ការលើកឡើងរបស់អ្នកនាំពាក្យក្រសួងពាណិជ្ជកម្មកម្ពុជាយ៉ាងដូច្នេះ គឺធ្វើឡើងនៅក្រោយពេលដែលសហរដ្ឋអាមេរិក នឹងធ្វើការពិនិត្យវាយតម្លៃឡើងវិញក្នុងការផ្ដល់នូវភាពអនុគ្រោះពន្ធ GSP បន្ដទៀតមកឲ្យកម្ពុជា ខណៈប្រព័ន្ធអនុគ្រោះពន្ធនេះ ត្រូវបានផុតសុពលភាពតាំងពីចុងឆ្នាំ២០២០មកម្ល៉េះ។
ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជា បានអះអាងប្រាប់សារព័ត៌មានខេមបូណូមីសតាមប្រព័ន្ធតេឡេក្រាមថា នាពេលកន្លងមកនេះ មន្ត្រីក្រសួងពាណិជ្ជកម្មបានចូលួមជាមួយស្ថានទូតកម្ពុជាធ្វើកិច្ចការនេះជាហូរហែរមក។ ស្ថានទូតកម្ពុជា បានចូលរួមជាមួយប្រទេសសមាជិកសម្ព័ន្ធនៃប្រព័ន្ធអនុគ្រោះពន្ធ GSP នេះផង សរុបមាន ២៧ប្រទេស ហើយកន្លងមកនេះ ប្រទាំងនេះ ក៏បានចុះហត្ថលេខា លើលិខិតរួមចុះថ្ងៃទី១៣ ខែកញ្ញា ឆ្នាំ២០២១ ស្នើសុំជំរុញឱ្យសភាអាមេរិក បន្តកម្មវិធីប្រព័ន្ធអនុគ្រោះពន្ធទូទៅ GSP ដែលបានផុតសុពលភាពកាលពីចុងឆ្នាំ២០២០។ នេះជាការចូលរួមលើកទី២ របស់ប្រទេសសមាជិកសម្ព័ន្ធនៃប្រព័ន្ធអនុគ្រោះពន្ធ GSP (Alliance of GSP Countries)។
អ្នកនាំពាក្យក្រសួងពាណិជ្ជកម្មកម្ពុជារូបនេះ បានបន្ថែមថា វិស័យ ឯកជន អាមេរិក កាលពីថ្ងៃទី២១ ខែកញ្ញា ឆ្នាំ២០២១ រួមមានក្រុមហ៊ុន និងសមាគមន៍ពាណិជ្ជកម្ម អាមេរិកជាង ៣០០ ក៏បានចុះហត្ថលេខាលើលិខិតរួមគ្នាផ្ញើជូនសមាជិកជាន់ខ្ពស់នៃសភាអាមេរិក ជំរុញឱ្យសភាសហរដ្ឋអាមេរិកបន្តកម្មវិធីប្រព័ន្ធអនុគ្រោះពន្ធទូទៅ GSP ឡើងវិញឱ្យបានឆាប់រហ័ស ព្រមទាំងជំរុញឱ្យសភាសហរដ្ឋអាមេរិក ចាត់ទុកការបន្តកម្មវិធីនេះ ជាការងារអាទិភាពរបស់សភាអាមេរិក។
ឯកឧត្តម ស៊ាងថៃ អះអាងទៀតថា ដោយសារទំនាក់ទំនងល្អផង និងឆន្ទៈល្អរបស់អាមេរិកចំពោះប្រទេសមានការអភិវឌ្ឍតិចតួច (LDCs) កម្ពុជាសង្ឃឹមថា ការពិនិត្យ វាយតម្លៃក្នុងការបន្តផ្ដល់ប្រព័ន្ធ GSP របស់អាមេរិក នឹងមានលទ្ធផល ជាវិជ្ជមាន។
បើតាមការលើកឡើងរបស់ក្រសួងការបរទេសអាមេរិក តំណាងពាណិជ្ជកម្មសហរដ្ឋអាមេរិកនឹងធ្វើការវាយតម្លៃលើសិទ្ធិទទួលបានប្រព័ន្ធអនុគ្រោះទូទៅ (GSP) របស់កម្ពុជា ដែលជាផ្នែកមួយនៃការវាយតម្លៃ GSP ទូលំទូលាយ។ ការវាយតម្លៃនេះ នឹងធ្វើឡើងបន្ទាប់ពីការអនុញ្ញាតឡើងវិញ នៃអត្ថប្រយោជន៍កម្មវិធីប្រព័ន្ធអនុគ្រោះពន្ធនេះ ហើយនឹងរួមបញ្ចូលលក្ខណៈវិនិច្ឆ័យសិទ្ធិទទួលបានថ្មី ឬវិសោធនកម្មដែលបង្កើតឡើងដោយសភាអាមេរិក។
យ៉ាងណាក៏ដោយចុះ នៅក្នុងការណែនាំអំពីការធ្វើពាណិជ្ជកម្មរបស់ក្រសួងការបរទេសអាមេរិក បានលើប្រាប់ឲ្យវិនិយោគិនរបស់ខ្លួន មានការប្រុងប្រយ័ត្នក្នុងការប្រតិបត្តិការ និងពិចារណាប្រតិបត្តិការអាជីវកម្មនៅកម្ពុជា មិនត្រូវមានការពាក់ព័ន្ធនឹងប្រព័ន្ធពុករលួយ សកម្មភាពឧក្រិដកម្ម និងការរំលោភសិទ្ធិមនុស្សជាដើម ដែលសហរដ្ឋអាមេរិកចាត់ទុកថា ទង្វើទាំងនេះ ជាការគំរាមកំហែងដល់ផលប្រយោជន៍សន្ដិសុខជាតិអាមេរិក និងសេរីភាពរបស់ប្រជាជនកម្ពុជា។
អត្ថបទគួរអាន
នៅក្នុងសេចក្ដីថ្លែងការណ៍ ដែលបានចេញរួមគ្នាដោយក្រសួងការបរទេស ក្រសួងហិរញ្ញវត្ថុ និងក្រសួងពាណិជ្ជកម្មអាមេរិក បានលើកឡើងពីហានិភ័យនៃផលប៉ះពាល់ទាក់ទងនឹងសកម្មភាពហិរញ្ញវត្ថុខុសច្បាប់ នៅក្នុងវិស័យអចលនទ្រព្យ កាស៊ីណូ និងវិស័យហេដ្ឋារចនាសម្ព័ន្ធនៅកម្ពុជាផងដែរ។
ប្រព័ន្ធអនុគ្រោះពន្ធ GSP ដែលអាមេរិកបានផ្ដល់ជូនកម្ពុជានាពេលកន្លងមកនេះ បានផ្ដល់នូវអត្ថប្រយោជន៍ច្រើន សម្រាប់កម្ពុជានាំចេញទំនិញទៅកាន់សហរដ្ឋអាមេរិក ខណៈដែលកាលពីឆ្នាំ២០២០ ការនាំចេញទំនិញរបស់កម្ពុជាទៅអាមេរិកមានជាង ៦ពាន់៦រយលានដុល្លារ ក្នុងនោះ មានប្រមាណ២ពាន់លានដុល្លារាមេរិក គឺបាននាំចេញក្រោមប្រព័ន្ធអនុគ្រោះពន្ធ GSPនេះ។ នេះបើយោងតាមរបាយការណ៍ពីធនាគារពិភពលោក។
សហរដ្ឋអាមេរិក ត្រូវបានគេដឹងថា គឺជាទីផ្សារធំបំផុតទី២ របស់កម្ពុជាបន្ទាប់ពីអឺរ៉ុបសម្រាប់ការនាំចេញទំនិញ ហើយការនាំចេញរបស់កម្ពុជាទៅកាន់ទីផ្សារធំៗទាំងពីរនេះ នាពេលកន្លងមកក៏មានការអនុគ្រោះពន្ធជាច្រើនផងដែរ។
តាមរបាយការណ៍ធនាគារពិភពលោក ការនាំចេញផលិតផលកាត់ដេរ ស្បែកជើង និងផលិតផលធ្វើដំនើរ ពីកម្ពុជាទៅអាមេរិកនៅឆ្នាំ២០២០មានការកើនឡើង ៤% បើទោះបីជាមានបញ្ហាកូវីដ១៩ក៏ដោយ ខណៈដែលការនាំចេញទៅអឺរ៉ុបវិញធ្លាក់ចុះ៣៥%។ នៅឆ្នាំ២០២០ កម្ពុជានាំចេញទំនិញទៅអាមេរិក ជាង៦ពាន់៦រយលានដុល្លារ កើនឡើង២៣% ក្នុងនោះ មាន២ពាន់លានដុល្លារនាំចេញក្រោមប្រព័ន្ធអនុគ្រោះពន្ធ GSP៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
