊ុន សែន ក៏នឹងជួបជាមួយនាយកក្រុមហ៊ុនចិនធំៗ ផ្សេងទៀតផងដែរ ដែលមួយចំនួនកំពុងតែរកស៊ីនៅកម្ពុជា និងខ្លះទៀត មានបំណងមកវិនិយោគនៅកម្ពុជារួមទាំងក្រុមហ៊ុនសារជីវកម្មសាងសង់រថភ្លើងចិន ដែលសម្តេចយកចិត្តទុកដាក់ស្ដារឡើងវិញនូវខ្សែរថភ្លើង។
អត្ថបទទាក់ទង!
វេទិកា ខ្សែក្រវាត់មួយ ផ្លូវមួយ លើកទី ២នេះ មានរយៈពេល ៥ថ្ងៃ ហើយនឹងចាប់ផ្តើមពីថ្ងៃទី ២៥ ដល់ ថ្ងៃទី ២៩ ខែមេសា ឆ្នាំ២០១៩។
ដោយមិនមានមន្រ្តីជាន់ខ្ពស់អាមេរិក ចូលរួម ដោយសារមានការព្រួយបារម្ភពីការអនុវត្តផ្តល់ហិរញ្ញប្បទានរបស់គម្រោងខ្សែក្រវាត់ និងផ្លូវ ប្រទេសចិនបាននិយាយថា ថ្នាក់ដឹកនាំបរទេសប្រមាណជា ៤០នាក់ និងអ្នកតំណាងមកពីជាង ១០០ ប្រទេសផ្សេងទៀត នឹងចូលរួមវេទិកាលើកទី ២នេះ។
លោក ស្រី ថាំរ៉ុងបាននិយាយថា សម្រាប់កម្ពុជា គឺមានការគាំទ្រខ្លំាងលើគម្រោងខ្សែក្រវាត់ និងផ្លូវ ព្រោះបានជួយអភិវឌ្ឍហេដ្ឋារចនាសម្ព័ននៅក្នុងប្រទេសដូចជា ស្ពានថ្នល់ និងវារីអគ្គីសនីជាដើម។
លោកបានបន្តថា សម្តេច ហ៊ុន សែន ក៏នឹងអញ្ជើញទៅសាកលវិទ្យាល័យប៉េកាំង ដើម្បីទទួលគោរមងារជាសាស្រ្តាចារ្យកិត្តិយស សម្រាប់ទំនាក់ទំនងអន្តរជាតិការទូត ក៏ដូចជា ការដោះស្រាយវិបត្តិ ស្តារប្រទេសពីសង្រ្គាមរ៉ាំរ៉ៃ ហែកហួរមកឯកភាពជាតិទាំងស្រុងមានការអភិវឌ្ឍ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
