តើមានហេតុផលអ្វីខ្លះ ធ្វើឲ្យចំណូលពន្ធដារថយចុះ៥% នៅ១០ខែឆ្នាំ២០២១នេះ?

ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ កាលពីពេលថ្មីៗ បានអះអាងថា វិបត្តិកូវីដ-១៩ បានធ្វើឱ្យប៉ះពាល់យ៉ាងធ្ងន់ធ្ងរស្ទើរគ្រប់វិស័យ ពិសេសសេដ្ឋកិច្ចកម្ពុជា។ ដើម្បីចូលរួមស្ដារឡើងវិញនូវសេដ្ឋកិច្ច និងលើកកម្ពស់ជីវភាពប្រជាពលរដ្ឋ អំឡុងការរាតត្បាតជំងឺដ៏កាចសាហាវនេះ រាជរដ្ឋាភិបាលកម្ពុជា បានសម្រេចបន្ធូរបន្ថយ និងលើកលែងពន្ធ ដល់វិស័យមួយចំនួនដែលរងគ្រោះផងដែរ។ អគ្គនាយកនៃអគ្គនាយកដ្ឋានពន្ធដាររូបនេះ បានបញ្ជាក់ទៀតថា ប្រការទាំងនេះហើយ គឺជាមូលហេតុចម្បងដែលធ្វើឱ្យការប្រមូលពន្ធនាឆ្នាំនេះមានការថយចុះ។

ដ្បិតថា ការបន្ធូរបន្ថយ និងលើកលែងពន្ធ លើវិស័យមួយចំនួន បានធ្វើឱ្យប៉ះពាល់ដល់កិច្ចការប្រមូលពន្ធ ក៏ដោយចុះ តែដើម្បីចូលរួមស្ដារវិស័យសេដ្ឋកិច្ចប្រជាពលរដ្ឋកម្ពុជា អគ្គនាយកដ្ឋានពន្ធដារ ក៏ដូចជា រាជរដ្ឋាភិបាលបានសម្រេចបន្តការលើកលែងពន្ធ ដល់វិស័យដែលរងគ្រោះ ចំនួន ៦ខែបន្ថែមទៀត ដោយគិតចាប់ពី ខែមករា ឆ្នាំ២០២២ តទៅ។ វិស័យទាំងនោះរួមមាន៖ វិស័យទេសចរណ៍ វិស័យអាកាសចរណ៍ វិស័យឧស្សាហកម្ម និងវិស័យដទៃទៀត។ 

បើទោះបី របាយការណ៍របស់អគ្គនាយកដ្ឋានពន្ធដារ ការប្រមូលពន្ធនារយៈពេល ១០ខែ ឆ្នាំ២០២១ មានការថយចុះចំនួន៥% ក៏ដោយចុះ តែអគ្គនាយកនៃនាយកដ្ឋានពន្ធដារ ឯកឧត្តម គង់ វិបុល នៅតែបង្ហាញសុទិដ្ឋិនិយមលើកិច្ចការប្រមូលពន្ធនៅឆ្នាំនេះ  ដោយលោកបានអះអាងថា នៅរយៈពេល ១០ខែ ឆ្នាំ២០២១ នេះការគ្រប់គ្រងលើការងារប្រមូលពន្ធនៅតែមានលក្ខណៈល្អប្រសើរ បើទោះស្ថិតក្នុងបរិបទកូវីដ-១៩ ខណៈការប្រមូលពន្ធវិញ បានលើសផែនការរហូត៣%ឯណោះ៕